我地曾經順序咁讀過：
性惡篇：荀子思想之基礎
禮論篇：「化性起偽」實踐嘅方向
天論篇：自然天之觀念
解蔽篇：「價值根源」重要嘅理論建構
勸學篇：修身嘅進行功夫
非相篇：反對迷信思想
非十二子篇：以儒家本位批評流行嘅六種學說
王制篇、王霸篇：王中有霸之政治觀
君道篇、臣道篇：古代廟堂政治管理思想
議兵篇、彊國篇：軍事政策之見解
富國篇：古代經濟學思想
樂論篇：講解儒家音樂之重要理論
正名篇：荀子之語言觀
經過上面嘅閱讀，我地已經睇哂荀子重要嘅篇章
其他篇章所提出嘅思想概念，都不出於以上十四篇嘅範疇
有兩篇係文學上特別值得一提：
成相篇：說唱文學嘅遠祖
賦篇：開創以賦為名嘅文學體裁
有興趣可以揾黎一讀
內容都係差唔多講過，但文句運用係特別嘅
去到最後，我地係唔能迴避一個重要問題：
讀左咁多篇荀子，咁到底我地而家要點樣評價佢呢？
我地不妨讀埋荀子全書壓卷之作
堯問呢一篇好明顯係荀子弟子撰文加上去嘅
可以視為真荀派弟子對荀子嘅評價
堯問篇三十二
為說者曰：「孫卿不及孔子。」是不然。孫卿迫於亂世，遒於嚴刑，上無賢主，下遇暴秦，禮義不行，教化不成，仁者絀約，天下冥冥，行全刺之，諸侯大傾。當是時也，知者不得慮，能者不得治，賢者不得使。故君上蔽而無睹，賢人距而不受。然則孫卿懷將聖之心，蒙佯狂之色，視天下以愚。《詩》曰：「既明且哲，以保其身。」此之謂也。是其所以名聲不白，徒與不眾，光輝不博也。今之學者，得孫卿之遺言餘教，足以為天下法式表儀。所存者神，所過者化，觀其善行，孔子弗過。世不詳察，云非聖人，奈何！天下不治，孫卿不遇時也。德若堯禹，世少知之；方術不用，為人所疑；其知至明，循道正行，足以為紀綱。嗚呼！賢哉！宜為帝王。天地不知，善桀紂，殺賢良，比干剖心，孔子拘匡，接輿避世，箕子佯狂，田常為亂，闔閭擅強。為惡得福，善者有殃。今為說者，又不察其實，乃信其名。時世不同，譽何由生？不得為政，功安能成？志修德厚，孰謂不賢乎！
當時有人批評：屌，荀子都唔係孔子個級數！
荀子嘅弟子就話：屌你，唔係咁架！
荀子根本就係為世所迫，生係呢個亂世入面
無賢主欣賞，秦國又大行霸道
「禮義不行，教化不成」
「故君上蔽而無睹，賢人距而不受」
荀子講嘅聖人之道，反而比人覺得係低能
「是其所以名聲不白，徒與不眾，光輝不博也」
荀子嘅學說，影響到後世好多人
荀子嘅善行，唔會差過孔子
「世不詳察，云非聖人，奈何！」
你地全部都誤解佢呀！
「為惡得福，善者有殃」
呢個世界，德福係唔一致嘅
但你地而家再讀荀子
「今為說者，又不察其實，乃信其名」
竟然唔能夠睇得出佢嘅道理
李澤厚係《中國古代思想史論》講：
從宋明理學到「現代新儒家」，都一貫抨擊荀子，表彰孟子，並以朱熹、王陽明直接孟子，認為這才是值得繼承發揚的中國思想史的主流正宗。而三十年來國內的研究則又大都只讚揚表彰荀的唯物論，或則抨擊他的尊君尚禮的法家傾向。這些似乎都沒有抓住荀的要害。孟子固然有其光輝的一面，但如果完全遵循孟子的路線發展下去，儒家很可能早已走進神秘主義和宗教裡去了。正是荀子強調人為，並以改造自然的性惡論與孟子追求先驗地性善論鮮明對比，才克服和沖淡了這種神秘方向；同時由於盡量吸取了墨家、道家、法家中的冷靜理智和重實際經驗的歷史因素，使儒學的重人為、重社會的傳統得到了很大的充實，從而把儒家積極樂觀的人生理想提高到「與天地參」的世界觀的崇高地位。
我地曾經講過荀子嘅歷史地位評價係「開高走低」
主要原因有兩個
1.學術研究
其實到左二十一世紀，係一個「荀學復興」嘅時代
其一係孔孟傳統嘅脈絡研究無咩新意，自然會轉向研究荀子啦
其二係現代學者對荀子有更深了解，唔再覺得係「歧出」
甚至有大陸學者提倡新四書，要列埋荀子入去
亦有人指出荀學同宋明理解嘅脈絡詮釋
可以預期荀子嘅地位係未來一定會得到提高
學術界嘅影響力雖然唔係咁快，但都值得我地期待嘅
2.歷史問題
我地當然可以理解荀子之學說
導出兩位重要嘅法家人物：李斯、韓非
但其實法家思想嘅脈絡，早就出現，本身就流傳係戰國時代
與其話荀子導出佢地，不如話係時代導出佢地
牟宗三都話戰國係一「純物量的精神」
荀子因應時代，企圖為使儒家學說更貼近現實
因為唯其如此，先唔係落入純理想嘅主義，只求內在德性
通過今次研讀荀子嘅思想，相信大家對呢個歷史問題會有更深刻嘅思考
非十二子：
士君子之所能不能為：君子能為可貴，而不能使人必貴己；能為可信，而不能使人必信己；能為可用，而不能使人必用己。故君子恥不修，不恥見汙；恥不信，不恥不見信；恥不能，不恥不見用。是以不誘於譽，不恐於誹，率道而行，端然正己，不為物傾側：夫是之謂誠君子。
要講到荀子思想能否應用於當下
不如反轉頭去睇，荀子思想係古代嘅用係咩？
發揮功用之後，今人如何轉化出新嘅思維？
對於古代思想，我閱讀果陣更關心係：
古人係古代呢個環境，佢嘅思想模式，點樣展開佢嘅思想論述？
古人係充滿局限嘅環境入面，用咩態度面對困難？
呢兩樣嘢，先係人類係呢個世界必然遇到嘅問題
我地用現今嘅知識，似乎好輕易就能夠批評：
古人諗嘢咁柒，有撚用咩？
古代嘅思想，當然唔可以套用係現代
但當中展現嘅思想模式、人生態度，係好值得參考
「以不誘於譽，不恐於誹，率道而行，端然正己，不為物傾側：夫是之謂誠君子」
儒家入面，特別強調人格美學，君子，本身就係美嘅呈現
雖然可能經過中學教育，會覺得好老土好教條
其實簡單黎講，都不出於「頂天立地，無愧於心」八個字
呢一樣嘢，往往係我讀儒家經典最能感受嘅人格美學
真正嘅儒者面對時代命限，展現嘅人生態度係好動人架
思想嘅契合，有時候係講性情、機緣
我都係無意間讀到荀子嘅思想
知道佢點樣被世人誤解
而佢又點樣積極咁面對時代問題
係孔孟之外，原來都仲有個荀子
希望呢一次係大家閱讀荀子嘅機緣啦！
No comments:
Post a Comment