自從梵谷去左巴黎之後
佢識多左朋友，又見識到好多種新嘅藝術風格
對佢黎講係好豐盛嘅一年
正所謂近朱者赤，近墨者黑
佢都開始因為班畫家朋友而開始畫自畫像
短短一生就畫左三十六幅
Two Self-Portraits and Several Details, Drawing, Paris, 1886
自畫像係從佢1886年去左巴黎先開始畫
以前嘅佢從來都無諗過要畫自己
只係專注畫受苦難嘅對象，感受佢地生命嘅根本
但到左巴黎之後，有好多志同道合嘅朋友，又人樂觀左
成個風格都變埋，比起以前開朗又有精神
佢細佬同母親書信中都提到
梵谷成個人變得樂觀又正面
又話梵谷最艱苦嘅日子已經過去啦，佢搵到自己嘅路啦！
不斷係信到讚佢
所以話搵到班志同道合嘅朋友係幾咁重要呢
有人同你一齊面對困難，一齊向住目標進發
有可以分擔嘅對象時，一切都變得簡單
梵谷係開始畫自畫像之後
佢同朋友之間仲會互相交換自畫像作為友誼嘅證明
有伯納德(Emile Bernard)，高更(Paul Gauguin)，畢沙羅(Camille Pissarro)等等
呢兩幅都係佢地送比梵谷
Self-Portrait With Portrait Of Gauguin, 1888, Emile Bernard
牆上面掛住嘅係高更肖像
Self-Portrait with Portrait of Émile Bernard (Les misérables) Pont-Aven, 1888, Paul Gauguin
同樣牆上面掛住嘅係伯納德嘅肖像
而背景寫住嘅字係雨果劇作孤星淚(Les Misérables)
表示佢地三個都好似劇中主角咁，不被世人認同
你可以見到佢地三個嘅關係有幾好
用自畫像送比其中一個朋友時，都不忘加埋第三個入去，
三人嘅HEHE友情就係透過自畫像去傳遞
你畫我時我畫你，送自己嘅畫像比你同時又收返你嘅畫像
呢份心意好過好多禮物啦
不過自畫像除左送禮之外，自用係比較常見嘅
自畫像就係用黎記錄當時畫家嘅心情同感受
或者係想表達出畫家自身對自己期望嘅投影
所以對世界有咁多感受嘅梵谷黎講
就算佢無識到咁多畫家朋友
佢自己都會發現自己需要從自畫像當中尋找答案，去認真咁面對自己
所以自畫像係必需架！
而梵谷一生畫咁左多張自畫像，到底佢想講嘅咩呢
我認為梵谷呢種自畫像係忠於自己內心感情嘅表現
畫出內在嘅孤寂
佢每一幅自畫像都係深深凝視住畫緊畫嘅自己同觀緊畫嘅你
望穿表層一切，直達靈魂深處
呢種咁有力量嘅眼神就係佢每幅自畫像嘅共同點
你可能會諗有邊張自畫像唔係咁
但其實以前嘅自畫像唔係好似梵谷咁畫
用咁明顯而強力嘅感情表現手法
而係大多為左記錄而畫
咁點先演變到梵谷咁有表現感情力量嘅自畫像呢
既然講到自畫像，咁我就要提兩個畫家
一個係記錄自己嘅起點，一個係記錄感情嘅起點
第一個就係人稱自畫像之父嘅 杜勒(Albrecht Dürer)
Self Portrait, 1498, Albrecht Dürer
點解佢係自畫像之父呢？
最主要係因為佢係第一個持續咁畫自畫像
一生畫左十幾幅唔同創作手法嘅自畫像
其次係佢比達文西(Leonardo da Vinci) 仲要再早二十幾年畫佢第一幅精緻細膩嘅自畫像
總之佢係西方繪畫史上最早以寫實方式紀錄自己容貌的畫家
所以後世都稱佢為自畫像之父
杜勒佢深明自畫像可以有效自我宣傳
佢用自畫像記錄低自己嘅名成利就
記錄住佢一生風光一面
叫旁人羨慕不已
Self-Portrait at 28, 1500, Albrecht Dürer
呢一幅就係最多人認識佢嘅自畫像
但咁多張點解係呢一張呢？
其實最主要嘅原因係因為佢畫到自己成個耶穌咁
仿造出耶穌the holy face嘅表現形式去畫自己。
對我地現代黎講當然無咩問題啦
但對於當時仲係神權主導嘅西方國家黎講就好大問題
真係非常之狂妄自大，係當時仲帶黎好多爭議
但點解佢要咁做呢？係咪想話比人知佢有如同基督一樣嘅地位
Self Portrait, 1493, Albrecht Dürer
不過有研究講過
其實佢係想借呢張自畫像去提高藝術家係德國嘅地位
因為當時德國嘅藝術家地位如同勞力工匠一樣，十分低賤
而去完義大利旅行嘅佢，深深感受到義大利對藝術家嘅尊重
所以佢覺得有需要提高藝術家係德國嘅地位
杜勒係用自畫像哂命嘅同時，又用自畫像為藝術家發聲
叫人又愛又恨
No comments:
Post a Comment