今次講嘅呢幅露天咖啡座係我地後世叫星夜三部曲嘅第一部
呢三部曲分別係「夜晚露天咖啡座」「羅納河上的星夜」同最廣為人知嘅「星夜」
但點解梵谷咁着迷於星夜？仲要畫咁多幅有星夜嘅作品呢
要了解梵谷諗咩就要睇下佢寫嘅信
先睇下一封關於夜空嘅信先，係梵谷寫比伯納德(Émile Bernard)
「我對描繪夜景，夜晚的效果以及夜色本身著了迷。這一星期，我什麼也沒幹，只是畫畫，吃飯，睡覺。就是說一口氣畫上十二個小時，或者十六個小時，然後一連睡上十二小時。」
可以睇得到梵谷非常迷南部夜空，梵谷甚至會覺得夜間比白日更充滿生氣，更吸引
佢唔單只愛上日間溫熱燦亮嘅太陽，佢更愛幽深神祕嘅夜空
而今次呢幅夜晚露天咖啡座就係佢表達對夜空嘅愛
而另一方面就係星星，梵谷除左畫夜晚嘅天空之外，對天上嘅星星都好着迷
從呢封佢初到亞爾所寫關於星星嘅信可見一斑
「在一個藝術家的生裏，死亡也許不是最可怕的事情。我只得承認，我對星星一無所知，可是我一看見星星就開始作夢，就像我一看見地圖上代表城鎮和鄉村的黑點就開始作夢那樣。噢，為何天上那些燦爛的亮點，會比法國地圖上的那些黑點更難讓我們接近呢？正如我們可乘坐火車前往塔拉斯堪或魯昂，我們為了到達星星可不妨一死了之。」
係呢封信到你會見到梵谷對星星有一種特別嘅睇法，而係另一封信佢講過
「對我來說，沒有什麼是我能確知的，但是映入眼簾的星星，能引發我的夢想。」
梵谷講嘅夢包含好多野，包括家庭，藝術同佢嘅信仰
星星係梵谷心中其實就好似晚間嘅太陽，同樣係畫入面係佢信仰嘅代表手法之一
大家仲記得梵谷有一顆狂熱嘅信仰心嗎，特別係梵谷咁着緊繪畫生命形態嘅情況之下
呢種感情就係佢畫作入面表現出黎，好似之前講過嘅麥田，大地，太陽等
各自都包含住唔同程度嘅宗教意味，而夜晚嘅星空都唔例外
而今次講嘅露天咖啡座都有少許梵谷個人對信仰嘅意味，但我認為最重要嘅感情都係關於寂寞
呢幅夜晚露天咖啡座可以話係梵谷呢期最能夠代表寂寞嘅作品
畫入面咖啡館同夜空之間嘅互相比照下，顯示出梵谷嘅寂寞同渴望得到愛嘅心情
但又因為呢份渴望愛嘅心情得唔到回應，令到佢感到更孤獨
呢一種循環令梵谷嵌入更瘋狂嘅情緒
夜晚露天咖啡座完全表達出梵谷當時嘅狀態
我地先從技法上睇
露天咖啡座用左單點透視，有效咁帶出人物之間嘅距離感同令視線聚焦中央
輕輕講下「透視法」（Perspective）
透視主要分成四種，有「空氣透視」「隱沒透視」「散點透視」「線透視」
主要目的係帶出不同嘅空間感同立體感，亦都會加強畫面上嘅視覺感受，有部份就係要加強畫面嘅合理性
今次主要講嘅係「線透視」，亦都可以叫做焦點透視
線透視牽涉兩個好重要嘅基本觀念，分別係地平線(horizon line,HL) 同消失點
(vanishing point,VP)
地平線係天地交會嘅個條線，最常見就係海嘅盡頭同天空交會個一條線
而呢條地平線會根據我地眼睛移動而改變位置，姐係當我地企高就會變高，坐低就會
變低
另一樣就係消失點(vanishing point,VP)，消失點係永遠都係地平線條線上面
畫面上物體嘅邊線都延伸集合到地平線之上，就會形成消失點。
而根據消失點嘅數量我地分為三種透視，分別係單點透視、兩點透視同三點透視
