作悲傷語讀便淺，作戲謔語讀便妙。
——施補華《峴傭說詩》
——施補華《峴傭說詩》
稼軒 西江月(遣興)
醉裏且貪歡笑，要愁那得工夫！近來始覺古人書，信著全無是處。
昨夜松邊醉倒，問松「我醉如何」？只疑松動要來扶，以手推松曰「去」！
呢首詞無法確定書寫時間
不過都無阻我地閱讀
詞題：遣興
即係抒發情懷，解悶散心
因此我地唔需要特定嘅背景
可以只從文本解讀
即可了解稼軒遣興之情
杜甫〈可惜〉：
寬心應是酒，遣興莫過詩。
酒和詩合一
寬心與遣興一體兩面
其實都係人應對悲劇、苦難嘅方法
此詞亦大有此一感慨
醉裏且貪歡笑，要愁那得工夫！近來始覺古人書，信著全無是處。
上半片已隱含悲情
稼軒飲到醉咗，點解會醉？
全因「愁」之一字
既然醉咗，就借酒歡笑
邊到有工夫去愁雲慘霧呢？
正係反面講緊
如果無飲醉，就唔到你唔愁啦
「古人書」，即係先賢聖人之書
中國傳統士人，當然要熟讀經史子哲
尤其稼軒呢種咁有才學嘅大文學家
對先秦諸子等經典，一定有好深刻嘅了解
但竟然去到「信著全無是處」嘅懷疑
呢種講法揭示稼軒重大嘅心理轉折
就算我地唔係話對儒家用世之思嘅挫敗失望
都唔能夠否認詞人推翻自己深信嘅價值觀
一無是處，亦係憤憤不平嘅反話
有種飲醉隨口講出嘅意氣說話
昨夜松邊醉倒，問松「我醉如何」？只疑松動要來扶，以手推松曰「去」！
下半片極具魏晉名士之遺風
尋晚飲醉，攤咗係松邊隔離
詞人好鬼馬咁問松樹：
我醉成點呀？好醉咩？
呢邊好生動咁描繪醉漢嘅on9
稼軒醉到覺得松樹要伸手扶佢
我根本就無醉，唔好扶我！
走呀你，睇小我！
我無醉呀，我行到直線架！
初讀時會覺得呢首詞很有趣
因為語言淺白，又寫得令人耳目一新
特別係借松樹表達自己醉中嘅狂態
以對話、動作呈現，更有畫面
呢一種醉後嘅狂態
好有名士嘅醉酒癲狂，一如竹林七賢
《世說新語．任誕》：
陳留阮籍，譙國嵇康，河內山濤，三人年皆相比，康年少亞之。預此契者：沛國劉伶，陳留阮咸，河內向秀，琅邪王戎。七人常集于竹林之下，肆意酣暢，故世謂「竹林七賢。」
竹林七賢為名士之代表
其中一個特色係大家都借酒後狂放
表達對朝野昏庸，社會黑暗嘅不滿
因此，呢種狂放其實係「頹放」
稼軒此一「頹放」
當然係對應主和嘅南宋啦
以戲謔表達深藏嘅情感
相對直接抒情之句
更令人玩味，更有細味之處
睇落直接簡單，但內心情感曲折
愈係戲謔，愈係悲涼
反差嘅文學表達，令作品更具張力
No comments:
Post a Comment