老夫聊發少年狂！左牽黃，右擎蒼。錦帽貂裘，千騎卷平岡。為報傾城隨太守；親射虎，看孫郎。
酒酣胸膽尚開張。鬢微霜，又何妨！持節雲中，何日遣馮唐？會挽雕弓如盈月；西北望，射天狼。
詞有豪放、婉約兩大派
婉約係詞之本色，即係原本最初大家都咁寫嘅主流
豪放則係詞之變格，由東坡開始創變，後人跟隨
呢兩種係風格嘅唔同，我地不妨由典型嘅作品做介紹
晚唐溫庭筠、韋莊係婉約詞風嘅開山祖師
下開宋代柳永、秦觀、李清照、歐陽修、晏殊、張先……
人數遠超東坡嘅豪放派
就連東坡門生之一嘅秦觀都唔寫豪放詞
溫庭筠 菩薩蠻六首之一
小山重疊金明滅，鬢雲欲度香腮雪。懶起畫蛾眉，弄粧梳洗遲。
照花前後鏡，花面交相映。新帖繡羅襦，雙雙金鷓鴣。
屏風上嘅金碧山水，隨往光而明滅
黑髮如雲之鬆散，映照女子早上臥床嘅臉龐雪白
待在閨房，情人不在，也無心打扮
古代女子喜用前、後各一鏡化妝
髮髻嘅花，美女嘅臉，互相前後相映
新嘅衫繡左一雙一對嘅鷓鴣，女子卻孤身一人
婉約詞，題材多係女子閨怨之情，多用代擬
抒發自己嘅情感、思想，當時主要用詩黎表達
當然都有例外啦，但直到東坡先咁明顯「以詩為詞」
即係用寫詩嘅態度寫詞，唔再局限係愛情閨怨
抒情言志，家國天下，無一不可
題材擴充，自然書寫嘅風格都多變啦
當中同婉約最相異嘅，就係豪放
老夫聊發少年狂！左牽黃，右擎蒼。錦帽貂裘，千騎卷平岡。為報傾城隨太守；親射虎，看孫郎。
呢首詞可謂東坡詞風轉為「豪放」之代表作
東坡雖然豪放詞寫得唔多，但文學史素來以創變為高，故總以豪放稱其詞風
東坡係《與鮮于子駿書》談及此詞：
「近卻頗作小詞，雖無柳七郎風味，亦自成一家。呵呵。數日前獵於郊外，所獲頗多。得一闋，令東州壯士抵掌頓足而歌之，吹笛擊鼓以為節，頗壯觀也。」
呢首詞係因為打獵而寫，仲同埋成堆壯男一齊高歌
就算無柳永嘅詞風，無詞之本色
唔寫女人寫男人，咪都可以自成一家，呵呵
上半片記東坡出獵嘅情境
古人四十而稱「老」，東坡寫呢首詞已經四十歲啦
都係老人家，但突然有少年嘅興致
東坡唔讀書，去打獵，都幾見佢嘅活力
「左牽黃，右擎蒼」
黃、蒼，舉一代全，意指黃狗、蒼鷹
「千騎卷平岡」
「卷」之一字，真係好有氣勢呀！
「為報傾城隨太守」
除左豪放嘅想像，仲想與民同樂
打多幾隻老虎返去BBQ
東坡仲用孫權自喻，即刻親手射返隻老虎先！
酒酣胸膽尚開張。鬢微霜，又何妨！持節雲中，何日遣馮唐？會挽雕弓如盈月；西北望，射天狼。
下半片寫東坡狂放嘅心理
「酒酣」，係用酒將壓抑嘅情緒釋放出黎
生出下句：「鬢微霜，又何妨！」
多幾條白頭髮，老子什麼鬼都不怕！
「持節雲中，何日遣馮唐？」
漢文帝果陣，雲中太守魏尚抗擊匈奴有功
但因報功不實，獲罪削職
呢個時候有位叫馮唐嘅人，勸醒文帝
就派馮唐持節去赦免魏尚
東坡沿古喻今，希望一如馮唐可以大展所長
老細，幾時比我做大事？
「會挽雕弓如盈月」
東坡提起弓箭，竭力拉盡弓弦，如一盈月之滿
朝向西北，欲射天狼，暗示要打當時北宋嘅大敵西夏
否陰柔，主壯美，真係別有一番豪放嘅味道
讀一次呢首詞，FF成堆男人唱歌，真係好麻甩呀！
No comments:
Post a Comment