[古代思想入門（一）ep.24]音能感人：雅樂與淫聲之別——樂論篇（二）

睇到「淫」呢個字
通常最多嘅聯想係「淫邪」 
但呢個字本義係指水多得到浸哂出黎
「久雨為淫」，有時我地會見到古人講「淫雨」
唔係呢種雨好淫賤，係形容緊雨水好鬼多 

不過，「淫邪」嘅解法，唔係現代人先會有
孔子好早講過：「放鄭聲，遠妄人。鄭聲淫，妄人殆。」
唔要鄭聲，妄人遠離
鄭國嘅音樂淫，妄人危險
漢代、宋代儒者，都將呢個「淫」解做淫邪 
即係話鄭國嘅音樂詩歌內容講男女愛情，係衰嘢

《禮記》：「飲食男女，人之大欲存焉。」
儒家之始，係肯定人嘅欲望存在 
如果講愛情嘅音樂詩歌，都係淫邪，解唔通孔子嘅講法
正因為咁，清代至今對「淫聲」嘅睇法已經唔同左
古樂中正平和，似而家嘅古典音樂
而淫聲就似流行歌曲，個旋律變化太多
呢種無咁和諧嘅音樂，同古樂理念相反，就係「淫」啦 

荀子 樂論篇第二十
夫聲樂之入人也深，其化人也速，故先王謹為之文。……樂姚冶以險，則民流僈鄙賤矣；流僈則亂，鄙賤則爭；亂爭則兵弱城犯，敵國危之如是，則百姓不安其處，不樂其鄉，不足其上矣。故禮樂廢而邪音起者，危削侮辱之本也。故先王貴禮樂而賤邪音。
荀子好強調音樂嘅作用
「夫聲樂之入人也深，其化人也速」
音樂係世界語言，無論上下高低，都能夠受其感動
而且呢種感動呢種傳播，係可以好深遠好快速嘅 

但呢一樣嘢係雙面刃
音樂輕佻妖冶＞人民流俗、輕慢、卑鄙、下賤＞亂、爭＞國力變弱＞人地打到黎
「故禮樂廢而邪音起者，危削侮辱之本也」
雅樂廢除，邪音四起，咁呢個國家就一定會好危險 
因此荀子先會講：
「故先王貴禮樂而賤邪音」

夫民有好惡之情，而無喜怒之應則亂；先王惡其亂也，故修其行，正其樂，而天下順焉。故齊衰之服，哭泣之聲，使人之心悲。帶甲嬰冑，歌於行伍，使人之心傷；姚冶之容，鄭衛之音，使人之心淫；紳、端、章甫，舞韶歌武，使人之心莊。故君子耳不聽淫聲，目不視邪色，口不出惡言，此三者，君子慎之。

人就一定有愛憎，無一個方法應對就會好亂啦
荀子係到話：音樂係處理人感性心靈嘅工具
因此必須要「正其樂」，先會疏導到情感去好嘅方面 
音樂可以令人悲，令人傷，令人淫
而雅樂係可以令人莊重嚴謹
君子唔聽淫聲，唔睇邪色，唔出惡言 
因為咁樣會令自己嘅情感走向壞嘅方向

凡姦聲感人而逆氣應之，逆氣成象而亂生焉；正聲感人而順氣應之，順氣成象而治生焉。唱和有應，善惡相象，故君子慎其所去就也。……故曰：樂者、樂也。君子樂得其道，小人樂得其欲；以道制欲，則樂而不亂；以欲忘道，則惑而不樂。故樂者，所以道樂也，金石絲竹，所以道德也；樂行而民鄉方矣。故樂也者，治人之盛者也，而墨子非之。

衰嘅音樂，令歪風成為潮流
好嘅音樂，社會有和順之風
音樂嘅一唱一和，一定會影響到好多聽眾
造成百姓走向善又或者走向惡
正因為咁，君子對音樂嘅取捨係非常重要 

「樂者、樂也」
音樂，令人快樂，不過呢種快樂分兩種：
君子＞雅樂＞滿足於中正平和嘅旋律＞感受道德和諧之美＞樂而不亂
小人＞淫聲＞縱情於輕佻急快嘅旋律＞發洩欲望當做快樂＞惑而不樂

儒家談雅樂和淫聲之分，更重要係能否令人更有道德 
「故樂者，所以道樂也，金石絲竹，所以道德也」
雅樂令人快樂，亦都引導人修養道德
「樂行而民鄉方矣」
雅樂推行，人民就會跟隨呢種音樂，走向正途啦