患難見真情，係人生谷底仲陪你嘅先係真朋友
東坡、張夢得係一齊被貶黃州，共處患難
既然大家平時都無事可做，當然成日一齊玩啦
張夢得住係承天寺，東坡有次就同佢夜遊承天寺
東坡 〈記承天寺夜遊〉
元豐六年十月十二日，夜，解衣欲睡；月色入戶，欣然起行。念無與樂者，遂至承天寺，尋張懷民。懷民亦未寢，相與步於中庭。
庭下如積水空明，水中藻荇交橫，蓋竹柏影也。
何夜無月？何處無竹柏？但少閑人如吾兩人耳！
呢篇文好短，得八十四個字
東坡係到證明，咩叫飛花摘葉，皆可殺人
大文學家，隨手拾來，皆成佳構
「夜，解衣欲睡；月色入戶，欣然起行」
美，最難得係偶遇
係漫無目的，心念忽起嘅行動
東坡訓唔著，明朝又無嘢做，於是係月下散步
「念無與樂者，遂至承天寺，尋張懷民」
仲有邊個好似我咁呢？
可以享受閒人之樂，懂得月下散步之美
就只有張夢得呢位朋友
「庭下如積水空明，水中藻荇交橫，蓋竹柏影也」
呢幾句以水喻月，真係神來之筆
庭下就好似水一樣咁清澈
係包含而非侵佔，係透明而非掩蓋
睇落好似水草縱橫交錯咁
原來係竹子同柏樹嘅影子先真
由喻到物，盡顯月色清明嘅動態之景
「何夜無月？何處無竹柏？但少閑人如吾兩人耳！」
其實月亮、竹柏都好常見
但係可以感受到呢種閒適嘅人
或者只係得我地兩位閒人啦
閒人未必能有閒適
往往係對生活充滿情趣嘅人先能感受
東坡 水調歌頭(黃州快哉亭贈張偓佺)
落日繡簾捲，亭下水連空。知君為我，新作窗戶濕青紅。長記平山堂上，攲枕江南煙雨，渺渺沒孤鴻。認得醉翁語，山色有無中。
一千頃，都鏡淨，倒碧峰。忽然浪起，掀舞一葉白頭翁。堪笑蘭臺公子，未解莊生天籟，剛道有雌雌。一點浩然氣，千里快哉風。
話說張夢得係黃州得閒就建左座亭
佢就請蘇軾命名為快哉亭，蘇轍作〈黃州快哉亭記〉
東坡就為張夢得寫首詞，送比佢啦
上半片寫亭景
日落黃昏，捲起窗簾，眼看亭下水色連天嘅美景
知道你為接待我而建亭，新造嘅窗戶似乎油漆都仲係濕
望見此景，突然諗起揚州歐陽修所建嘅平山堂
當時訓係枕頭觀賞江南煙雨
孤獨嘅鴻雁似乎淹沒係呢股迷離嘅氣氛
「認得醉翁語，山色有無中」
醉翁係歐陽修，佢曾經引用王維詩句
山色似乎有，又似乎無，更見動人
東坡既是寫實景，亦都係寫回憶中嘅虛景
亭景似乎實，又似乎虛，彼此映照
一千頃，都鏡淨，倒碧峰。忽然浪起，掀舞一葉白頭翁。堪笑蘭臺公子，未解莊生天籟，剛道有雌雌。一點浩然氣，千里快哉風。
下半片由景入情，兼論人生
江面千頃廣闊，波平如鏡，鏡中倒照青碧山峰
「忽然浪起，掀舞一葉白頭翁」
縱觀全詞，我地可以推論：
呢位白頭翁係東坡對自己，對張夢得嘅比喻
前幾年仲好好地當緊官，忽然浪起，就被貶到黃州啦
我地要理解點解下三句，必須要知邊個叫「蘭臺公子」
蘭臺公子，即係宋玉，「快哉」二字正出自佢嘅〈風賦〉
宋玉話風分兩種：大王之雄風、庶人之雌風
用廟堂嘅政治套入自然界嘅事物
咁白頭翁被「風」起嘅浪搞到動盪不安
東坡自然對「風」對「快哉」有另一種睇法
呢邊東坡就係到笑宋玉：
「未解莊生天籟，剛道有雌雌」
你都未識莊子講風吹而生嘅天籟
風無貴賤雄雌之分
東坡追求嘅風係呢邊已經係講緊自我修為
精神境界夠高，先能夠感受天籟
「一點浩然氣，千里快哉風」
由「風」而亂離，因「風」而快意
東坡既有入世之心，亦有出世嘅精神
達則以浩然正氣嘅儒家思想
退則借超越世俗嘅道家精神
正因為東坡有咁嘅覺悟，先會好霸氣咁講：
咁樣無論我地面對順境逆境，就算投閒置散做個閒人
都可以享受千里快哉風！
No comments:
Post a Comment