稼軒中秋飲酒達旦，用《天問》體作《木蘭花慢》以送月曰：「可憐今夕月，向何處，去悠悠？是別有人間，那邊才見，光影東頭？」詞人想像，直悟月輪繞地之理，與科學家密合，可謂神悟！
——王國維
——王國維
稼軒 木蘭花慢(中秋飲酒，將旦。客謂前人詩詞有賦待月、無送月者，因用《天問》體賦。)
可憐今夕月，向何處，去悠悠？是別有人間，那邊才見，光影東頭？是天外，空汗漫，但長風浩浩送中秋？飛鏡無根誰繫？姮娥不嫁誰留？
謂經海底問無由，恍惚使人愁。怕萬里長鯨，縱橫觸破，玉殿瓊樓。蝦蟆故堪浴水，問云何玉兔解沉浮？若道都齊無恙，云何漸漸如鉤？
中國文學傳統，中秋係好重要嘅
中秋賞月，文人許多詠月之作由此而出
賞月既係民俗節慶，又係文人歌詠嘅日子
附庸風雅，千古以來至今
都唔知因為呢日累積幾多詠月文句
舊題難寫，名詞難解
全因前人之歷史累積深厚
要再寫得更好，解得更好係好難嘅
好似以一人之力對抗千軍萬馬
能夠別出心裁，變出新解妙語
往往非大文學家、大文評家不可
詞題：
中秋飲酒，將旦。客謂前人詩詞有賦待月、無送月者，因用《天問》體賦。
詞人中秋飲酒賦詞
諗起前人都係講等待月亮
而無送別月亮，特寫此詞送月
稼軒此一詠月詞，發前人之未發
有趣嘅係，呢種破格係建基於前人
《天問》，乃屈原所寫嘅楚辭
全篇皆在發問，問天地萬物之事理
稼軒則借此一寫法，借昔日另一大文學家之力
突破咗千古以來詠月之作嘅面貌
稼軒 木蘭花慢(中秋飲酒，將旦。客謂前人詩詞有賦待月、無送月者，因用《天問》體賦。)
可憐今夕月，向何處，去悠悠？是別有人間，那邊才見，光影東頭？是天外，空汗漫，但長風浩浩送中秋？飛鏡無根誰繫？姮娥不嫁誰留？
空汗漫：空虛莫測，廣大無際
上半片全是問句，此乃《天問》特色
我地曾經讀過：
東坡嘅水調歌頭(丙辰中秋，歡飲達旦，大醉，作此篇，兼懷子由。)
整首詞加埋先得四句問句，已經算好多
單以呢首詞上半片論，有五句問句
問句，即疑問、質疑
同時提問亦係暗示回答嘅可能
如果無問題，就唔會出現答案
「可憐今夕月，向何處，去悠悠？」
第一問：
今晚月亮要去邊呢？
「可憐」二字
當然係講月亮之孤寂
點出了「送月」之主題
詞人遠望月亮，正係目送
「是別有人間，那邊才見，光影東頭？」
第二問：
係咪別有另一個人間
月亮係呢邊逝去
正係另一邊嘅人間出現
照亮東邊嘅人？
必須留意，古代唔知地球係圓架
稼軒呢一問句，好似好普通
但其實正係超越時代嘅想像，並唔簡單
莫怪乎王國維會驚嘆：
詞人想像，直悟月輪繞地之理，與科學家密合，可謂神悟！
「是天外，空汗漫，但長風浩浩送中秋？」
第三問：
月亮去到天外之境
去到一切空虛莫測，廣大無際嘅地方
係咪得長風吹動月亮嘅運行？
以上三句，皆緊扣「送月」
環環相扣，問問連繫
月亮隨稼軒想像，愈送愈遠
「飛鏡無根誰繫？」
第四問：
飛鏡喻月亮之形
月亮無根，隨處飄浮
係咪有邊個會用繩拉住佢？
「姮娥不嫁誰留？」
第五問：
嫦娥留係月宮唔出嫁
又係邊個留人住佢？
係咪真係諗住孤獨一世？
由物理之問，以至到文化之問
由外在而至內在之發問
下開下半片之詞句
謂經海底問無由，恍惚使人愁。怕萬里長鯨，縱橫觸破，玉殿瓊樓。蝦蟆故堪浴水，問云何玉兔解沉浮？若道都齊無恙，云何漸漸如鉤？
下半片先是敘述，再發二問
詞人嘅想像，自嫦娥之問連繫至神話傳說
送月之後，月至何方？
聽人講月亮會潛入海底
但要搵人問清楚，又唔知問邊個
稼軒唔係科學家，愈諗愈愁
文學家依靠嘅想像之美之奇
因此稼軒係到講：
月亮如果真係會潛入海底
唔驚被萬里長鯨縱橫觸破咩？
玉殿瓊樓，仲唔爛哂！
「蝦蟆故堪浴水，問云何玉兔解沉浮？」
第六問：
水中嘅蝦蟆就話識游水
咁月宮嘅玉兔咪會浸死哂？
愈諗愈奇，真係文人多FF
「若道都齊無恙，云何漸漸如鉤？」
第七問：
稼軒結束一問，問得好有意思
如果月宮無事，又點會慢慢變成殘月？
此問一出，又將下半片合作一主題
月圓月缺之自然現象
千古至今確實連繫幸福、不幸之想像
稼軒呢首詞作真係有趣
如此神思妙想，唔止係詠月之突破
即使置於歷伐以來詞體之書寫
連用問句，亦係破格創新
真係FF得出神入化，令人讀之驚嘆！
No comments:
Post a Comment