上選使求河南，衡奏：「司諫湯邦彥有口辨，宜使金。」邦彥請對，問所以遣，既知薦出於衡，恨衡擠已，聞衡對客有訕上語，奏之，上大怒。即日罷相。年六十有二薨。
——《宋史．葉衡傳》
——《宋史．葉衡傳》
稼軒 摸魚兒(觀潮上葉丞相)
望飛來、半空鷗鷺。須臾動地鼙鼓。截江組練驅山去，鏖戰未收貔虎。朝又暮。誚慣得、吳兒不怕蛟龍怒。風波平步。看紅旆驚飛，跳魚直上，蹙踏浪花舞。
憑誰問，萬里長鯨吞吐。人間兒戲千弩。滔天力倦知何事，白馬素車東去。堪恨處。人道是、子胥冤憤終千古。功名自誤。謾教得陶朱，五湖西子，一舸弄煙雨。
經過上次稼軒寫求職信成功
正式升任做倉部郎官
咁佢到底滿唔滿足呢？
我地不妨睇佢呢一首又係寫比葉丞相嘅詞
葉丞相算係稼軒仕途嘅貴人
成日都幫佢，稼軒因此寫唔少詞送比佢
即係寫比自己老細
由呢種身分，尤能見稼軒用世之心
其實中國詩詞，成日都有「讀者二重性」
第一重係指寫比特定對象
好似題目往往都有贈答、呈、上等字眼
說話之人九成九都有言外之意
呢種讀者同作者有直接關係
收到嘅人當然著重嘅係作者本意
第二重係泛化讀者，大眾
好似我地咁，當作品公開先有機會睇到
呢種間接關係，除理解作者本義
更重要係嘗試感受作者嘅存在
如稼軒之經驗，好多時我地都會有相似情況
閱讀，以至有所理解、同情，以至共鳴
稼軒 摸魚兒(觀潮上葉丞相)
望飛來、半空鷗鷺。須臾動地鼙鼓。截江組練驅山去，鏖戰未收貔虎。朝又暮。誚慣得、吳兒不怕蛟龍怒。風波平步。看紅旆驚飛，跳魚直上，蹙踏浪花舞。
鼙鼓：古代之戰鼓
組練：組甲被練，分別指士兵嘅軍甲衣服，此代指軍隊
貔虎：貔，古代傳說兇猛嘅瑞獸。虎，老虎
誚慣得：習以為常。誚，簡直
吳兒：泛指錢塘江畔嘅青年漁民
紅旆：紅旗
蹙：通「蹴」，踩、踏之意
詞題一如上次：
前景，後指明對象
觀錢塘江嘅潮水起伏
寫比葉丞相
借景起興，比喻暗含言外之意
大抵係呢種詩詞嘅常見模式
上半片著力寫景，極具氣勢
起首先寫天空嘅飛鳥
詞人極目遠望錢塘江嘅壯景
視覺之後，隨之湧來係江潮之聲
「須臾動地鼙鼓。截江組練驅山去，鏖戰未收貔虎」
突然傳黎驚天動地嘅戰鼓聲
千軍萬馬乘著江面湧起嘅巨浪奔馳而至
翻滾不休嘅激戰，士兵勇猛如野獸
以上三句，皆以軍事比喻寫潮景
此種寫法，可謂少見，耳目一新
東坡亦寫過錢塘潮色：
鯤鵬水擊三千里，組練長驅十萬夫。
可以細味兩者風格之別
「朝又暮。誚慣得、吳兒不怕蛟龍怒」
江潮朝暮不休，附近嘅漁民都慣哂
「風波平步。看紅旆驚飛，跳魚直上，蹙踏浪花舞」
稼軒話，佢地係波浪間如履平地
船上紅旗翻飛，後生仔係大海好似條魚暢泳
腳踏浪花，浪花紛飛似舞
人與潮水嘅比拼，呈現征服自然嘅壯美
憑誰問，萬里長鯨吞吐。人間兒戲千弩。滔天力倦知何事，白馬素車東去。堪恨處。人道是、子胥冤憤終千古。功名自誤。謾教得陶朱，五湖西子，一舸弄煙雨。
人間兒戲千弩：《宋史 ．河渠志》載，錢武肅王築江堤，為阻潮水沖擊，命強弩數百射潮頭
子胥冤憤終千古：伍子胥，因吳王猜忌，賜劍自刎，屍體投於錢塘江，傳說伍子胥駕著素車白馬，驅潮而來，成為錢塘江潮神
謾教得：益左佢
陶朱：即春秋時期越國大夫范蠡
下半片唔再寫潮景，而係借景抒情思
稼軒係到問在座各位：
又有邊個可以阻擋如巨鯨不斷來回嘅潮水呢？
無呀，無人可以阻擋自然嘅力量！
就算係數千強弩連射，人為嘅力量只係兒戲
由上半片嘅征服至下半片嘅兒戲
「滔天力倦知何事，白馬素車東去」
浪潮又點知你地做過咩事阻止佢
只有等到呢股自然力量疲倦
潮水退走，一如素雅嘅馬車
駕著白馬，緩緩東歸
借白馬素車之傳說，引出伍子胥嘅恨事悲劇
「人道是、子胥冤憤終千古。功名自誤」
人人都話伍子胥因為功名
搞到自己悲劇身亡，遺恨千古
但係伍子胥其實係忠臣
越王勾踐，西施離間
伍子胥為國家好嘅進言
唔受重用不特止，仲搞到自己死埋
稼軒呢邊，連結埋自己嘅處境
係北方回歸嘅外人身分
主戰反金受到排斥
耿直陽剛嘅性格成日比小人中傷
終於忍唔住要爆啦！
「謾教得陶朱，五湖西子，一舸弄煙雨。」
吳王唔聽伍子胥講，最後咪亡國囉
益左范蠡，可以係太湖同西施日日玩呀！
日日係到玩女睇煙雨之色，咪話唔爽！
「謾教得」三字，呈現詞人嘅歷史判斷
子胥冤憤，亦係稼軒之冤憤
但又覺無力回天，浪潮何曾因人而改？
或者稼軒都深感勢孤力弱，多少都會氣餒
好似預言，一如伍子胥嘅故事
南宋唔聽稼軒講最後都亡國
呢一切當然唔可以寫得咁直白啦
但當中嘅冤憤無力，諸君可細味之
上選使求河南，衡奏：「司諫湯邦彥有口辨，宜使金。」邦彥請對，問所以遣，既知薦出於衡，恨衡擠已，聞衡對客有訕上語，奏之，上大怒。即日罷相。年六十有二薨。
至於稼軒貴人葉衡呢？
葉衡主戰，皇帝都好信佢
但有一日，皇帝問佢邊個出使金國好呢？
葉衡話：湯邦彥口才好，搵佢啦
湯邦彥去到咁遠，懷恨在心
後尾參佢一本，話葉衡講過皇帝壞話
皇帝竟然因為咁，就罷免葉衡啦……
No comments:
Post a Comment