突兀雪山，卷地而來，真似泉塘江上看潮時，添得此老心中十萬甲兵，是何氣象何雄且杰！妙在無一字豪宕，無一語險怪，又出以閑逸感喟之情，所謂骨重神寒，不食人間煙火氣者。詞境至此，觀止矣！
—— 鄭文焯《手批東坡樂府》評讚
—— 鄭文焯《手批東坡樂府》評讚
東坡 甘聲八州(寄參寥子)
有情風萬里捲潮來，無情送潮歸。問錢塘江上，西興浦口，幾度斜暉？不用思量今古，俯仰昔人非！誰似東坡老，白首忘機？
記得西湖西畔，正春山好處，空翠煙霏。算詩人相得，如我與君稀。約他年東還海道，願謝公雅志莫相違。西州路，不應回首，為我沾衣。
咩叫做方外之交呢？
本來係指言行超脫於世俗禮教之外嘅人
後黎就係僧道嘅代名詞
東坡識好多方外之交，尤其同參寥子交好
有一日佢地要離別，東坡因此寫下呢首絕妙好詞
絕妙在於：不見悲傷，知情超曠
有情風萬里捲潮來，無情送潮歸。問錢塘江上，西興浦口，幾度斜暉？不用思量今古，俯仰昔人非！誰似東坡老，白首忘機？
首句之妙，在於勸參寥子嘅機智
呢種對「情」嘅思辨，貫穿全詞
東坡借大自然之景象變化，附以「情」之詮釋
睇落幾合理，其實反點出情係人嘅主觀
一如花開花落、草青草枯
以至人嘅相聚離散，莫不合乎自然
潮來潮去嘅比喻，正係說明相聚有時而盡
緣起緣滅，反而係到同參寥子講：
唔好因為咁而傷心，一切都係順其自然咋！
「問錢塘江上，西興浦口，幾度斜暉？」
呢到嘅「問」，既點出空間，亦講時間變化
錢塘江、西興浦口，都係東坡同參寥子共遊嘅景地
佢地兩個曾經度過無數次日出日落
但東坡超越兩人嘅經驗，係到反問：
我地兩個共遊之前之後，錢塘江、西興浦口
唔係依然會繼續受陽光嘅洗禮咩？
人世間嘅自然變化，聚散離合，好正常啫
「不用思量今古，俯仰昔人非！」
東坡自答自解：人類面對時間嘅無情，空間嘅限制
好快咩都會物是人非，又有邊個可以解決呢？
呢到東坡不作濫情感傷之語，轉入更深刻嘅哲理
既然早知如此，何必執著呢
「誰似東坡老，白首忘機？」
「誰似」二字，似乎係同參廖子講：
你會唔會好似我咁忘掉情嘅好惡？
忘機，即無巧詐之心
忘掉彼此嘅猜忌，見出雙方嘅真性情
方外之交，要係面對離別時
超越悲歡，達至超曠，方不失其道呀
記得西湖西畔，正春山好處，空翠煙霏。算詩人相得，如我與君稀。約他年東還海道，願謝公雅志莫相違。西州路，不應回首，為我沾衣。
下半片回憶西湖西畔嘅美景，相聚嘅愉悅
空翠煙霏，乃指空曠山林，青翠欲滴，飽滿潤澤
化用王維《山中》二句
「山路原無雨，空翠濕人衣。」
春山空翠，煙霏迷離，隱約見出禪意
由白首忘機，到詩人相得，再至「稀」
係到講緊，好似我地咁有真性情
又可以超脫情困嘅人，真係好少呀！
「約他年東還海道，願謝公雅志莫相違」
典故嘅呈現，拉出歷史嘅縱深
呢邊引用謝安呢位人，佢年輕時已有名望，隱居東山
到四十幾歲先出仕，一直都記住東山
只等四海昇平，就要返去
可惜謝安最後病危回都，路經西州路，返唔到去啦
佢外甥羊曇，從此不走西州路
「一日，醉過其間，憶起謝安，為之淚下」
「雅志」，當然係東坡自言退隱之志
「西州路」，反用典故，自言唔會似謝安咁
故此參廖子都唔需要好似羊曇咁悲傷流淚
「不應回首，為我沾衣」，盡見東坡對參廖子嘅勸慰
承接全詞嘅機智，貫以真情，以求超越離別嘅悲哀
但係我地又可以諗：如果真係無情
如果真係可以完全超越到，咁仲點會寫詞相勸呢？
正因有情，方有此勸
始能令人讀之感嘆
有情無情，孰好孰壞，端看一心把持
No comments:
Post a Comment