除論客所佩服的「悠然見南山」之外，也還有「精衛銜微木，將以填滄海，刑天舞干戚，猛志固常在」之類的「金剛怒目」式。在證明著他並非整天整夜的飄飄然。這「猛志固常在」和「悠然見南山」的是一個人。倘有取捨，即非全人，再加抑揚，更離真實。
——魯迅《且介亭雜文二集·題未定草六》
.jpg)
——魯迅《且介亭雜文二集·題未定草六》
咩話，陶淵明點會係「金剛怒目」？
明明中學上堂都無提過架！
如果有興趣係可以睇返我以前嘅文章：
陶淵明金剛怒目之姿
http://deliver90.blogspot.tw/2017/02/blog-post_1.html
包保你認識陶淵明更加具體嘅面目
如果細數六百二十九首稼軒詞
會發現入面高達九十二首都有陶淵明嘅典故
稼軒對陶淵明嘅愛，真係可比東坡
我地一定要問：
點解稼軒會咁鍾情陶淵明？
第一，陶淵明之文化影響力急升
至唐宋兩代，陶淵明愈黎愈受人重視
當中最重要嘅推力，緊係蘇東坡
成個文化環境，身邊嘅人都勁讚陶淵明
每位士人都欣賞佢嘅平淡、自然、豁達
潛移默化，自然推崇陶淵明啦
第二，稼軒發掘陶淵明用世之心
常人都係歌頌陶淵明嘅達觀、平淡、自然
但稼軒睇到，陶淵明少年深受儒家影響
壯年亦曾經積極出仕，為國效力
又因官場黑暗，中年退隱田園
如此種種，唔係同稼軒人生相似？
陶淵明係田園生活過得咁開心
自然令被迫退隱嘅稼軒，想多多學習啦
不過我地都知稼軒難學陶之退隱快樂
但係外在環境，根本無得你唔退
咁稼軒嘅學陶、睇陶，自然偏向用世之思
亦都係著重於陶淵明與官場割裂之陣痛
金剛怒目，唔係好啱稼軒咩？
稼軒 水調歌頭(九日遊雲洞和韓南澗尚書韻)
今日復何日，黃菊為誰開？淵明謾愛重九，胸次正崔嵬。酒亦關人何事，政自不能不爾，誰遣白衣來。醉把西風扇，隨處障塵埃。
為公飲，須一日，三百杯。此山高處東望，雲氣見蓬萊。翳鳳驂鸞公去，落佩倒冠吾事，抱病且登台。歸路踏明月，人影共徘徊。
崔嵬：塊壘，指胸中鬱積嘅不平之氣
政：同正，指因為之意
詞題：「九日遊雲洞和韓南澗尚書韻」
稼軒同朋友韓元吉去雲洞玩
故特寫此詞記之
韓元吉係稼軒嘅好朋友
同係主戰派，志氣相投
上半片先因菊花，引出陶淵明
正所謂：陶淵明獨愛菊
稼軒眼見此地菊花盛放
忍唔住問，佢地為咗邊個而開呢？
菊乃君子之花，象徵高潔
自然會聯想到陶淵明啦！
「淵明謾愛重九，胸次正崔嵬」
有趣嘅係，呢一問一答
竟然唔係走向高潔者退隱之樂
而導出陶淵明胸懷不平之氣
陶淵明愛重陽，愛菊花
係因為世道黑暗，唯有自持高潔
係對人世種種嘅反抗！
點解陶淵明咁鍾意飲酒？
因為佢不得不如此，為世所迫
稼軒嘅想像係咁：
白衣之人不斷向陶淵明送酒
以酒解愁，以酒麻醉身心
「醉把西風扇，隨處障塵埃」
醉中攞起扇搧風
將世間嘅塵埃落障礙
一一吹走，力抗俗世
暗示果堆主和派都係垃圾
為公飲，須一日，三百杯。此山高處東望，雲氣見蓬萊。翳鳳驂鸞公去，落佩倒冠吾事，抱病且登台。歸路踏明月，人影共徘徊。
翳：翼
驂：一車三馬
下半片先係入返詞題
為韓元吉飲三百杯
相知相重，同陷哀世
李白《襄陽歌》：
百年三萬六千日，一日須傾三百杯。
酒，連繫上半片
都大有以酒解愁之意味
兩人共望東邊高處
蓬萊，當然指涉神仙典故啦
仙家即朝廷，常見嘅古典比喻
「翳鳳驂鸞公去，落佩倒冠吾事，抱病且登台」
鳳毛之車蓋，三隻神鳥拉車
呢邊指韓公遠去，陣容盛大
韓元吉在朝當官，而稼軒罷官隱居
因此自言落佩倒冠，罷職在家
強烈嘅對比，再加自憐：
我抱病都要登台，送你歸去
「歸路踏明月，人影共徘徊」
韓元吉既走，得返稼軒
明月高照，顧影自憐
加上罷官、抱病
上連陶淵明之朝野不堪
一再強調自己嘅人生悲劇
友人尚能出仕，如返仙家
而自己咩都做唔到
我地不妨可以當呢種自我嘅戲劇表演
唔知稼軒似乎想演出比有心人睇
言外之意，值得玩味
No comments:
Post a Comment