[古典文學入門（二）ep.16]「沈淪下僚」的羈緒之聲 讀李商隱宿晉昌亭聞驚禽詩

之前講過，李商隱成世仔仕途不利
終其一生，都係「沈淪下僚」
即係成世仔都無做過咩高官
做人地手下居無定所，遠去異地

今次講嘅呢首詩，正正講緊呢樣嘢
李商隱因為要做東川節度使
要離別屋企，去到雲南果邊嘅鄉下地方呀
李商隱離開之前，去同令狐綯告別（即令狐楚個仔）
詩題中「晉昌亭」就係令狐綯嘅住處啦

宿晉昌亭聞驚禽
羈緒鰥鰥夜景侵，高窗不掩見驚禽。

鰥鰥：魚目，意指睜眼不閉

李商隱與令狐綯就好似兄弟咁一齊長大
係一對好好嘅朋友，令狐綯都成日幫佢
從詩題可見，李去同令狐告別 
就「宿」係「晉昌亭」，發生「聞驚禽」一事

「羈緒」係咩呢？
古人成日用羈旅表達寄居他鄉的旅人
而李商隱雖然仲未動身，但已經感受呢種情緒
羈旅飄泊，無手機無電腦
古人遠走他方嘅苦況，絕對唔係現代人可以想像 

有冇試過因為某種情緒
睜開雙眼，望住開左嘅窗口
夜色慢慢咁侵入房間
漸漸籠罩住張床
突然間受驚嘅雀鳥飛過鳴叫
會見到，係因為一直都無閉上過眼

飛來曲渚煙方合，過盡南塘樹更深。

呢兩句同上兩句係一個好緊密嘅勾連
我地會稱呢種手法為：點染法
點，即係宏觀大意嘅描寫
染，即係細膩局部咁描繪
前兩句講驚禽飛過
後兩句寫驚禽飛過咩地方

受驚嘅雀鳥飛過池塘
煙霧四散，將池塘籠罩往
呢隻小鳥似乎真係好驚咁樣
飛過左成個池塘都唔夠，仲要飛入樹林
肉眼已經睇唔到咁遠
呢種目視同想像，其實詩人都深有同感
一切都係迷糊不清，未來亦然

胡馬嘶和榆塞笛，楚猿吟雜橘村砧。

五六句係一大轉折
呢到可以視為：情境連類
詩人眼中嘅外景，同心中嘅內景合二為一
驚禽以至「胡馬」、「笛」、「楚猿」、「砧」
係客觀外在或者並唔相似
但係詩人嘅心目中卻能夠見到內在共通之處

「胡馬」出自詩經
「胡馬依北風，越鳥巢南枝」
北方嘅馬依戀北方嘅風
南方嘅鳥眷戀南方嘅樹
「榆塞」係以前秦朝北方嘅戰事基地
「嘶和」和「笛」嘅聲音
都係「羈緒」之音，都係飄泊在外嘅人

「楚猿」係楚山之猿
相傳佢地嘅叫聲係好悲哀
張九齡寫過「舊聞胡馬思，今聽楚猿悲」
都係將胡馬同楚猿連結埋一齊
「橘村砧」有製衣同洗衣兩種意思
而呢兩種聲音都係會令人思鄉嘅
試問有邊種情況留意呢兩種聲音呢？
往往就係遠走他方之時

失羣掛木知何限，遠隔天涯共此心。

羣：群
知何限：到底有多少？

以詩人為中心
李商隱將「驚禽」、「胡馬」、「楚猿」等等
作為情境連類，將佢地內在嘅共通連結
再化為詩句，技巧真係好高

「失羣掛木」即係話
離群嘅事物，獨自嘅事物
好似詩人棲無定所，沈淪下僚嘅情況咁
詩人發問：到底仲有多少咁樣飄泊在外嘅人事呢？

李商隱作為一個詩人
對事物嘅存在係具有獨特嘅
敏銳嘅眼光同感受
就算「遠隔天涯」
即使好耐好耐嘅以前
即使好遠好遠嘅地方
詩人都能夠「共此心」
與天下飄泊之人、事、物共鳴互通

文學嘅物我合一之境界
唯偉大嘅文學家用一生之經驗
終其一生嘅苦困先能夠達到如此有力嘅表達
我地係到再讀一次：

宿晉昌亭聞驚禽
羈緒鰥鰥夜景侵，高窗不掩見驚禽。
飛來曲渚煙方合，過盡南塘樹更深。
胡馬嘶和榆塞笛，楚猿吟雜橘村砧。
失羣掛木知何限，遠隔天涯共此心。

#488張繼聰相繼失聰

巧用物我合一既抒情手法，開拓出一個奇妙既想像既世界
唔怕肉麻D講，學到既除左係咩文學修辭手法、情感表達，更重要係懂得運用身邊事物發揮「聯想精神」，就能夠將世界變得遼闊而多彩，生活就不致於太枯燥

#489戈登探長

巴打講得好，絕對表達左李商隱深層嘅文學價值
技巧需要配合內容，先呈現到技巧嘅美
李商隱本身嘅詩人之眼，係極度敏銳
能夠深入事物嘅普遍性，超越表面嘅獨特性，再將不同事物扣連
呢一種扣連，往往都係詩人本身嘅情感所引起，愈豐富嘅情緒，愈能令李商隱連結世界
正是：
深知身在情常在，悵望江頭江水聲
此身既在，情亦常在，而情扣連萬物，人生無限