而今次嘅露天咖啡座就用單點透視，亦都可以叫做平行透視
單點透視最能夠表現到人同物之間前後距離嘅空間關係，而且可以加強距離感
歷史上著名嘅達文西所畫嘅「最後的晚餐」就係用左完美嘅單點透視
以露天咖啡座為例，你會見到畫面上嘅線條都係傾向中心點
雖然呢幅畫嘅透視唔係做到十全十美，但都可以睇到有個基本形態
我畫嘅藍線就係地平線HL，紅線所指向嘅地方就係消失點VP
單點透視嘅畫會有種進入嘅感覺，同梵谷畫呢幅畫嘅原因好有關係
其次就係兩點透視，亦都叫做成角透視
顧名思義就係有兩個消失點，成角係指觀者從斜擺嘅角度去睇目標物
所以會見到目標物唔同面向，各個面嘅線都向住唔同嘅消失點。
同樣呢兩個消失點都會係水平線上，上次我地講嘅黃色房屋就係用左兩點透視
最後就係三點透視，亦叫做高空透視。
呢個比較少見，佢係用兩點透視作為基礎再加多一個消失點，用黎表達高度嘅空間感。
而第三消失點就一定係高於／低於水平線，表達觀者係仰視／俯視目標物。
睇哂三種唔同嘅線透視，你會發現日常成日都見到類似嘅嘢，特別係設計呢類真實性好高嘅圖
不過其他透視方法係繪畫方面都好常見
例如中國山水畫常用嘅「散點透視」，蒙娜麗莎所用嘅「大氣透視」等
講透視就講到差唔多啦，宜家就正式講夜晚露天咖啡座呢幅畫
Cafe Terrace at Night, 1888, Van Gogh
梵谷用墨水畫嘅草圖
夜晚露天咖啡座，係梵谷1888年9月份所畫嘅其中一幅作品
畫面中無論係前景嘅地面線條，咖啡館嘅簷篷，背後嘅房屋剪影等，全部都係有指向畫面嘅中心，上面我地都講過呢種手法係單點透視
咁好自然我地第一眼就會集中左係正中心，特別係呢幅畫有一個光得異常嘅咖啡館
呢種不合乎常理嘅黃同夜空幽暗神秘嘅藍形成一個非常好嘅對比
咖啡館嘅黃色其實係非常誇張，完全超出真實性。
不過梵谷相對又用大量嘅藍去調和畫面上嘅不安定
作品之所以吸引到咁多人第一眼就鐘意，好大原因係色彩嘅力量
成幅畫基本上都係用不同程度嘅黃同藍做主調，梵谷處理得非常之好
黃藍兩者互相制衡，當中又會加入綠調去調和兩者之間激烈嘅對抗
晚間露天咖啡座就係用各種嘅藍同強烈嘅橙黃作一個色彩對比
呢啲對比我地叫互補色，梵谷自從黎到亞爾之後就好鐘意用呢類互補色去畫畫
係之後嘅畫作會見到更多嘅互補色，特別係黃藍同紅綠
呢個圈叫色相環，所謂嘅互補色就係呢個色相環入面相對嘅顏色，紅對綠、黃對紫、藍對橙等
互補色兩者互相會增加色彩的顯性，但同時會帶比人好強烈嘅排斥感，如果混合埋一齊，更加會調出渾濁嘅顏色。
所以當要用互補色去作為畫作嘅主調時，係要控制得好好，唔係就會好易令人感覺到厭惡同排斥
你可能會問點解你講藍橙係互補，但又話梵谷嘅藍黃係互補，咁到底邊個先係呢
答案係兩個都係，分別只係不同方面嘅互補色
我係網上搵到一段講解心理補色
「在混合色方面，心理顏色和色度學的顏色也不相同，當看到橙色時，會感到它是紅與黃的混合，看到紫紅色時，會感到是藍與紅的混合等。但看到黃光時，卻不會感到黃光可以由紅光 和綠光混合而成。在心理顏色視覺上一切色彩“好像”不能由其他顏色混合出來。一般覺得，顏色有紅中帶黃的橙，綠中帶藍的青綠，綠中帶黃的草綠，但是，卻沒有黃中帶藍或紅中帶綠的顏色。」
