金風玉露一相逢，便勝卻人間無數。
——秦觀
——秦觀
七夕源起周朝，中國重要嘅愛情象徵
牛郎織女嘅故仔，相信大家都知
《詩經·小雅·大東》：
維天有漢，監亦有光。跂彼織女，終日七襄，雖則七襄，不成報章。睆彼牽牛，不以服箱。
最初其實都係講緊天邊各有一顆小星星
文人多情，慢慢加唔少故仔
最經典嘅代表，當然要數漢代嘅：
古詩十九首之一
迢迢牽牛星，皎皎河漢女。
纖纖擢素手，札札弄機杼。
終日不成章，泣涕零如雨。
河漢清且淺，相去復幾許。
盈盈一水間，脈脈不得語。
兩位神仙，牛郎織女分隔兩地
七夕先可以一年一會
詩人賦予中國古代婦女嘅特質
等待、忠貞、閨怨
男性往往係缺席
因為中國想像嘅感性愛情
係以想像女性嘅陰柔為主
男性要陽剛，要離開
先可以令許多愛情詩詞有發揮空間
《荊楚歲時記》：
天河之東有織女，天帝之子也，年年織杼勞役，織成雲錦天衣。天帝憐其獨處，許嫁河西牽牛郎。嫁後，遂廢織紉。天帝怒，責令歸河東，唯每年七月七日夜渡河一會。
由古詩十九首之一開始
中國文人極愛以七夕為題材創作
原因無他，呢種愛情想像
男女分隔兩地，彼此思念
係中國古代咁多戰亂動亂交通不便嘅地方
係非常普遍，牛郎織女代表無數愛情
好似詠月之作咁
七夕題材嘅詩詞累積，好多佳作
稼軒 綠頭鴨(七夕)
歎飄零，離多會少堪驚。又爭如、天人有信，不同浮世難憑。占秋初、桂花散采，向夜久、銀漢無聲。鳳駕催雲，紅帷卷月，泠泠一水會雙星。素杼冷，臨風休織，深訴隔年誠。飛光淺，青童語款，丹鵲橋平。
稼軒呢位多情嘅詞人
又點會唔係七夕創作入面添上詞作呢？
好有趣嘅係，上連講過嘅愛情詞
我地可以見到一脈相連嘅主題
上半片先講人世嘅愛情普遍情況
中國古代嘅愛情，往往「離多會少」
遊子飄零在外，佳人私閣守候
呢種愛情咁多挑戰，令人「驚」懼
點比得上牛郎、織女守信
千千年年，一如往昔，彼此守候
稼軒此一對比，深知人間愛情「難憑」
秋初七夕，桂花四散而開
凝視天上銀河，沒有絲毫聲音
詞人想像：
仙人坐著鳳駕相會
催雲、卷月，急於見面
銀河之恆長，雙星終於連繫
唔好再織啦！
呢到可以連結中國男耕女織嘅忙碌
但談情說愛，往往係不務正業
嫁後，遂廢織紉。天帝怒，責令歸河東，唯每年七月七日夜渡河一會
將一年嘅思念，深深訴說吧
赤色喜鵲，天上仙童，為情人守候平和
看人間爭求新巧，紛紛女伴歡迎。避燈時、彩絲未整，拜月處、蛛網先成。誰念監州，蕭條官舍，燭搖秋扇坐中庭。笑此夕、金釵無據，遺恨滿蓬瀛。欹高枕，梧桐聽雨，如是天明。
下半片再入仙境、俗世
理想、現實之對比
顯出稼軒對愛情理想之期盼
以及反觀現世之失落
兩者對比，正係此詞嘅特別
中國七夕婦女會向織女乞求智巧
希望日後相夫教子，姻緣美滿
家家乞巧望秋月，穿盡紅絲幾萬條
人間個個都係速食男女
換畫隨時快過食杯麵
只求新求巧，根本唔知咩叫真情
「彩絲未整」、「蛛網先成」
稼軒似乎由此轉入個人嘅悲情
「誰念監州，蕭條官舍，燭搖秋扇坐中庭」
又有邊個掛住我呢？
稼軒又想邊個掛住佢呢？
「笑此夕、金釵無據，遺恨滿蓬瀛」
金釵乃定情信物之象徵
白居易詩曰：
唯將舊物表深情，鈿合金釵寄將去
而稼軒係到自笑
我地嘅信物，係咪真係可以守信？
答案似乎不言而喻
先會有「遺恨滿蓬瀛」之句
有冇試過享受自己嘅悲情
深夜無人之時，訓係床上
不斷陷落於回憶、幻想、可能
溫庭筠：
梧桐樹，三更雨，不道離情正苦。一葉葉，一聲聲，空階滴到明
稼軒由仙人對比生出個己悲情
雨滴點點，勾起無數愁緒
「如是天明」，七夕無眠
No comments:
Post a Comment