長憶別時，景疏樓上，明月如水。美酒清歌，留連不住，月隨人千里。別來三度，孤光又滿，冷落共誰同醉？捲珠簾、淒然顧影，共伊到明無寐。
今朝有客，來從濉上，能道使君深意。憑仗清淮，分明到海，中有相思淚。而今何在？西垣清禁，夜永露華侵被。此時看，回廊曉月，也應暗記。
我地讀過東坡愛情同兄弟嘅詞作
不妨可以讀埋東坡寫比朋友嘅傑出作品
眾所周知，東坡嘅朋友真係數之不盡
呢種寫比朋友嘅作品，大體可分為二：
有方外之士，即係道士、和尚，反映超脫嘅精神
亦都有同樣進身廟堂嘅士大夫，呈現入世嘅思想
今次我地先讀呢一首
東坡寫比同樣因反對王安石變法而調任地方官嘅朋友
呢位朋友叫孫巨源，東坡同佢係同僚，感情不俗
曾經寫過〈潤州甘露書彈箏〉詩
採桑子(潤州多景樓與孫巨源相遇)、更漏子(送孫巨源)詞比佢
東坡 採桑子(潤州多景樓與孫巨源相遇)
多情多感仍多病，多景樓中。尊酒相逢。樂事回頭一笑空。
停杯且聽琵琶語，細捻輕攏。醉臉春融。斜照江天一抹紅。
呢首係佢地相會係潤州時即席之作
描寫佢地係高樓相會，旁有歌妓唱樂
相對我地要細讀嘅作品，情感雖然唔係好深刻
但頗能一觀佢地相會嘅情況
東坡同世俗嘅朋友，做返俗世嘅事
咁樣，其實先係友情最常見嘅情況
長憶別時，景疏樓上，明月如水。美酒清歌，留連不住，月隨人千里。別來三度，孤光又滿，冷落共誰同醉？捲珠簾、淒然顧影，共伊到明無寐。
呢首詞題目好詳細，點出東坡書寫此作嘅時間、地點、思憶嘅人
東坡因為孫巨源係八月十五日於景疏樓坐別海洲
又係潤洲同東坡等友人會晤歡飲
之後兩個一齊去楚洲，東坡北去密州，孫巨源西至首都開封
東坡三個月後，十一月十五日重遊此地，同新任大守坐食於景疏樓上
有感而發，景在人散，作詞思憶呢位好朋友
上半片力寫東坡於景疏樓上，物是人非嘅感慨
詞人眼見月光如漫天江水，冷冷柔柔灑落四野
諗起三個月前嘅景疏樓，人卻四散，唔知幾時有得再見
「長憶」，主詞缺乏賦予兩個可能：
1.東坡成日諗起之前分離嘅情況
2.巨源成日諗起之前分離嘅情況
我地不妨可以理解做兩者皆是
中國古代嘅知己，本來就係互相嘅想念
東坡想巨源，巨源想東坡，係佢地兩個都確信嘅事
一前一後的景疏樓，空間、景物以至時間契合（同是十五日）
東坡呢種懸想，令自己、朋友有交疊對照嘅感通
「美酒清歌，留連不住，月隨人千里」
美酒清歌，猶是歷歷在目，此刻冷清卻告訴詞人現實嘅無奈
「留連」，不捨
「不住」，再不捨都無法改變
明月高懸，千里係心嘅距離
同時東坡嘅心又有如月光咁照
就算友人遠在開封，仍然都會照到
「別來三度，孤光又滿，冷落共誰同醉」
離別之後三度月圓，月亮又未嘗唔係東坡引發思憶嘅象徵？
月本不孤，孤者在心
相似嘅月圓之夜，人呢？
同醉嘅首要條件，要先有好友
此一反問，盡見了巨源係東坡心中之重
為左睇明月，東坡捲起珠簾，低首思憶
低首卻只見孤獨嘅影子相伴
「淒然顧影」，形影相弔
好友不在，月影相伴，思念而無眠
今朝有客，來從濉上，能道使君深意。憑仗清淮，分明到海，中有相思淚。而今何在？西垣清禁，夜永露華侵被。此時看，回廊曉月，也應暗記。
下半片的由實入虛，盡見詞人想像
巨源嘅朋友，同東坡講：佢都好掛住你呀！
「憑仗清淮」，東坡將想念化成相思淚
再由清淮流入大海，自然澎湃，滔滔不絕
巨源，你Feel唔Feel到？
呢種象徵手法係中國詩詞常見
秦觀：
「便作春江都是淚，流不盡、許多愁。」
岑參：
「渭水東流去，何時到雍州？憑添雨行淚，寄向故園流。」
文學嘅想像，未必要合於現實經驗
無理而妙，想像更能呈現美感
「而今何在？」
此一問句係東坡嘅想像，你而家係邊？
你係咪係中書省清冷嘅宮廷值夜？
「夜永露華侵被」
長夜漫漫，冬寒露氣，透衣入心
呢種冷，同我一樣係因為孤獨
「此時看，回廊曉月，也應暗記」
巨源啊巨源，睇吓回廊月光
月光傳遞緊我嘅思念之情，好似我地相會時嘅明月
你掛住我，我掛住你
有情如此，孤光不孤
東坡好似講緊：就算我唔係你身邊
都唔可以唔記得景疏樓嘅歡樂
回憶嘅美好，友情嘅溫暖
應該可以消除當下現實嘅冷酷吧！
No comments:
Post a Comment