孤館燈青，野店雞號，旅枕夢殘。漸月華收練，晨霜耿耿，雲山摛錦，朝露漙漙。世路無窮，勞生有限，似此區區長鮮歡。微吟罷，憑征鞍無語，往事千端。
當時共客長安。似二陸初來俱少年。有筆頭千字，胸中萬卷，致君堯舜，此事何難。用舍由時，行藏在我，袖手何妨閒處看。身長健，但優游卒歲，且鬥尊前。
上次講嘅馬上賦詩之作
係東坡同子由分別果陣而寫嘅作品
而今次呢首詞，情況係相反嘅
東坡本身係杭州做官，但為左親近係濟南嘅子由
就申請調職去密州，東坡出仕密州嘅旅程
諗到可以接近子由，忍唔住係馬上作詞啦
咁當時其實佢地仕途都唔太順利
要分宋代嘅人做官做成點，好多時睇佢係唔係京都就知
失勢嘅人，九成九都比人調左去其他地方做官
東坡子由都唔妥王安石嘅新法，咁就唯有出去做地方官啦
上半片由景入情，東坡先畫一幅早行旅程圖
為左早少少見到子由，東坡決定「早行」，天未光就起程啦
沿途見到凌晨冷清嘅街道，仲有一間房嘅燈微微燃燒
行吓行吓，聽到雞嘅鳴叫，殘破左其他旅客嘅夢
「漸月華收練，晨霜耿耿，雲山摛錦，朝露漙漙」
東坡好仔細咁描寫由起程到中途嘅變化
月光漸漸消失，清晨嘅寒冷，雲同山嘅錦繡，露水霧氣漫延
係呢一連串嘅景象，觸發詞人內心嘅憂鬱
「世路無窮，勞生有限，似此區區長鮮歡」
呢個世界嘅道路好似無窮無盡，但生命卻係有限
當中值得快樂嘅事，又好似好少咁
「微吟罷，憑征鞍無語，往事千端」
諗到呢到，好多往事嘅情緒都湧埋黎
不知何處說起，只好無語
下半片係「往事千端」嘅開展，再入人生議論
東坡子由少年時初到長安
就好似當年陸機陸雲兩位少年才子初到洛陽咁
二陸好受當時嘅洛陽人欣賞，東坡子由都受長安士大夫賞識
「有筆頭千字，胸中萬卷，致君堯舜，此事何難」
東坡諗起少年嘅壯志，仲係好自負咁講
我寫詩文勁，又有才學，當然要報效明君啦
好似杜甫咁講：
「致君堯舜上，再使風俗淳」
或者係陶淵明回想少年嘅自白：
「猛志逸四海，騫翮思遠翥」
對我地兩兄弟黎講，呢件事有咩難度？
照道理，去到呢邊九成九嘅文學家都會悲傷架啦
點解呢？因為現實同少年嘅理想差咁遠
當然要自悲懷才不遇嘅感慨啦！
但東坡果然唔係常人，佢竟然話：
「用舍由時，行藏在我，袖手何妨閒處看」
論語：用之則行，舍之則藏
皇上要用你定唔用你，係由外在條件決定
但要繼續「行」定返鄉下「藏」呢？
呢一樣嘢就係我地自由決定嘅
而家不如享受吓呢個悠長假期，慢慢嘆吓
「身長健，但優游卒歲，且鬥尊前」
東坡好樂觀咁回應上半片
其實我地兩兄弟而家身體壯健，無咩病痛
唔係最啱享受人生咩？
黎，我地飲返杯酒Happy吓先啦！
No comments:
Post a Comment