[古代思想入門（一）ep.16]簡介基本古代思想概念：法家、名家、儒家 兼談荀子非十二子篇（二）

上一篇介紹左
荀子點批評道、農、墨三家嘅講法
透過佢嘅批評，都可以睇到各家說法嘅大體面向
以及同荀子派儒家有咩相異嘅地方
今次我地講埋剩低嘅三派學說六個人

荀子 非相篇第六
尚法而無法，下脩而好作，上則取聽於上，下則取從於俗，終日言成文典，反紃察之，則倜然無所歸宿，不可以經國定分；然而其持之有故，其言之成理，足以欺惑愚眾：是慎到田駢也。

慎到、田駢：法家代表人物

荀子成日比人話導出法家之流
咁其實法家幾早已經出現
韓非李斯只係後期集大成嘅人物
呢到可以睇得出荀子係好唔鍾意法家嘅

1.尚法而無法，下脩而好作，上則取聽於上，下則取從於俗
荀子罵法家鍾意講法治
但又唔識禮義法度嘅重要
卑視賢能嘅人，自己搞一套垃圾 
而呢套法家理論根本係無原則
只係上以君主為主，下就聽從世俗嘅諗法
完全無儒家講嘅道德倫理囉！

2.終日言成文典，反紃察之，則倜然無所歸宿，不可以經國定分
法家成日話要制定禮法
但講黎講去，根本就無一個根本依據
對以前聖人嘅嘢又唔接受 
法家果套根本唔可以用黎經營國家，定下名分
荀子心諗，聖人果套先係正確架

不法先王，不是禮義，而好治怪說，玩琦辭，甚察而不惠，辯而無用，多事而寡功，不可以為治綱紀；然而其持之有故，其言之成理，足以欺惑愚眾；是惠施鄧析也。

惠施、鄧析：名家代表人物

係中國思想入面，名家係好特別嘅
名家係非常注重邏輯
強調要將語言（名）同事實（實）分開
名家人物口才出眾，係出名嘅辯論家
但係秦朝之後會正式沒落
實在係中國思想一大可惜嘅地方

1.不法先王，不是禮義，而好治怪說，玩琦辭
荀子對各家嘅批評
其實都係站係儒家本位去思考
咁名家唔重視先王聖人
又唔講禮義道德
只係識講埋咩「白馬非馬」嘅嘢
呢種奇怪論調當然係唔可以接受啦

2.甚察而不惠，辯而無用，多事而寡功，不可以為治綱紀
荀子就話，名家講得再清楚都無用
因為根本就係唔實際
同治國平天下根本無關係，無用途講黎做咩？
講得咁多，而又做到咁少嘢
點樣可以用黎治理國家？

略法先王而不知其統，然而猶材劇志大，聞見雜博。案往舊造說，謂之五行，甚僻違而無類，幽隱而無說，閉約而無解。案飾其辭，而祇敬之，曰：此真先君子之言也。子思唱之，孟軻和之。世俗之溝猶瞀儒、嚾嚾然不知其所非也，遂受而傳之，以為仲尼子弓為茲厚於後世：是則子思孟軻之罪也。

係荀子眼中真正嘅雅儒、大儒得兩個
一個係孔子，一個係子弓
至於子思、孟子之流，全部都唔夠勁
所以荀子連自己人都無放過
針對當時見到儒學主流講法，一概批評

1.略法先王而不知其統，然而猶材劇志大，聞見雜博
荀子話，你地呢堆儒者
雖然大致上都係跟隨先王嘅講法
但根本就唔能夠了解先生嘅深意
仲要以為自己好有才華好勁
以為自己已經識得好多

2.案往舊造說，謂之五行，甚僻違而無類，幽隱而無說，閉約而無解
你地跟住前人嘅講法
定出仁義禮智信呢五種講法
根本就係好難明好抽象
聽你地解釋都知道解唔到道理啦

3.案飾其辭，而祇敬之，曰：此真先君子之言也。子思唱之，孟軻和之。世俗之溝猶瞀儒、嚾嚾然不知其所非也，遂受而傳之，以為仲尼子弓為茲厚於後世：是則子思孟軻之罪也

荀子批評子思、孟子
你地搞到人地以為孔子嘅真正道理就係咁
全世界都跟你地種講法
呢個就係子思、孟子要負責嘅地方啦！