講者若瞳
時雨をや、もどかしがりて、松の雪。
時雨啊，松樹顯得著急，等待下雪。
讀俳句嘅難處
唔止因為作品極簡，意思跳躍
有時涉及好多文化知識
例如呢句「時雨をや、もどかしがりて、松の雪。」
翻閱資料，句中本身只有雪係冬季語
而時雨、松和雪加埋
組成一個點樣嘅故事
係好難以捉摸
「時雨」
指秋冬之際嘅陣雨
據注本所講佢有染紅樹葉嘅能力
有時會比喻成淚水
點解「時雨」同「松」有關？
呢個可能見於另一位詩人嘅作品：
わが恋は松を時雨の染めかねて真葛が原に風さわぐなり。
詩中「松を時雨の染めかねて」
指松樹唔會被時雨染紅（詩人自比唔會變心）
其實呢個係關於植物嘅常識
松樹常綠，唔會有葉轉紅
但係古人眼中，多一個故事，多一層張力
時雨をや、もどかしがりて、松の雪。
時雨啊，松樹顯得著急，等待下雪。
此一俳句未必一定同戀愛有關
但必然表達唔耐煩嘅情緒
邊個唔耐煩？
又為了咩而唔耐煩呢？
句中有雨、松和雪
係咪句中隱藏嘅作者嘅不耐？
有一個解說，大意係咁：
將很多樹染成各種顏色嘅時雨
冇將松樹染色
松樹為此不耐煩同等待
雪降下來，將綠和白嘅對照美展現
咁講係比較合理
又貼近原來句意嘅理解
而且，咁樣解釋
句子嘅松樹擬人化
（不耐煩，又希望展現美態，爭妍鬥麗）
讀來更有趣味
呢個解說在語法上，都講得通
因為第二句係由「もどかしい+がる」組合而成
「がる」其中一個意思係表示第三身嘅情感
換言之，第二句或者可以譯成「他不耐煩」
亦即並非作者話自己唔耐煩
至於最初中譯末句為「待松上雪」
因為日語裡「まつ」可解作松樹和等待
相信句中也有呢種意味
No comments:
Post a Comment