所以係心理上，色彩係分為紅、黃、綠、藍四種，並叫做四原色，紅綠、黃藍就叫做心理補色，最後再加埋黑白，成為左心理顏色視覺上嘅六種基本感覺。
從調色上見到梵谷嘅心思之外，佢係色彩構圖上都一樣充滿住理性
梵谷將畫面分做兩大區域，分為右上嘅藍色區域同左下嘅黃色區域
呢兩個區域係互相呼應，為左令黃藍兩隻顏色唔會互相排斥，梵谷係畫面加左相對嘅事物去令整幅畫嘅顏色達至平衡。
右上嘅綠色樹同左下嘅藍色門框就係最有力嘅平衡
兩件物都係各自區域佔好大比重，特別係藍色嘅門框，因為黃色太過耀眼，而藍色比較上冷同沉實，所以直接放藍色都唔會太過排斥
而右上嘅藍色區域方面，如果用太多黃色就會破壞平衡，因為黃色太過耀眼
所以就放黃藍之間嘅顏色綠色，所以綠係好有效咁平衡黃同藍嘅排斥
另外就係一啲細小嘅事物，藍色區域有星光同樓房嘅燈光
左下就只有一啲深色調嘅人群，因為藍色嘅門框已經好夠力
但最大嘅問題都係點解要畫到間咖啡館咁光亮咁超乎現實嘅黃呢？
呢個正正就係揭示左梵谷對 人群、愛、溫暖、社區、關懷等渴望嘅化身
完全體現到梵谷心底嘅寂寞。
之前都有提過亞爾嘅居民對呢個紅毛怪畫家有微言，所以梵谷係到都無幾個朋友一齊去飲下野，吹下水
其次係亞爾相對於巴黎算係落後少少嘅城鎮，城鎮入面嘅人比較保守，而且人與人之間都有一定程度嘅認識，對於外來人都係比較抗拒，所以梵谷好自然就加入唔到佢地嘅社區圈子
相反如果係巴黎，梵谷一定可以好輕易係咖啡館到識返三五七個朋友，因為巴黎係個大都市，對陌生人都無咁抗拒
梵谷本身作為異鄉遊子所背負嘅寂寞已經令佢痛苦萬分，再加上唯一可排除寂寞嘅方法都無用，呢顆渴望關懷嘅心已經失去左出路，一層又一層嘅痛苦不斷疊加落梵谷嘅心靈上
係呢幅畫入面，渴望嘅感情化作亮黃，係畫中心直射觀者心中
而且唔單單係顏色上嘅揭示，你可以見人群分佈都離梵谷有一段距離
畫中嘅人都係聚集一齊，唔單只係咖啡館嘅人，連大街上嘅行人都同梵谷所在嘅位置有段距離，離梵谷最近嘅只有空嘅枱凳，再加上單點透視同亮黃色彩嘅手法，令到前景梵谷所在嘅位置同最熱烈嘅正中間隔開
呢個分隔先係梵谷最想講嘅野，呢種就係梵谷想表達嘅寂寞
個種耀眼嘅人群，梵谷好渴望但又得唔到，只能夠遠觀而不可觸碰
呢種苦上加苦嘅狀態又有誰能夠明白呢。
不過梵谷係呢個咁痛苦嘅環境下都比左個出路自已，就係一開始講嘅星空
星星對梵谷黎講係夢想，亦係信仰救贖
當感到極度苦痛時，梵谷往往會求助於基督，從宗教方面得到心靈上嘅慰藉
雖然畫入面夜空嘅星比起咖啡館簷篷可能唔夠光
但有夜空嘅藍同咖啡館嘅黃強烈嘅色彩對比，作出一種互相呼應
幽暗寧靜嘅夜空同樓房剪影，流露出異鄉人嘅孤寂，以星光慰藉心靈苦痛，整個氣氛都顯得靜謐而安詳
另一面係夜晚街道一角嘅咖啡館，人群擁擠所帶黎嘅熱鬧同溫暖，隨住街道嘅石塊彌漫開去，一整個溫馨嘅氛圍
兩者如此衝突而又和諧，成個作品都充滿住理性與感性，簡直係如詩一樣嘅作品
到呢到大家多多少少明白到余光中點解會稱梵谷係一個詩人
梵谷一直以黎嘅夢想好簡單
「希望所有人都能看到我的畫，並通過我的畫感受到我的內心。」
今次你有無感受到梵谷嘅內心世界呢
No comments:
Post a Comment