齊虜巧負國，赤手領五十騎，縛取於五萬眾中，如挾毚兔，束馬銜枚，間關西奏淮，至通晝夜不粒食。壯聲英概，懦士為之興起，聖天子一見三嘆息，用是簡深知。
——洪邁《稼軒記》
——洪邁《稼軒記》
係未入正題講詞作前，先講講稼軒嘅英雄事跡
稼軒係打得又寫得，正職軍人，副業文人
范開《稼軒詞序》：「公一世之豪，以氣節自負，以功業自許。」
稼軒一生志向，都係為國捐軀，血戰沙場
如果咁睇，稼軒人生最光榮嘅時刻，係青年
文學，多數係生命有餘裕先寫
如果成日行軍打仗，仲點樣寫上百首詞呢？
稼軒寫詞，九成九都係投閒置散嘅日子
唯有少年起兵反金，先係稼軒最想做嘅事
呢個正係今日點解我地放大呢件事黎講
我地下篇會再概括稼軒生平
唯獨少年呢件三國無雙式傳奇故事
不得不講，不可不說
連大陸都曾經拍過套《辛棄疾鐵血傳奇》
就係以辛嘅少年事跡改編出黎
辛棄疾 美芹十論序言
虜人憑陵中夏，臣子思酬國恥，普天率土，此心未嚐一日忘。臣之家世，受廛濟南，代膺閫寄，荷國厚恩。大父臣贊，以族眾，拙於脫身，被污虜官，留京師，歷宿、毫，涉沂、海，非其志也。每退食，輒引臣輩登高望遠，指畫山河，思投釁而起，以紓君父所不共戴天之憤。常令臣兩隨計吏抵燕山，諦觀形勢，謀未及遂，大父臣贊下世。粵辛巳歲，逆亮南寇，中原之民屯聚蜂起，臣常鳩眾二千，隸耿京為掌書記，與圖恢復，共籍兵二十五萬，納款於朝。不幸變生肘腋，事乃大謬。負抱愚忠，填鬱腸肺。
稼軒寫美芹十論，係一部兵書
取名美麗嘅芹菜，送比皇上
意思係話青菜魚肉，各有所好
希望我主張反攻金人，你會鍾意啦
呢部書嘅序入面，有講返自己嘅生世經歷
辛棄疾係山東出世，果時山東已經被金人佔領
老豆好早死，同祖父辛贊相依為命
「大父臣贊，以族眾，拙於脫身，被污虜官，留京師，歷宿、毫，涉沂、海，非其志也」
辛贊本身係南宋進士，佢決定要做無間道臥底！
三年又三年，辛贊係金人統治下做官
「每退食，輒引臣輩登高望遠，指畫山河」
祖父日日都同辛棄疾講：
呢片土地本來係我地宋朝自古以來嘅土地
神聖不可侵犯但竟然比金狗霸佔
睇吓個地形，我地總有一日會反攻架！
祖父仲派辛棄疾兩度考金人科舉
只係為北上時，探聽金人重要嘅情報
辛棄疾受祖父影響，以抗金為終生志業
係二十一歲，機會終於黎啦！
雖然祖父已經仙去，但意志傳遞比辛棄疾
二十一歲，金兵再次南侵南宋
辛棄疾借此機會，決定起兵反咬金人一口
「中原之民屯聚蜂起，臣常鳩眾二千，隸耿京為掌書記，與圖恢復，共籍兵二十五萬」
領導家鄉二千幾人，加入二十幾萬人嘅反金大軍
耿京做領導，辛棄疾做掌書記
仲派辛棄疾同南宋連繫，以求夾擊金人
南宋皇帝好開心，叫佢地返黎南京先
「不幸變生肘腋，事乃大謬」
辛棄疾諗住返去同耿京報告果陣
有個叛徒張安國殺害耿京
仲劫持義軍投降金人呀！
齊虜巧負國，赤手領五十騎，縛取於五萬眾中，如挾毚兔，束馬銜枚，間關西奏淮，至通晝夜不粒食。
辛棄疾緊係勁嬲，怒氣值爆到開無雙
無錯，佢係真係好似我地玩三國無雙咁
一個人，領帶五十名親兵夜襲敵營
直插金人五萬士兵嘅軍營，縛住張安國
連日快馬趕返去南宋首都建康
交由朝廷，將呢位賤人斬首示眾！
「壯聲英概，懦士為之興起，聖天子一見三嘆息」
呢種少年嘅英雄氣概，唯有辛棄疾
無數嘅人歌頌，連皇帝都賞識
二十三歲嘅佢，或者無諗過
自己嘅鐵血傳奇，已經由此結束
不幸中嘅大幸，詞中之龍嘅傳奇正式開始
No comments:
Post a Comment