[古典文學入門（四）ep.34]須信，無情對面是山河 辛棄疾講後記

相對我地之前講過嘅大文學家
陶淵明、李商隱、蘇東坡 
辛棄疾，稼軒詞係更加貼近香港人嘅心
因為我地面對嘅境況
係大環境，係普遍性黎講係好相似
文學斷不止怡情養性而已
本身即具有介入家國、反映社會之可能 

中國古典文學，同家國社會嘅連繫係緊密嘅
而呢一點，正係稼軒一生盡現 
四十三年，望中猶記，烽火揚州路。
北宋故土淪入金人之手
南宋偏安，日漸衰敗
天下英雄誰敵手？曹劉。生子當如孫仲謀。
漢奸無數，當權者不思進取
稼軒縱然文武雙全，依然無力回天 
待燃犀下看，憑欄卻怕，風雷怒，魚龍慘。 
忠貞一生，為國為民
卻落得無數小人中傷，降職罷免 



近日同朋友傾計講到中文教學 
講到考試必然用到嘅萬用字：「懷才不遇」
成日聽到呢四個字可以概括哂一切咁
但係呢種講法只係大體而言，濫用係好危險架！ 
「士不遇」之中，又有幾多唔同嘅呈現？
陶淵明嘅不遇，又點可以同辛稼軒相提並論？
當我地習慣於考試方式嘅概括
亦代表失去更進一步閱讀，發現唔同嘅可能
文學貴乎人，若如僵屍，不如不讀 

而家我地都知，稼軒係多元面向嘅人
家國之外，愛情、田園都係詞中不斷出現
理想受阻，稼軒並非一成不變嘅僵屍 
佢以各種唔同嘅出路，突破困境
溪邊照影行，天在清溪底。天上有行雲，人在行雲裏。
我見青山多嫵媚，料青山、見我應如是。
田園之夢，反映其名士風貌
人與自然，又何曾在中國古代分離？ 
倩何人、喚取紅巾翠袖， 搵英雄淚？
眾裏尋他千百度。驀然回首，那人卻在，燈火闌珊處。
英雄美人，豪情尚需溫柔鄉
成家之後才能立業，群體必先有個人 



但使情親千里近；須信，無情對面是山河。
稼軒之句，何嘗唔係作者與讀者之間嘅距離？
我相信，閱讀唔單係純粹理性嘅思辨
更重要嘅係情感嘅連繫，主客嘅融合
透過三十多篇嘅文，我地同稼軒
你同我之間，亦都有「千里近」之感
人生許許多多嘅影響，往往來自千里之外 

談不盡嘅稼軒，談不盡嘅文藝 
稼軒自然有更加豐富嘅面貌，留待有心人更進一步閱讀
但願我給你嘅鎖匙有用，可以幫你開到呢道大門
曲終人不散，我依然會繼續講古典文學 
文學離唔開人，一個又一個驚世嘅文學家，先係核心
透過認識佢地，一篇又一篇嘅作品，先可以深入文學
呢一道門，或者唔係最好嘅
但我保證，呢一道門，永遠為有心人而開  

呢邊再放一次我開嘅blog，方便重溫：
http://deliver90.blogspot.tw/
最後請有心支持文藝嘅文友記得Like one like：
https://www.facebook.com/%E5%BE%B7%E5%B0%BC%E6%80%9D%E5%8C%96-1410350102358414/?ref=bookmarks