今次就講印象派圈子入面嘅老臣子
係大家所熟知嘅 莫奈、塞尚、馬內、竇加、雷諾阿等等嘅印象派大師中
只有佢係唯一完整咁參加哂印象派所有八次大展嘅畫家
直情係印象派中堅中嘅中堅
畢沙羅(Pisarro)
佢係一個温和、寬容、親切，非常重視友情嘅人
可以話係深得畫友心，基本上成個印象派圈子都係佢嘅人
連梵谷咁難相處嘅人，佢都係梵谷心目中最好嘅朋友
而畢沙羅真正嘅影響力在於佢成功帶出一眾出色嘅弟子
人稱現代藝術之父嘅塞尚，象徵主義先驅嘅高更都係佢嘅入室弟子
仲有莫奈、梵谷、秀拉等印象派系人馬
全部都係佢嘅好朋友，每個人都受過畢沙羅嘅指導
塞尚更稱畢沙羅為「聖父」，更講過 「我們（印象派嘅同仁）都出自畢沙羅。」
可見畢沙羅係一個幾咁重要嘅人物。
咁佢又關梵谷咩事呢
好耐之前講過佢係梵谷係巴黎時最好嘅朋友
亦都係影響到梵谷筆法嘅一個主因
畢沙羅同秀拉嘅點描有少少唔同
畢沙羅係用短促細小嘅筆觸去表達印象派嘅光影色彩關係
用橫排、斜排嘅畫法，形成光點係色彩之間流動嘅感覺
莫奈都有類似嘅光影實驗嘗試
莫奈係試驗同一個場景係唔同時分有唔同嘅光影效果
你會見到其實佢地並唔在意建築物嘅輪廓線
主要係想畫低光影嘅變化，只有係室外自然光之下先見到嘅美景
係呢到提一點
其實畢沙羅係最早嘅户外作畫先驅者，比莫奈等人更早
佢更加係一八六五年就開始放棄用黑色、暗棕色、土褐色等顏色，可以話係新印象嘅一大重點
而且比秀拉更早使用「視覺混合」(將色調分解為組合嘅元素)技法落去繪畫方面
畢沙羅就好似父母咁不斷教嘅小朋友新知識，一個湊大成個印象派系咁
另外你可以見到畢沙羅嘅畫有好多主題都係畫農村田園
其實因為畢沙羅係一個無政府主義者
但佢唔係激進派類型嘅無政府主義者
反而係溫和心態，相信住小型社區嘅力量同情懷
所以係畫入面唔會感受到有濃烈嘅火藥味
而係有一份對小農社會嘅深情眷戀
畢沙羅呢種畫法帶住抒情嘅田園意味，平實而有內涵
佢嘅畫一開始睇會覺得沉悶，但係越睇越有味道，越睇越襟睇
你可以感受到有一份溫情係畫入面
你會想像到畫入面嘅人做緊咩，發生緊咩事，當下氣氛，環境係點
呢種柔和嘅配色，筆法帶住無限嘅溫情
係愛呀，哈利
而梵谷經過係點描技法上面嘅學習，佢開始用呢種方式去畫
佢畫好多風景，用呢一種點描去表達田園、大自然
而且佢開始用好多黃色去畫麥田
雖然有一個講法係佢食開嘅精神藥物影響
但我自己覺得呢個時期嘅梵谷用黃色只係出於喜好同有宗教上嘅力量
有學者特別指出呢個時期嘅梵谷好多風景畫原來並唔純然係風景
而係批判工業化、城市化迫害掠奪小農土地，係呢種思想背景下嘅作品
梵谷嘅畫風轉變中隱含對社會轉型嘅焦慮， 呢一點係畢沙羅嘅理念影響到梵谷。
上幾集有提過，莫奈、雷諾瓦呢一班印象派就完全唔同
佢地對工業化城市化係表現出歡喜興奮，認為係進步係現代化，全面嘅讚頌
但畢沙羅、梵谷同佢地相反，反而係憂慮工業化對農村嘅影響
你會見到好多畫面前景安排好大片荒地，後景都係出煙嘅煙囪、工廠
無莫奈、雷諾瓦等人歌頌工業化嘅感情
而係一種對工業化嘅反思，並唔係全然接受工業嘅改變
呢種感情產生好大原因在於梵谷以前對勞動階層嘅關心
而另一點係在於佢黎到巴黎住嘅蒙馬特區
蒙馬特區係一個巴黎以北嘅地方
位於巴黎邊緣，係一個龍蛇混雜嘅地方
大多數初到巴黎嘅勞工都係聚集係呢一區，生活費比較平
所以一班未成名嘅畫家都以蒙馬特區做據點 (未來畢卡索都係呢到住過架
)所以梵谷係呢個窮困但充滿夢想嘅社區，又再次感受到生命
再一次要用繪畫去救贖農村社區
No comments:
Post a Comment