稼軒詞，精者直似一座鐵甕城。堅而銳，銳而厚，縱饒千軍萬馬，亦衝突不入。
——《白雨齋詞話》
——《白雨齋詞話》
醉裡挑燈看劍，夢回吹角連營。八百里分麾下炙，午時絃翻塞外聲。沙場秋點兵。
馬作的盧飛快，弓如霹靂弦驚。了卻君王天下事，贏得生前身後名。可憐白髮生！
扣連上兩篇稼軒嘅生平
我地先讀呢首，佢隱居之後作嘅詞
全詞皆係稼軒回憶少年起義嘅行軍生活
筆下氣勢雄壯，乃稼軒詞之豪放
係詞史發展入面，三個人好重要
第一個係李後主，將亡國之悲轉入詞作
第二個係蘇東坡，正式確立士大夫之詞
第三個係辛稼軒，題材、用字更為廣大
詞作由剩係講愛情閨怨，得以拓展
抒情言志，家國天下，無一不可
稼軒 破陣子(為陳同甫壯詞以寄之)
醉裡挑燈看劍，夢回吹角連營。八百里分麾下炙，五十絃翻塞外聲。沙場秋點兵。
八百里：代指牛。典出《世說新語》：「要當淡公八百里，豪氣一洪儒生酸。」
五十絃：代指軍樂。典出李商隱〈錦瑟〉：「錦瑟無端五十弦，一弦一柱思華年。」
詞題嘅陳同甫，即係陳亮
陳亮係南宋詞人，一樣係主戰派
自然同稼軒好好朋友啦
呢首詞送贈比陳亮
回憶之外，亦自抒悲情
夜晚係軍營入面飲醉酒
挑燈看劍，劍乃殺人利器
自然令人聯想征戰沙場殺敵
清晨士兵吹角嘅聲音
將無數士兵由夢境帶回現實
「連營」二字，可見人數之多
一晚一早
一幻想一現實
由此生出對比之張力
大家一齊食一車車送入屠場嘅牛牛
聽住軍隊奏出戰場邊塞嘅戰樂
寫得好豪邁直接，唔係一介文人寫得出
秋天嘅肅穆蕭索，沙場嘅戰士點兵
上半片由個人而至群體
非常具體嘅呈現軍旅生活嘅情況
馬作的盧飛快，弓如霹靂弦驚。了卻君王天下事，贏得生前身後名。可憐白髮生！
下半片六七句寫征戰
騎馬殺人敵陣，跑得快過的盧
拉弓劃空之響聲如驚雷
全係寫出稼軒係沙場嘅自負同滿足
征戰沙場，係咪真咁輕鬆？
正所謂：
醉臥沙場君莫笑，古來征戰幾人回
大佬，隨時連命都無埋架
稼軒之意，在於「了卻君王天下事」
即係打仗咁辛苦，都係為左光復山河
為國捐軀，「贏得生前身後名」
呢一種係儒家式嘅價值觀
全詞結構之奇妙，在於最後一句
單睇前面九句，全係少年反金嘅回憶
最後一句竟然跳回當下嘅悲嘆
「可憐白髮生！」
呢一句，到底隱含多少嘅悲憤？
係哀人生嘅不遇
係怒世人嘅冷漠
係對朝野嘅憤慨
係恨反金嘅無望
可憐呀！我嘅美好年華都已經逝去！
或者，對稼軒黎講
一生最稱心快意嘅日子係少年時
少年時，對人生充滿希冀
期盼每一日嘅來臨，以為自己可以改變世界
少年之後，往後嘅人生只係不斷嘅磨擦
直至滿頭白髮，餘下追憶……
No comments:
Post a Comment