「婉約」之作，儘管很重修辭，語言華麗，但大致都使用沒有典故出處的一般生活語言，不以「學養」作詞。但到了東坡，詞的語言便起了變化。這種變化有二方面，一方面是詞彙的選用，常出現由某些「典籍」而來的「學問語」。一方面是句子的構造，往往也出現類似散文的句型。「之乎者也」的關係詞、語氣詞都擺進去了。這種情況到稼軒詞更變本加厲。這就是「蘇辛詞」常被批評到的「以詩為詞」、「以文為詞」的現象。
——顏崑陽
——顏崑陽
我地講起「蘇辛詞」
成日都會見到「以詩為詞」、「以文為詞」
呢兩個中國文學批評用詞
到底係咩意思，有咩咁重要呢？
「以詩為詞」，最先用黎評論東坡
陳師道：
退之以文為詩，子瞻以詩為詞，如教坊雷大使之舞，雖極天下之工，要非本色。詞之本色，本來係專寫男女愛情
好多都係詞人代擬、想像之作
至於抒發自己嘅情感思想，係以詩呈現
但詞作發展到東坡，將詩嘅題材用係詞嘅創作
無意不可入，無事不可言
歷史典故、標題小序
本身係詩作常見嘅手法
一一挪用係詞作書寫
另外，東坡視詞作為獨立作品
唔再特意強求符合音律
東坡詞於是就有變格嘅效果
歷代評價，有讚有彈
但公認嘅係，東坡大大提升詞嘅地位
以詩為詞，令到後黎詞人用更多題材創作
「以文為詞」，起自評稼軒詞
毛晉〈稼軒詞跋〉：
宋人以東坡為詞詩，稼軒為詞論，善評也。
自東坡對詞體嘅一大破格
稼軒亦都繼續開拓詞作嘅題材、創作手法
好多辭賦古文嘅句式，都用係詞作到
故其詞之為體，如張樂洞庭之野，無首無尾，不主故常；又如春雲浮空，卷舒起滅，隨所變態，無非可觀。
敘事、議論、以至對話等散文句法
經史子哲、方言俚語，一一入詞
有人批評稼軒破壞詞之本色
亂咁過界，真係做壞哂規矩
但縱觀稼軒一生無數絕妙好詞
做到大文學家嘅隨手沾來，皆成妙章之境界
亦都係之後好多詞人跟隨嘅創作方向
呢種突破，於詞之創作大大有功
稼軒 沁園春(將止酒，戒酒杯使勿近)
杯汝來前！老子今朝，點檢形骸。甚長年抱渴，咽如焦釜；于今喜睡，氣似奔雷。汝說「劉伶，古今達者，醉後何妨死便埋」。渾如此，歎汝于知己，真少恩哉！
更憑歌舞爲媒。算合作人間鸩毒猜。況怨無小大，生于所愛；物無美惡，過則爲災。與汝成言：勿留亟退，吾力猶能肆汝杯。杯再拜，道「麾之即去，招則須來。」
詞題：將止酒，戒酒杯使勿近
稼軒六十三歲，大病一場
身體差，話自己要戒酒
警告酒杯唔好接近自己
呢首詞，好充份表現稼軒玩嘢一面
上半片假設同酒杯對話
睇落根本成首詞都係「寓言」黎
將酒杯變成一個活生生嘅人
兩個係到對話，真係好搞鬼！
「杯汝來前！老子今朝，點檢形骸」
稼軒係到講：
喂你同我過黎！
老子我今日檢查身體
先發現自己「長年抱渴，咽如焦釜」
成日口乾都係因為你害嘅
搞到我「于今喜睡，氣似奔雷」
我英雄黎，點可以成日眼訓
人地以為我有哮喘呀！
汝說「劉伶，古今達者，醉後何妨死便埋」
酒杯就答佢：
竹林七賢入面好鍾意飲酒嘅劉伶
人地話佢係古今通達之人
常乘鹿車，攜一壺酒，使人荷鍤而隨之，謂曰：「死便埋我。」
佢仲講過，醉死就埋葬我係到啦
名留青史，傳誦千古架！
「渾如此，歎汝于知己，真少恩哉！」
以前你成日話我係你知己
而家你身體唔好，竟然走黎怪我
你呢種人好無口德，好涼薄！
更憑歌舞爲媒。算合作人間鸩毒猜。況怨無小大，生于所愛；物無美惡，過則爲災。與汝成言，勿留亟退，吾力猶能肆汝杯。杯再拜，道「麾之即去，招則須來。」
鸩毒：鸩鳥羽毛有毒，用以泡酒，飲之即死
下半片又再次力數飲酒嘅壞處
一再回應酒杯嘅回答
借歌舞引人飲你
你地嘅合作簡直係人間嘅毒藥
「況怨無小大，生于所愛；物無美惡，過則爲災」
稼軒以文為詞，上面全是敘事
而呢幾句都係議論
唔似一般詩詞咁抒情寫景
正係以文為詞嘅特色之一
因為有愛，先會有怨
因為鍾意飲酒，先會過火
於是成為災難，於是有怨
物本身係中立嘅，睇人點對待啫
「與汝成言：勿留亟退，吾力猶能肆汝杯」
由此議論，稼軒同酒杯講
你唔好再留係到，即刻離開
而家我仲有力拋開你呢隻酒杯架
仲唔走，小心我發火！
杯再拜，道「麾之即去，招則須來。」
呢到寫得真係好好笑
酒杯同詞人拜別：
你叫我走咪走囉
不過你想飲我果陣
我隨時都係到等你架
呢種詞嘅寫法，係稼軒獨創
東坡應該發夢都諗唔到
原來詞仲可以寫到成篇寓言故仔咁
文學嘅創造，真係有無限可能
真所謂文成法立，創作永遠行係最前
好似稼軒呢種咁勇於突破嘅文學家
寫出一首咁特別嘅詞，令人大開眼界
No comments:
Post a Comment