「某自得罪，不復作詩文，公所知也。不惟筆硯荒廢，實以多難畏人，雖知無所寄意，然好事者不肯見置。開口得罪，不如且己。」
——東坡
東坡 滿江紅(寄鄂州朱使君壽昌)——東坡
江漢西來，高樓下、葡萄深碧。猶自帶，岷峨雪浪、錦江春色。君是南山遺愛守，我為劍外思歸客。對此間，風物豈無情，殷勤說。
《江表傳》，君休讀。狂處士，真堪惜。空洲對鸚鵡，葦花蕭瑟。獨笑書生爭底事，曹公黃祖俱飄忽。原使君，還賦謫仙詩，追黃鶴。
東坡寫呢首詞嘅時候，係經過「烏臺詩案」無耐
佢受到人生最大嘅挫敗，係〈與沈睿達書〉一文講：
「不復作詩文」，因為佢判罪最大原因係佢嘅文句
烏臺詩案，貶謫黃州，呢件事對東坡黎講好重要，之後會慢慢講
呢到嘅重點係，東坡係呢段時間都仲有唔少真心朋友
係失意之時寫比朱壽昌嘅詞
一見佢地嘅交情，二見東坡嘅諗法
朱壽昌係二十四孝主角之一，「棄官尋母」
朱壽昌七歲果陣，同老母分開，五十年不見
其間佢刺血書寫《金剛經》，四圍搵老母
終於母子歡聚，老母已經七十幾歲
百行以孝為先，東坡當然好敬佩佢啦
上半片氣勢豪放，先寫長江、漢水流連不絕
武昌係朱壽昌當官嘅地方，同東坡黃州相隔一條江水
詞人幻想係武昌嘅黃鶴樓俯瞰
眼看江水有如葡萄嘅深碧色澤
又突然神思一轉，係到諗：
呢條江水，正係從我嘅故鄉四川、岷山同峨嵋山嘅雪水流到呢邊
係東坡眼中，江水似乎充滿故鄉錦江繽紛美麗嘅春色
呢邊嘅想像，係東坡望
亦都係朱壽昌望，人我相寫
既係人我相寫，自然導出下一句：
「君是南山遺愛守，我為劍外思歸客」
前面當然係讚朱壽昌係愛民如子嘅地方官
後面就講自己思鄉情切卻不得歸嘅遊子
一條江水，兩個文人
一對知己，兩種身分
「對此間，風物豈無情，殷勤說」
呢到又將自己、朱壽昌合埋黎寫
面對江山美景，我地又點會無感慨呢？
呢種情，就等我慢慢向你傾訴啦！
《江表傳》 ：晉虞溥著，其中記述三國時江左吳國時事及人物言行
狂處士：指禰衡。不出仕之士稱處士
下半片借史抒發自己嘅感受
東坡同朋友講：千其唔好讀《江表傳》
入面有個禰衡，佢嘅經歷令人心痛
曾觸犯曹操，曹操多顧忌他才名而未殺，最後因出言不遜而被黃祖所殺
而禰衡多少都似東坡咁，因為自己嘅才學而受苦
禰衡因作〈鸚鵡賦〉而有名，後人將其葬地稱為「鸚鵡洲」
「空」、「蕭瑟」都係好悲慘
鸚鵡洲上芳草萋萋，葦花猶自蕭瑟
昔日三國人才，魂魄今安在？
東坡雖然充滿悲苦之情，仍然可以超越
由個人而入歷史，再從歷史見哲理
「獨笑書生爭底事，曹公黃祖俱飄忽」
其實站係東坡旁觀嘅角度：
禰衡呀禰衡，你何必要咁堅持受苦
百年之後，曹操黃祖咪都係死埋
呢一樣，都係東坡自我嘅解脫
「原使君，還賦謫仙詩，追黃鶴」
喂老友，千其唔好陷入政治紛爭
世俗之事，往往只係一時
但文學藝術，卻可以流傳千世
崔顥嘅〈黃鶴樓〉、李白嘅〈登金陵鳳凰臺〉
唔係到今時今日，我地都仲讀緊咩？
東坡向朱壽昌盡說心中情
現實嘅不堪，必然令人走向其他方向
如文學，如夢幻謫仙
一追再追，亦都係呢段黃州時期
東坡寫下令人傳誦千古嘅神作
No comments:
Post a Comment