與君今世為兄弟，又結來生未了因。
——東坡
——東坡
東坡 滿江紅(懷子由作)
清潁東流，愁來送、征鴻去翮。情亂處，青山白浪，萬重千疊。孤負當年林下語，對床夜雨聽蕭瑟。恨此生長向別離中，彫華髮。
一尊酒，黃河側。無限事，從頭說。相看恍如昨，許多年月。衣上舊痕餘苦淚，眉間喜氣沾黃色。便與君，池上覓殘春，花如雪。
呢篇最後為東坡子由之情作結
我地只好穿梭時空，跳到東坡五十七歲，子由五十四歲
佢地都已經係老人家啦，東坡仲有七年嘅人生
距離當初嘅約定，似乎仲未有實現嘅一日
但係餘下嘅人生已經唔多，又點會唔令人悲傷呢？
又點會唔再次「懷子由」呢？
清潁東流，愁來送、征鴻去翮。情亂處，青山白浪，萬重千疊。孤負當年林下語，對床夜雨聽蕭瑟。恨此生長向別離中，彫華髮。
上半片用兩個意象起首，我地稱之為「複合意象」
即係呢兩個意象結合起黎，更有力咁表達相似嘅情思
抽象嘅愁借流水具體化，一個「送」字
可以想像係流水相送，詞人眼送
流水之盡之上，只見征鴻遠飛
係中國詩文化入面，「征鴻」往往象徵羈旅飄泊
詞人借物起興，由流水、征鴻中有所「情亂」
愁起不止，有如萬重青山、千疊白浪，紛亂不休
呢兩個意象都係自然現象，自然嘅循環不休
其浩瀚嘅力量，更顯東坡思念之濃烈
「孤負當年林下語，對床夜雨聽蕭瑟」
上面都係虛寫，呢到轉入實事
唔再只係普遍嘅泛情，係東坡個人切身嘅生活經驗
〈辛丑十一月十九日既與子由別于鄭州西門之外馬上賦詩一篇寄之〉：
亦知人生要有別，但恐歲月去飄忽。
寒燈相對記疇昔，夜雨何時聽蕭瑟。
如今東坡老去，回首此約
只覺「孤負」子由，只有感傷悔恨之情
呢兩句實事撐起上半片嘅虛神，虛實相生
家鄉，本係人嘅最終歸屬，本是人嘅心靈渴求
如今卻係「恨此生長向別離中，彫華髮」
聚少離多，或者人生嘅時日也無多
一尊酒，黃河側。無限事，從頭說。相看恍如昨，許多年月。衣上舊痕餘苦淚，眉間喜氣沾黃色。便與君，池上覓殘春，花如雪。
下半片東坡再次落入回憶過往，甚至係幻想
係十五年前，東坡同子由相見於澶濮，小聚於東園
就曾經攞酒對飲，旁邊對住黃河流道
東坡似乎係到幻想，如果我地可以再次一齊
多少往事，也能從頭細說
「相看恍如昨，許多年月」
眼前一切熟悉得歷歷在目，有如昨天才相見會談
衣上縱有過去因孤負流下嘅淚痕，但當我地告老還鄉
果種開心呢，真係喜形於色，連眉間也沾上黃色
「便與君，池上覓殘春，花如雪」
東坡寄詞未來：
呢種幻想嘅開心，仲有機會成真架
我地退休，就可以一齊養老啦
就算係「殘春」、「如雪」，都無所謂
老家池塘，係家嘅歸屬
即使再遲，也總有殘春可覓，花雪足賞
縱觀東坡子由一生，「雨夜對床」，反覆重現
呢種一心想回到家鄉，兄弟安穩老去嘅理想無法失實
不過得兄弟如此，已經好幸福啦
東坡係入獄以為自己就死時寫過：
「與君今世為兄弟，又結來生未了因。」
呢種手足之情，就算有些許遺憾，都足以令人傾慕
No comments:
Post a Comment