[古典文學入門（一）番外篇]簡介基本古典文學概念：重陽 兼讀陶淵明己酉歲九月九日

獨在異鄉為異客，每逢佳節倍思親。遙知兄弟登高處，遍插茱萸少一人。
——王維

文學離唔開社會變化 
幾乎所有一年一度嘅重要習俗、節日
都必然會涉及人嘅集體行為、認知
文學家善感，自然會係呢種日子寫下作品 

農曆九月九日，即重陽節
雖然呢個節日係近代已經唔太受重視
特別係其性質唔係娛樂，無法同商業結合
但係古代，重陽嘅意義係重大嘅 

《易經》中以六為陰，以九為陽
九九雙陽，故曰重陽
《西經雜記》：
九月九日，佩茱萸，食蓬餌，飲菊花酒，令人長壽。
既然係時間有神聖嘅意義
自然會連結去人最重要嘅生命
係呢日只要遵行儀式，就能長壽 

有關重陽最生動嘅起源記錄
係來自《續齊諧記》：
汝南桓景隨費長房遊學累年，長房謂曰：「九月九日，汝家中當有災。宜急去，令家人各作絳囊，盛茱萸，以繫臂，登高飲菊花酒，此禍可除。」景如言，齊家登山。夕還，見鷄犬牛羊一時暴死。長房聞之曰：「此可代也。」今世人九日登高飲酒，婦人帶茱萸囊，蓋始於此。
呢個故事相信大家都好熟
即係桓景跟住費長房呢位高人遊學多年
師父有日福至心靈，就同佢講：
你屋企大獲啦，九月九日有個災難 
放心，唔需要性交轉運
你快快手趕去，叫佢地帶茱萸囊
登高飲酒，就會無事架啦 

桓景真係照做，成家登山
返去之後，見到鷄犬牛羊全部死哂 
長戶房聽到就話：
佢地已經代替咗你擋住咗啦！ 
後世我地嘅重陽習俗，起於此

雖然呢個未必係真正起源
但故仔嘅影響力，應該係流傳最廣
登高、飲酒、祭祖、長壽、敬老……
慢慢不斷拓展，變成今日嘅重陽節 


陶淵明 己酉歲九月九日

靡靡秋已夕，淒淒風露交。
蔓草不複榮，園木空自凋。
清氣澄餘滓，杳然天界高。
哀蟬無留響，叢雁鳴雲霄。
萬化相尋繹，人生豈不勞？
從古皆有冇，念之中心焦。
何以稱我情？濁酒且自陶。
千載非所知，聊以永今朝。

點解呢首詩同重陽有關？
因為陶淵明已經寫到出哂面 
詩題：九月九日
非常明顯係因重陽而寫此詩

靡靡秋已夕，淒淒風露交。
蔓草不複榮，園木空自凋。
靡靡：零落

晚秋時份，一切盡顯零落之意
淒冷嘅風伴隨淒厲嘅風聲
草上嘅露水搖擺不定
蔓草衰敗，園木凋萎
陶淵明因眼前秋景，興起悲秋之情 

清氣澄餘滓，杳然天界高。
哀蟬無留響，叢雁鳴雲霄。
由近景至遠方
詩人舉目望天，只見蕭索 
清明嘅天空沒有半點灰塵
忽然覺得天空因而變得更高更遠
蟬聲已成絕響，取而代之
乃叢林中雁鳴雲霄

「哀蟬」之意
自然係連結至生命易逝
時光不可重來嘅悲哀
既有亡，自有生
然而雁鳴亦終有消失嘅一天 


萬化相尋繹，人生豈不勞？

呢邊涉及陶淵明現世主義嘅價值觀
世界嘅自然萬物不斷變化
根本無一固定、恆久嘅事物
咁樣嘅人生，又點會唔辛苦呢？ 

詩人由秋天外景嘅悲涼
加上九月九日重陽節重生命嘅傳統意義
連結至世間嘅芸芸眾生
陶淵明呢一反問，係好嚴肅架！ 
即係：人生嘅意義何在？
生命咁易消失，咁樣點好呢？

從古皆有冇，念之中心焦。
由古代至今，都係有冇
有，即生
冇，即死
有冇之間，變幻無數生命 

陶淵明面對人生意義之問
一如當下嘅現代人
都係「念之中心焦」
愈諗愈焦慮，愈焦慮愈難頂 

何以稱我情？濁酒且自陶。
千載非所知，聊以永今朝。

詩人唔係哲學家
陶淵明只信今生，不信來世
呢種現世主義，唯有隨遇而安
重陽飲酒，以酒消愁
或係長壽之因？ 

千年之後嘅事，唔到我理啦
「濁酒且自陶」、「聊以永今朝」
正係今朝有酒今朝醉
人生得意，緊係盡歡先啦！