「此老精神精於虎，紅顏白鬚雙眼青。」
——南宋．劉過
——南宋．劉過
我地係引子已經詳細講過辛棄疾少年時
今日我地要講嘅係，辛棄疾係點樣變成辛稼軒
名棄疾，字幼安，兩者皆係長輩所比嘅
而號稼軒，就係自己抉擇
一如蘇軾自號東坡
兩人都係失意之時，以號自喻
希望開拓另一人生方向，至不同境界
辛棄疾係天生嘅英雄，一如岳飛
少年起義反金，殺賊歸宋，名重一時
好似細細個就已經攞過國際大獎
緊係對自己人生充滿希望
希望嘅係，自己嘅才能志向可以一展所長
辛棄疾嘅志向，當然係征戰沙場
為光復北邊故土，拋頭顱，灑熱血
當時嘅辛棄疾，點都無諗到以文學名留青史
國家不幸詩家幸，中國文學總是如此
懷才不遇，先有心力投注於創作
回歸南宋，辛棄疾終其一生都不受重用
咁我地一定會好奇：點解會咁呢？
主要原因係，南宋主流官員係主和
而辛棄疾係主張反攻大陸嘅
南宋重文輕武，注重嘅反而係辛嘅文學
一如佢呈比皇上嘅軍書《美芹十論》
「臣聞今之論天下者皆曰：『南北有定勢，吳楚之脆弱不足以爭衡於中原。』」
天下之人皆曰：唔夠打架啦，南邊點可能反攻北邊
辛棄疾反駁，未打就認輸，咁就死緊啦！
佢係軍書入面提出好多精闢見解
可惜皇帝根本唔重視呢本書
辛棄疾依然無放棄，做地方官都比心機
重視農業，訓練軍隊
有支叫「湖南飛虎軍」，好鬼好揪
但做到嘢，反而令佢被排斥
成世仔一共比人彈劾過七次呀陰公
佢係咪唔識做官，搞到成日出事呢？
辛棄疾做江西提刑，召集軍隊
一舉大破當時為禍嚴重嘅山賊
做江西安撫使，遇到旱災
百姓無啖好食，就快餓死
佢即刻下令救災，分配糧食
反應之快，成為元明清三代佳話
好可惜嘅係，辛棄疾嘅為官風格太強烈
「養邁往之氣，日趨於平，晦精察之明，務歸於恕」
當時嘅有人勸佢，不如收歛吓啦
大家中國人以和為貴，和平最好架啦
辛棄疾救災之後，即被罷免
原因係有人話佢：「用錢如泥沙，殺人如草芥」
同年，岳飛亡
「臣平生剛拙自信，年來不為眾人所容，顧恐言未脫口而禍不旋踵。」
辛棄疾係罷免前，佢自覺為官場不容
係帶湖起莊園，取名「稼軒」
自號「稼軒居士」，罷免令佢決心退隱田園
辛稼軒，自言「人生在勤，當以力田為先」
簡單黎講，即係取陶淵明、東坡之路
既然無人理我，咪返鄉下耕田囉！
辛稼軒一世都係投閒置散
係官場中耿直，鬱鬱不得志
最高做到從四品，與其才能相差甚遠
反而係呢段日子，稼軒深交陳亮、朱熹
留下友情至交嘅千古佳話
亦填下無數精彩嘅詞作
或者都算係晚年少少嘅慰藉
最後一提，辛稼軒始終都係不忘家國
係佢六十四歲，又比朝廷任命做官
佢又訓練軍隊，結果都係被人彈劾罷免
到金國真係就快打到黎啦
宰相韓侂胄再叫辛棄疾出山
但係辛棄疾已經病重，終年68歲
過世之後，仲被人彈劾
等三十幾年，先至比朝廷洗去冤名
孤行耿直，憤世嫉俗
以上大抵就係辛稼軒孤憤的一生
由宏觀而入詞作
我地會慢慢細味詞人真正細膩嘅情感
No comments:
Post a Comment