[古典文學入門（五）ep.3]廣陵散絕矣！風華絕代之消逝 讀《世說新語》之嵇康篇

「有人說，嵇康怎麼這麼自私，死前還不肯將曲譜留下？但嵇康說，不是每一個人都配聽《廣陵散》。如果活不出孤獨感，如果做不到特立獨行，藝術、美是沒有意義的，不過就是附庸風雅而已。」
——蔣勳

竹林七賢入面，最出名嘅係嵇康 
嵇康係一代特別嘅思想家、文學家
係呢兩方面，都係魏晉嘅代表人物
更有趣嘅係，嵇康同時兼擅音樂、書法
真係一代風流名士嘅興趣 

《世說新語．容止》：
嵇康身長七尺八寸，風姿特秀。見者嘆曰：「蕭蕭肅肅，爽朗清舉。」或云：「肅肅如松下風，高而徐引。」山公曰：「嵇叔夜之為人也，巖巖若孤松之獨立；其醉也，傀俄若玉山之將崩。」

嵇康，字叔夜，譙郡銍人
父親早逝，幼年好學
大個之後有180cm咁高左右 
(經古代至現代換算大約係咁多啦)
嵇康靚仔到不得了
囡囡望到就話：哇同梁朝偉一樣呀！
仲要係高大版嘅梁朝偉，不得了 

另一位竹林七賢山濤就好gay咁講： 
嵇康份人，蒼勁挺拔
好似獨立於天下而不動嘅松樹咁
當佢飲醉，好似成座玉山將要崩塌咁
形容佢醉咗無哂力嘅形態 



《世說新語．棲逸》：
山公將去選曹，欲舉嵇康；康與書告絕。

嵇康之死，係可以睇出佢嘅人格美
中國自古以來嘅美學，都係美善合一
同西方可以將道德、美學二分唔同
大家睇中國古代人物一定要記得呢點啦！ 

當時嵇康受到司馬氏拉攏
但佢唔願意接受，遠避河東三年
後來返到山陽，山濤就為保嵇康安全
心生一計，推薦他出仕
if you can't beat them join them 

嵇康緊係唔接受，但又驚連累山濤
寫出〈與山巨源絕交書〉
故君子百行，殊途而同致；循性而動，各附所安。故有處朝廷而不出，入山林而不返之論。且延陵高子臧之風，長卿慕相如之節，志氣所托，不可奪也。 
成封信重點唔係罵山濤
而係批評成個時代黑暗嘅可怕 
做君子應該要遵重自己嘅「本性」、「志氣」
朝野咁敗壞，我寧願遠走山林
因為有呢封信，人地唔會怪罪山濤
絕交，可以係重情重義嘅決定 



《世說新語．簡傲》：
鍾士季精有才理，先不識嵇康。鍾要于時賢俊之士，俱往尋康。康方大樹下鍛，向子期為佐鼓排。康揚槌不輟，傍若無人，移時不交一言。鍾起去，康曰：「何所聞而來？何所見而去？」鍾曰：「聞所聞而來，見所見而去。」

鍾士季，即鍾會
佢當年久仰嵇康大名
想見識吓呢位型男嘅真面目 
點知去到見佢，嵇康無理佢
不斷咁打鐵，完全唔比鍾會面子 

鍾會係朝中貴公子
嵇康係在野反對文人
鍾會緊係估唔到人地會咁對佢啦
嬲到起身走人 
嵇康仲要串佢幾句：
你係聽咩人講我先要黎睇我？ 
鍾會就話：
我睇到當初要睇嘅人
已經夠啦，BYE！ 

嵇康呢份人剛腸嫉惡
又勇於對社會時事種種不滿直言
後黎鍾會為報當年輕視之仇
上書司馬氏，比咗個罪名嵇康 
順便解決埋呢個當政者嘅麻煩人物
「康上不臣天子，下不事王侯，輕時傲世，不為物用，無益於今，有敗於俗。昔太公誅華士，孔子戮少正卯，以其負才亂群惑眾也。今不誅康，無以清潔王道。」
好簡單黎講，係屈條罪比佢
政治假借道德判刑，唔需要合法 
亦都唔係合情合理
呢條死罪，只係當權者話事
「清潔王道」四字，豈非古今皆然？



《世說新語．雅量》：
嵇中散臨刑東市，神氣不變。索琴彈之，奏廣陵散。曲終曰：「袁孝尼嘗請學此散，吾靳固不與，廣陵散於今絕矣！」太學生三千人上書，請以為師，不許。文王亦尋悔焉。

嵇康即將處刑，泰山崩於前而面不改色
呢種，正係名士風骨 
三千太學生為嵇康求情、同悲
好似今日嘅學生團體為公義發聲
咁呢種手法，對暴政又點會有用呢？ 

嵇康同行刑人講：
時間未到，比我再彈一次琴啦！ 
滿場聽眾肅靜，餘下嵇康絕響
「當年好多人向我求學呢首曲調
可惜我都無教過佢地
從此之後廣陵散絕矣！」 

值得一提嘅係：
嵇康死時先得三十九歲 
佢係臨死前同九歲嘅仔講：
「巨源在，汝不孤矣。」
山濤係到，佢會好好照顧你架
事實山濤確實對佢個仔好好
絕交之後嘅交情，見證時代嘅扭曲 

蔣勳《孤獨六講》：
「有人說，嵇康怎麼這麼自私，死前還不肯將曲譜留下？但嵇康說，不是每一個人都配聽《廣陵散》。如果活不出孤獨感，如果做不到特立獨行，藝術、美是沒有意義的，不過就是附庸風雅而已。」
正係曲亡人亡，知音不復



《世說新語．棲逸》：
嵇康遊於汲郡山中，遇道士孫登，遂與之遊。康臨去，登曰：「君才則高矣，保身之道不足。」
呢到好似預言一樣 
嵇康以前去遊山玩水，見到孫登
孫登係一位當時出名嘅世外高人
呢位高人當時已經知道：
你嘅才華好高，可惜
可惜係呢個時代入面唔識保全自己 

或者嵇康真係唔識保全自身 
但亦都正因為佢一生嘅堅持、反抗
反而令死亡只係肉體滅亡
其精神、信念卻化為永恆嘅文化象徵
讓後世人欣賞、歌頌
廣陵散絕去，其精神卻千古長存