德尼思化粵文港: [現代藝術入門（一）ep.20] 細讀夜間咖啡館跟住梵谷沉淪係地獄漩渦之中

從夜晚露天咖啡座呢幅充滿詩意嘅畫感受出梵谷最根本嘅寂寞
另一方面不安嘅感情都同樣從另一幅畫反映出黎

夜間咖啡館The Night Café

同樣係情感大爆發嘅9月作品，同樣係咖啡館
但大家要知道此咖啡館不同彼咖啡館
網絡上，甚至有書籍都會講呢兩幅作品係同一間啡咖館，分別繪畫咖啡館室外同室內嘅作品
但實際上係兩間唔同嘅咖啡館黎！ :-[

雖然梵谷係作品名上無寫明邊間打邊間
分別係
「夜間咖啡館The Night Café」同埋「夜晚露天咖啡座Café Terrace at Night」
梵谷係信上描述過夜間咖啡館係佢屋企附近，離車站好近

所以有啲地方/網站為左方便分辨兩者，會係作品名加上The Night Cafe in the Place Lamartine in Arles
而夜晚露天咖啡座嘅英文就只會叫Café Terrace at Night

名中嘅in the Place Lamartine in Arles就係指名係拉馬丁廣場(Place Lamartine)
亦都係梵谷黃色房屋嘅地點

係Google Map可以見到露天咖啡館現址同拉馬丁廣場有一段距離
所以唔好以為兩間咖啡館係同一間

另一點就係兩幅畫嘅風格差距太大，唔會係同一間咖啡館會出現嘅氣氛
你會感受到夜晚露天咖啡座比較上明朗正面啲，亦都見到部分客人身穿西裝，有侍應服務食客。
相反夜間咖啡館成個氣氛都怪怪地，人流疏落，有種死氣深深嘅感覺
中間仲要有張鬼咁大嘅桌球枱，後面個男人呆滯咁直望觀者
兩者差天共地

講返今次嘅主角先 #good#

The Night Café, 1888, Van gogh

呢幅畫第一眼睇落去奇奇怪怪咁，硬係睇得唔舒服 xx(

桌球枱、白衣男、吊燈嘅光線、特大嘅時鐘、四散嘅客人、天花同牆壁嘅對比色等等
整個環境彌漫住不祥嘅氣息 #oh#

梵谷係信向佢細佬西奧描述過位於拉馬丁廣場嘅呢間咖啡館
「這就是他們在這裡的所謂午夜咖啡館…夜遊者如果付不起住宿費，或爛醉如泥，到處被拒之於門外，都可以在這裡落腳。我想在這幅畫中…表現咖啡館是一個使人墮落，喪失理智或犯罪的地方。因此，我選用淡紅、血紅、酒糟色，與路易十五綠、石青、橄欖綠及刺眼的青綠形成強烈對比…造成一種氣氛，好似魔鬼的硫磺火爐，以表現下等酒店裡暗的力量。這幅畫中的咖啡廳，是個可能令人身敗名裂、精神錯亂、甚至犯下罪行的場所，我努力想把這一切呈現出來。人們沉淪在地獄漩渦般的氣氛中。」

係呢段文字可以好完整咁了解到梵谷對呢間咖啡館嘅感受
係一種暗嘅力量，係指一啲人生上嘅負面狀態
呢間咖啡館流連嘅每個人，都擁抱住各自嘅寂寞同不安渡過每一個夜晚
但梵谷自已又想借呢間咖啡館講嘅咩呢

要深入了解佢嘅作品，我地就要先理解佢畫中嘅一草一木

先從構圖入手
作品用左高視點嘅單點透視，消失點定係門口方向，強調出店內緃深感
地板同桌球枱等嘅長線條引導視線向裏面
令整體畫面產生拉力引導去門口方向

我地先睇左最中心嘅桌球枱同企係旁邊嘅白衣人
呢兩樣野都非常搶眼，不過唔單止講緊係形體上
更多程度係指佢地嘅怪異上嘅搶眼
正中央嘅桌球枱係成幅畫最大嘅物件，而且用相對多嘅粗黑線去畫
(粗黑線係梵谷一直以黎常用於表達力量、重點時所用)
佢嘅存在形同冷冰冰嘅手術枱，或者係一副巨大嘅棺材
無論係形容係咩都好，感覺都係負面、怪異、冷漠，而且同外界分離 :-(

除次之外，大家仲要留意埋桌球枱經過上方吊燈所投影出黎異常巨大嘅影子
呢個影係成間咖啡館唯一清晰嘅影子，可以見到影子同地板嘅顏色差距好大
而其他嘅影係一整片咁表達，而且色彩上嘅差異都只係隱約表現

另外一樣就係桌球枱旁邊企係到嘅個位白衣人兄
其實佢係呢間咖啡館嘅老闆，梵谷因為成日黎所以同老闆兩公婆好熟
老闆可能覺得梵谷既然畫我間鋪，作為老闆嘅當然要畫埋入去

不過梵谷畫到佢無黎精神，仲奇奇怪怪咁望住我地 [sosad]

老闆企係桌球枱旁邊顯得格外細小，弓起背咁企係到，神情悲傷呆滯
而且動作僵硬，一動不動咁直視住我地 @_@

有趣嘅係梵谷好似畫到老闆無左隻腳咁，照計一個人隻腳唔會咁短
我自己覺得梵谷係想保護桌球枱嘅完整性而唔畫隻腳
感覺上桌球枱係呢幅畫入面有佢重要嘅地為，可能係畫作核心思想之一
梵谷為左突顯佢嘅重要性，放置中央，用特粗黑線去畫，誇張嘅影子。
呢幾樣野成為一個個體，而係呢個範圍之內如果出現一啲比本體搶眼嘅野，會破壞桌球枱嘅整體性同觀者對該事物嘅集中

