例如，篇章嘅鋪排就係一大重點
當中尤其重要係「開卷」同「壓卷」之作
即係書入面第一篇同最後一篇
大多都有特別嘅用意
荀子全書，列勸學篇為首
我地不妨問一個問題：
勸學篇點解咁鬼重要？
荀子將佢放係全書之首有咩特別用意？
DSE課程列勸學篇為範文
但大多老師普遍都係接受思想史主流講法
「價值根源」失落，根本解釋唔到人點解要學習
唯有經過上次嘅解蔽篇「心」嘅解讀
先可以知道荀子勸學之動力
君子曰：學不可以已。青、取之於藍，而青於藍；冰、水為之，而寒於水。木直中繩，輮以為輪，其曲中規，雖有槁暴，不復挺者，輮使之然也。故木受繩則直，金就礪則利，君子博學而日參省乎己，則智明而行無過矣。
因為DSE會考字句，會較多註解
已：止
木直中繩：中：符合；繩：木匠用以取直，浸滿墨汁的線繩。木材直得合乎拉直的墨線
輮以為輪：用火烘整彎條木變做車輪
其曲中規：曲到圓哂，合符標準
雖有槁暴，不復挺者：再用返火烘都變唔返直
輮使之然也：呢個就係用火整彎直木嘅改變啦
木受繩則直：木料受到墨線嘅彈劃校正才能取直
金就礪則利：金屬工具係磨刀石上磨過先會鋒利
我地不妨將讀過嘅荀子篇章列做咁：
性惡：荀子思想之源起，因人性欲望易成惡行
禮論：荀子制度之實踐，說明禮之內容如何使人性走向文明
天論：荀子自然之天道，指出天人之分，大自然嘅規律不受人為影響
解蔽：荀子價值之根源，提倡「心」嘅自主，具判斷能力嘅價值意識
以上種種，呢一切一切嘅諗法，都必須回歸個人
勸學：荀子修行之功夫，唯有透過「心」嘅自主學習，成為君子
先可以明白「天人之分」，先可以做到「化性起偽」，先可實踐「隆禮」
唯其如此，我地先可以明白荀子點解會苦口婆心咁同你講
要「學不可以已」啦，大量嘅比喻人要學習等等
都係為左講：
「君子博學而日參省乎己，則智明而行無過矣」
只有透過學習、反省，先可以令本性欲望唔走向惡
呢個正正係荀子為何而學嘅目的啦
須臾：片刻
跂而望：提起腳跟去望
彰：彰顯
假輿馬者：坐馬車嘅人
假舟楫者：坐船嘅人
呢到主要係講緊學習環境嘅重要
荀子呢到話，成日係到諗嘢，都比唔上一秒去學習
孔子講過：「學而不思則罔，思而不學則殆」
荀子更為強調學嘅重要，先學後思
其實荀子講嘅呢種感覺並唔係好誇張嘅
好似計數咁，有人教同自學都係兩回事啦
荀子強調，學習環境係好重要，係一個恰當嘅有人教嘅環境
自然就會事半功倍啦，學得快唔快，重點唔係大家邊個醒目
「君子生非異也，善假於物也」
呢到正正可以連結返性惡篇
「人之性惡，其善者僞也」
能否善用外在嘅環境、工具，先係學習最重要嘅關鍵
神明自得：心智澄明
聖心：聖人嘅境界
蹞步：行一步
騏驥：千里馬
駑馬十駕：劣馬跑足十日
鍥：雕刻
舍：捨
螾：蚯蚓
蟹六跪而二螯：蟹有六足和兩隻鉗形爪子
虵蟺：蛇與鱔
呢邊荀子強調嘅係學習嘅方法：
1.累積，學習要「鍥而不舍」
荀子用好多比喻，行路、河流、馬等等
都係要持之以恆，咁樣先會有成果嘅
相反連條朽壞嘅木頭都整唔斷呀
2.專一，學習要「用心一也」
荀子用動物做比喻，話蚯蚓好似好廢咁
但因為佢做事夠專一，係泥士入面天地任我行
蟹雖然有咁多隻腳，又有對爪
但只可以借住蛇同鱔嘅洞穴，正正因為佢唔夠專一
講住咁多先，上面已經係DSE會考嘅全文啦
下篇會再講勸學篇另外重要嘅地方
祝各位考生順利，荀子會保佑你地架
No comments:
Post a Comment