陳同甫與稼軒為友，其人才相若，詞亦相似。
——劉熙《藝概》
——劉熙《藝概》
辛稼軒、陳亮嘅友誼
一直都係文人之間嘅佳話
自古有言，文人相輕
但佢地嘅友誼，係呢種講法嘅反例
陳亮係好有才學嘅士人
但佢成世仔，都未正式做過官
考試失敗，上書皇帝都唔被起用
六達帝廷，上恢復中原之策；兩譏宰相，無輔佐上聖之能。
好大原因因為陳亮同辛一樣，都係主戰派
既然同是天涯淪落人
稼軒同陳亮當然係志氣相投啦！
稼軒罷居隱居帶湖無耐
老友陳亮就黎搵佢傾計，吹吓北伐之事
佢地共遊鵝湖，史稱鵝湖之會
鵝湖之會有兩次
第一次係朱熹、陸九淵
呢場係學術辯論，拗足三日
第二次係稼軒、陳亮
玩足十日，純係文學家遊山玩水
稼軒 賀新郎(把酒長亭說)小序
陳同甫自東陽來過余，留十日。與之同游鵝湖，且會朱晦庵於紫溪，不至，飄然東歸。既別之明日，余意中殊戀戀，復欲追路。至鷺鷥林，則雪深泥滑，不得前矣。獨飲方村，悵然久之，頗恨挽留之正是遂也。夜半投宿吳氏泉湖四望樓，聞鄰笛悲甚，為賦《賀新郎》以見意。又五日，同甫書來索詞，心所同然者如此，可發千里一笑。
稼軒、陳亮同游鵝湖
本身約埋朱熹係紫溪相會，但佢無黎
離別之時，稼軒依依不捨
仲想追返陳亮轉頭
可惜積雪太深啦，追唔返男朋友
訓覺聽到人地吹笛，勾起思念
寫下一首詞作
五日之後居然陳亮寫信叫佢寫返首詞
真係心有靈犀一點通呀！
憩鵝湖之清陰，酌瓢泉而共飲。長歌相答，極論世事。
呢次聚會，引出五首詞作
第一首稼軒先寫
第二首陳亮回應稼軒
第三首稼軒又寫比陳亮
第四、五首都係陳亮寫比稼軒
為中國詞史一大美事盛事
辛稼軒 賀新郎(同甫見和再用韻答之)
老大那堪說。似而今、元龍臭味，孟公瓜葛。我病君來高歌飲，驚散樓頭飛雪。笑富貴千鈞如發。硬語盤空誰來聽？記當時、只有西窗月。重進酒，換鳴瑟。
元龍：三國陳登之字，以天下為己任留名青史
孟公：西漢西遵之字，好飲酒、交友
五首作品，我地講第三首
佢地五首都用同一詞牌，同一韻腳
呢五首詞甚至連寫作套路都非常接近
例如會用人名、典故開頭比喻彼此
看淵明、風流酷似，臥龍諸葛
稼軒第一首就話陳亮可比陶淵明
陶淵明高潔嘅形象，呢個當然係讚美啦
上半片高歌二人豪邁嘅友情
我地兩個都年紀唔細啦
但似乎無留下咩功業值得講
不過我地至少一直以天下為己任
又熱衷飲酒吹水
真係臭味相投，非常麻甩
「我病君來高歌飲，驚散樓頭飛雪」
呢句稼軒寫得一絕
此病當然唔係話生理嘅病
而係講緊小人中傷，忠而受謗之病
稼軒初嘗隱居，陳亮隨即到來
令稼軒有如飛雪不絕寒冷之悉愁緒
全部都因陳亮嘅高歌暢飲而驚散！
得友如此，夫復何求？
「笑富貴千鈞如發。硬語盤空誰來聽？」
稼軒、陳亮，既有共同志向
自然唔會當富貴榮華係一件事啦！
有人當名利係千鈞之重
佢地笑看名利如一髮之輕
硬語盤空，出自韓愈：
橫空盤硬語，妥貼力排奡
呢種硬而有力嘅語言
呢種與世不容嘅主張
又有邊個黎聽呢？
此一設問，引出下句
稼軒經過咁多事，自然心知無人來聽
唯一例外，陳亮
因此稼軒心中浮現嘅情景
除你我二人，只得月光從西窗透入
只得高潔明亮嘅月光願意傾聽
再飲一杯酒，再彈一首曲
寂寞人生，人生寂寞
事無兩樣人心別。問渠儂：神州畢竟，幾番離合？汗血鹽車無人顧，千里空收駿骨。正目斷關河路絕。我最憐君中宵舞，道：男兒到死心如鐵。看試手，補天裂。
渠儂：吳語對他人嘅叫法
下半片直述家國之激情
人間百事，係有對錯之分
但因為人嘅主觀而令對錯混淆不分
呢邊稼軒緊係串緊主和派啦！
問你地：
神州大陸嘅歷史
已經經歷幾多次嘅分分合合？
而家你地將汗血寶馬用黎拉鹽車
可以日行千里嘅人才到死都無發揮
呢邊當然係講緊稼軒、陳亮嘅不遇
亦係中國士人「士不遇」嘅文化命限
呢種不遇，更加係家國敗亡嘅預言
「正目斷關河路絕」
你地呢班當權者正垃圾
係到眼送緊家國嘅未來
回歸中原故土嘅關河阻斷
回歸中原故土嘅道路隔絕
你地到底見唔見到？
「我最憐君中宵舞，道：男兒到死心如鐵」
呢邊稼軒同陳亮表白：
係如此困境之中，我最憐惜嘅係你
《晉書．祖逖傳》：
「與司空劉琨均為司州主簿，情好綢繆，共被同寢。中夜聞荒雞鳴，蹴琨覺曰︰『此非惡聲也。』因起舞。」
中宵舞，即指聞雞起舞，志向遠大
陳亮係仕途、人生遠比稼軒不幸
一生從未當官，受重用前隨即病亡
窮到連幫自己老母搞莽禮都無錢
兩次因事入獄，差少少命都無埋
而係稼軒眼中，陳亮正係汗血千里馬
不論才情、學識、志向都唔比佢差
稼軒最欣賞陳亮成日講：
為國報效之心，到死都唔會改變
男人為理想、為志向之堅持
就係鐵咁堅硬，終生不改
「男兒到死心如鐵」，乃宋詞名句
《論衡 ·談天篇》載：
共工與顓頊爭為天子不勝，怒而觸不周之山，使天柱折，地維絕。女媧煉五色石以補蒼天，斷鰲足以立四極。天不足西北，故日月星辰移焉，地不足東南故百川注焉。
古有女媧補天裂，挽救世界於危難
稼軒以神話為喻
正因南宋亦係危急存亡之際
「看試手，補天裂」
經綸之手，治國良才
且看我地點樣一補家國之天裂！
稼軒、陳亮，友情留名千古
兩塊硬鐵交響出詞史豪邁嘅高歌
身處不受重用嘅時代
卻不至沉淪於悲哀，不能自拔
依然充滿男人嘅激情
真係頂天立地男子漢，好鬼MAN呀！
No comments:
Post a Comment