器大者聲必宏，志高者意必遠。知夫聲與意之本原，則知歌詞之所自出。
——范開〈稼軒詞序〉
——范開〈稼軒詞序〉
稼軒 定風波(席上送范廓之遊建康)
聽我尊前醉後歌，人生無奈別離何！但使情親千里近；須信，無情對面是山河。
寄語石頭城下水。居士，而今渾不怕風波。惜使未成鷗鳥伴。經慣，也應學得老漁蓑。
詞題：席上送范廓之遊建康
范廓之，即范開，字廓之
范開係稼軒嘅重要門生
跟隨稼軒學習多年，情同父子
范開曾經收集稼軒嘅詞作
輯然後編，出版成書
開久從公游，其殘膏剩馥，得所沾焉為多。因暇日裒集冥搜，才逾百首，皆親得於公者。
范開編書之外，亦執筆寫序言
一篇〈稼軒詞序〉，成為研讀稼軒詞必讀一文
故其詞之為體，如張樂洞庭之野，無首不尾，不主故常；又如春雲浮空，卷舒起滅，隨所變態，無非可觀。無他，意不在於作詞，而其氣之所充，蓄之所發，詞自不能不爾也。其間固有清而麗、婉而嫵媚，此又坡詞之所無，而公詞之所獨也。
做咗門生咁耐，自然熟知老師
成篇文對稼軒詞有整體風格嘅論述
等我地今時今日可以由范開
呢位同一時代人嘅眼光睇稼軒詞
稼軒 定風波(席上送范廓之遊建康)
聽我尊前醉後歌，人生無奈別離何！但使情親千里近；須信，無情對面是山河。
既然呢首詞係有特定嘅情景、對象
我地就必須想像當時嘅情況：
首先，係「席上」酒宴送別門生
其次，稼軒係長輩，對後輩講嘢
呢兩個特定要素，係呢首詞彰顯出黎
上半片係席上送別范開，由情顯理
稼軒歡送范開，飲飽食醉
叫范開聽佢嘅高歌，作為離別之詞
人生呀！令人無奈嘅別離呀！
生離死別，係我地都必須面對嘅事
普通嘅詩詞可能就會繼續悲哀
但呢首詞入面嘅角色比較特別
因為稼軒既係長輩，自然唔可以咁灰啦
「但使情親千里近；須信，無情對面是山河」
張小嫻曾經寫過，廣為流傳：
世界上最遙遠的距離
不是生與死
而是我就站在你面前
你卻不知道我愛你
但原來早成千年嘅稼軒
一早已經用更加霸氣嘅句子
表達相近嘅意思
呢種「情」唔係單止愛情
友情、親情、師生之情皆可
重點在於「親」之一字
兩人之間Close唔Close唔係取決距離
形體再遠，情感依舊可以親近
王勃詩云：
海內存知己，天涯若比鄰。
秦觀詞曰：
兩情若是久長時，又豈在朝朝暮暮。
情感存在於心靈維度
唔係物理空間可以阻絕架！
好似我地同唔啱key嘅人傾計
真係會覺得話不投機半句多
即使呢位人兄係你面前
但同佢嘅心靈卻係好似隔住山河咁遠
無情之人，「對面」係物理空間
而心理嘅空間，彼此有如「山河」阻隔
呢種對比，先係最遙遠嘅距離
稼軒呢句真係好鬼入肉呀！
寄語石頭城下水。居士，而今渾不怕風波。惜使未成鷗鳥伴。經慣，也應學得老漁蓑。
石頭城：六朝嘅著名古城，遺址位於現清涼山一帶
下半片轉入寫自己，兼作勸勉
稼軒要范開代為傳話
因為范開係即將到建康，開始仕途
而稼軒呢，就做稼軒居士
以過來人嘅身分勸勉范開
「石頭城下水」，乃一隱喻
稼軒暗串緊果班仲係朝野嘅小人
係詞作之中，緊係唔可以明言啦
不過呢，「水」就會起風波嘅
「石頭城」曾係帝王建築，喻廟堂
兩樣都係指向朝中小人愛生風波
「居士，而今渾不怕風波」
因此稼軒先會講：
放心啦范開，我而家咩都唔怕
都係帶湖隱居做居士
仲怕呢班垃圾小人做咩？
「惜使未成鷗鳥伴。經慣，也應學得老漁蓑」
稼軒呢邊一再強調佢淡泊名利嘅人生態度
就算未做到鷗鳥嘅同伴，忘掉一切機心
至少過咗咁耐嘅隱居年用
都已經可以學到好似老漁夫咁平淡生活
稼軒下半片好似全部講緊自己
其實都係向門生范開展示唔同嘅人生方向
進則仕，退則隱，本來就係一體兩面
朝野險惡，只係得少數人飛黃騰達
就算將來仕途受挫，都唔會太灰
因為老師已經展示咗咩叫老子什麼都不怕啦！
No comments:
Post a Comment