不過呢啲都只係我個人過份嘅猜想
或者只係梵谷唔記得幫佢畫返隻腳，又可能老闆真係咁腳短 [sosad]

大家又會點睇呢個位呢？

而四散係外圍嘅客人從信中得知係墮落、喪失理智、犯罪嘅人
梵谷借佢地去表達環境背景嘅一切，呢間係一間點樣嘅咖啡館
亦都話左比我地知，梵谷自己都係佢地嘅一員

另外上半部係天花、牆壁同吊燈組成
呢個部分黎講，其實吊燈存在本身無咩特別
但特別在於圍繞住吊燈旁邊嘅光暈，呢啲光暈令到呢幾個吊燈存在得更鮮明，甚至係呢幅作品中躍升到核心位置
呢啲光暈圈渲染住吊燈所放射出黎嘅光線，而背後嘅血紅色牆身更突顯到光線嘅影響力，完全可以同下方嘅桌球枱媲美
吊燈完全照亮整個咖啡館，有如天上嘅星星

無錯啦！呢啲吊燈嘅光暈就係梵谷後期星夜嘅前身
經過夜間咖啡館之後，梵谷大多數嘅星光都會用呢種手法去表達 #adore#

背後嘅牆壁同天花用左紅同綠形成好強烈嘅對比
上集都講過梵谷好鐘意用互補色，今次嘅紅綠就係其中一組
呢種咁強烈嘅對撞唔單只增加色彩的顯性，同時會產生排斥感
係呢幅畫入面就更加產生出不安同反感
當你睇呢幅畫嘅時候，視線會比紅色拉得好緊要，而且綠色係視覺上感覺基本好弱
係畫面上有咁大片紅其實好難去駕馭，再加梵谷直接放綠色係佢上面，感覺就更強硬
不過梵谷係有安排過，紅綠呢組顏色咁強硬嘅撞擊之中，梵谷用左好多黃色去作為緩衝，再安排大量而細小嘅綠去穩定畫面，呢啲綠更令到紅色係呢幅畫入面無出顯得咁猖狂

成幅畫嘅色彩關係就係，梵谷用紅綠呢組互補色帶黎嘅撞擊去營造暗嘅力量
但過於強硬嘅對撞必然唔會有好結果，所以梵谷就強化左咖啡館嘅光線，係牆嘅前景加入吊燈嘅黃色光暈去抑壓牆身嘅血紅色。再加上係整個畫面安排大量嘅綠去做調和，全幅畫嘅陰影部分都係由綠去組成
你可以見到不論係燈光、地板、衣物、枱櫈、影子，全部都滲透住不同程度嘅綠出黎

呢一格，可以體現到無處不在嘅綠
地板、酒吧枱、酒樽、花樽、桌球枱、門後嘅鏡/窗、客人嘅裙、燈光
全部都畫左唔同程度嘅綠上去

佢連吊燈所發出嘅光都加上綠色，甚至乎老闆個件白色嘅衣服都係有摻雜一啲綠
呢啲綠係一個安排，係有計劃咁平衡畫面而用
當仔細咁睇顏色，你會發現梵谷係呢幅畫玩嘅顏色好有趣，掌握得好好
紅色集中霸道，極度強硬；綠色分散柔和，非常配合
呢幅畫嘅對比唔係硬碰硬所帶黎嘅反感，但你仍然會有少許咁嘅感覺

最後要注意一下嘅係後面嘅花同大鐘
大鐘有人認為意解梵谷對自己感到時間無多，因為呢幅畫嘅背景再加上呢個鐘異常巨大，不過我覺得係無從考究，而且比例從來都係梵谷嘅弱項，所以我唔太認同 xx(

另一樣就係酒吧上嘅花
首先係佢比較上巨大，但唔係重點
重點係梵谷畫佢嘅仔細程度

呢束花放大黎睇嘅時候，你會見到來回修改過好多筆
而且係光影處理上比起畫中其他事物都係黎得迂迴
或者呢束花就係梵谷係呢幅畫嘅一個出口
係咁不安咁無希望嘅環境之下唯一出路
就好似佢當時嘅狀態咁，黎到新環境無變得更好，反而令自己墮落，就如同呢間咖啡館嘅其他客人一樣，係墮落係喪失理智係犯罪
梵谷自己其實係呢個月而已到左極限，佢開始忍受唔到呢種狀態
一路以黎畫嘅畫都得唔到應同，細路又叫佢轉風格，唔係就無人買
自己又搵唔到知心好友，理解佢應同佢
再加上家族遺傳嘅精神病一直困擾住佢
係咁痛苦嘅環境下就只有不斷畫畫
睇哂成幅畫之後，好感受到梵谷係畫中表達情感嘅能力上非常出眾
特別係同一個月份同樣係咖啡館作主題，但兩幅有如此大分別嘅作品

今次呢幅夜間咖啡館就係梵谷當時狀態嘅寫照
佢係想話比我地知佢都只係咖啡館其中一個客人
佢都係墮落係喪失理智係犯罪
都係沉淪在地獄漩渦般的氣氛中
正中間嘅桌球枱就好似一個棺材咁，老闆就如同一個地獄守門員
看守住呢間進入地獄入口嘅咖啡館
呢副棺材就係準備比梵谷
不過好在呢個時候有一個人拯救左梵谷
呢個人和同梵谷同樣係後印象派，係之後又帶起左綜合主義嘅畫家