講講下梵谷，點解又關浮世繪事呢，日本架喎
其實因為當時巴黎掀起左日本風潮
好多畫家都比浮世繪呢種新畫風吸引住，當然梵谷都唔例外
但係日本嘅野到底點樣傳到過去巴黎呢
日本係19世紀中開放通商，有大量日本風嘅商品流通市面
而當中有好多商品係用浮世繪嘅圖黎做包裝紙
咁去到巴黎自然有好多人都收到呢啲包裝紙，令到好多人都接觸到日本文化
個時嘅歐洲社會仲出現左一個詞語叫日本主義
係形容當時嘅社會上嘅和風熱潮
而唐基當時因為呢個熱潮有好多浮世繪嘅商品
所以你會見到梵谷畫唐基嘅肖像畫時，後面會有好多浮世繪
佢係唐基老爹
以前係巴黎公社嘅老革命家，成日宣揚他嘅革命理論
要用革命去改變不公平嘅社會
之後佢退左落黎，就去左蒙馬特區開畫具店
但佢依然揸住呢個信念生活
所以唐基成日幫助窮困階層，不斷係精神同物質上支持佢地
接濟窮朋友，又賖顏料比啲窮畫家，非常有情有義
有好多時候仲因為佢太過幫人而同老婆吵大鑊
有個咁好嘅畫具店老闆係到，成個蒙特區嘅人都尊稱佢做「老爹」
係梵谷眼中佢更係一個溫和又善解人意嘅老人家
佢兩個仲好傾得埋，因為佢地兩個都一樣相信人類可以無種族差異
無階級差別，人類都可以和平友愛
梵谷係唐基老爹身上除左接觸到好多浮世繪嘅嘢之外
更搵到一班志同道合嘅朋友
又有一個可以比佢地聚埋一齊嘅地方
唐基老爹可以話係大家之間嘅一個橋梁
最重要嘅係梵谷搵到個可以理解佢理念嘅人
講左咁耐，咁咩叫做浮世繪呢？
浮世繪係一種日本傳統嘅版畫
浮世係指世人所處嘅現世，塵世之意，咁姐係描繪世間風情
特別係江戶時代庶民嘅生活、
好多場景都係風月場所、戲院舞台等等
呢種咁新鮮嘅藝術風格對當時巴黎帶黎好大嘅影響
不論係用色、製法、定選材對令巴黎所有人都震驚不已，特別係藝術界嘅朋友
咁咩係版畫呀
版畫分好多種類，有木刻、銅版、石版、絲網、數位版五大類
而浮世繪係木刻版畫
佢係由原畫師、雕版師、刷版師 三者分工協力完成
一開始會由原畫師畫左個原圖先，
再到雕版師係木版上雕刻出圖形
最後由刷版師係版上面上色，將圖案轉印落紙張上
而張原圖有幾多種顏色就要刻幾多版
雕刻師佢會雕一塊主版同好多塊色版，每張作品嘅顏色就係咁一層層印上去
製作嘅步驟：
1，在木版上貼上原畫稿 2，用小刀雕刻出輪廓 3，用鑿子鑿出凹面 4，主版完成 5，為木版著色 6，鋪紙 7，用馬連摩擦 8，刷版完成 反覆多次拓印這種色版，浮世繪就完成
當時嘅巴黎係呢種咁新鮮嘅日本風氣影響之下
當然會引起印象派嘅畫家好大興趣
我地嘅印象派大師們當然唔例外
Girl with Fan, 1881, Pierre-Auguste Renoir
Camille in Japanese costume, 1876, Claude Monet
你會見到佢地真係畫好多日本嘅元素係入面
和服，妓藝都會出現
咁梵谷當然都有畫啦
佢同佢細佬西奧仲非常鐘意浮世繪版畫
鐘意到兩個加埋收藏左成500幅浮世繪作品
由線條勾勒，平塗套色技法，明亮嘅色彩，到迥異於西方嘅透視
所有所有都深深吸引住佢地
既然咁鐘意，當然唔少得臨摹啦
佢以前就臨摹米勒，依家就到浮世繪
梵谷以西方油畫素材去臨摹呢種日本版畫
龜戶梅園, 1856 歌川廣重
大橋驟雨,1856 歌川廣重
Courtesan: after Eisen, 1887, Vincent van Gogh
同以前臨摹米勒一樣，佢會加入自己好多個人風格同諗法
今次浮世繪佢係臨摹之餘，仲加左個外框，框內有一系列嘅漢字、日文
梵谷認為呢啲字同符號係日本嘅特質，係一種好有力量嘅藝術
佢用心去研究、了解同學習，去掌握漢字結構嘅美
當重新學習一種完全唔同文字結構嘅語言時，呢啲漢字同日文對佢黎講就好似圖像而唔係文字
所以佢框入面嘅文字係以繪畫嘅方式畫上去
臨摹令梵谷體會到浮世繪嘅特質，並且引入自己嘅繪畫理論
經過浮世繪嘅洗禮後，佢繪畫更進一步確立個人風格
特別係佢慣用嘅線條勾勒同燦爛色彩
一步步以黎，你都會見到佢係顏色方面不斷咁改變
一個藝術家每步都係有足跡可尋
梵谷曾經同佢妹妹講過「在此我不再需要日本木刻版畫，因為我就在日本」
可見佢迷日本迷到一個咩地步，分分鐘仲勁過依家啲香港人
而蔣勳係書講左段我覺得好好
「梵谷一生都在尋找心靈的救贖，最初，他以為是在礦工人的社區，後來尋找到農民，又尋找到街頭無助的妓女，在一切救贖之夢一一破滅之後，他找到了浮世繪中的世界，他夢想著要去日本，他告訴朋友，想到日本，出家做僧侶，把自己奉獻給永恆之佛。」
句中講到嘅妓女係佢以前一個情人西嬿(Sien)，16歲就係街上面拉客，生左五個細路，識梵谷嘅時候個肚仲有一個，佢地仲一齊左一段時間。
蔣勳講出左梵谷真正需要嘅嘢，係一直追尋緊心靈嘅救贖
係佢明白自己要救贖嘅同時，佢就意識到要救贖他人
所以廣義黎講，梵谷係世人嘅情人，就如同佢愛佢嘅礦工人、農民同妓女
最後講到他告訴佢嘅朋友，呢位朋友係高更
梵谷送過一幅自畫像比高更，係一幅光頭嘅自畫像
呢幅自畫像可以睇到日本文化對梵谷有幾大嘅影響
下一篇會開始講自畫像
另外有一點好多人都講，梵谷嘅星夜係有浮世繪影響嘅影子
葛飾北齋 《冨嶽三十六景》之一, 神奈川沖浪裏
不過呢點就見仁見智啦
No comments:
Post a Comment