已外生矣，而後能朝徹；朝徹，而後能見獨；見獨，而後能無古今；無古今，而後能入於不死不生。
——莊子
——莊子
稼軒 生查子(獨遊雨巖)
溪邊照影行，天在清溪底。天上有行雲，人在行雲裏。
高聲誰和余？空谷清音起。非鬼亦非仙，一曲桃花水。
詞題「獨遊雨巖」
雨巖係江西博山附近
岩中有泉水湧出，因而名之
最值得玩味，係獨遊二字
古人遊山玩水
好多時候都會相約一齊
獨遊無咁安全，易出意外
即使去到今時今日
獨遊都唔係常態主流
一個人去旅行
多少都有特別嘅諗法
伴隨與眾不同嘅感受
溪邊照影行，天在清溪底。天上有行雲，人在行雲裏。
上半片好似寫得好淺白
稼軒在溪邊走過，水映照出身影
天空亦都照入清澈嘅溪水
人與天，以水相連
因此天上流動不休嘅雲在水中
詞人嘅身影亦係水中，與雲共行
如果稼軒與人共遊
九成九一定唔會有呢種感受
獨遊之樂，在於一切操之於手
不必著急，不必交流
細細品味大自然嘅美麗
甚至同外在景物合而為一
大文學家，能夠言淺意深
即係人人意中所有
但人人筆下所無
呢四句，我地或者都曾有相似感受
卻無能力咁簡單直接呈現
而且讀之動人，絕不簡單
高聲誰和余？空谷清音起。非鬼亦非仙，一曲桃花水。
下半片深入人與自然之共鳴
稼軒放聲高歌
忍唔住問：邊個黎應和我呢？
此一發問，坊間解讀會係話
稼軒內心充滿憤慨不平
表達為世所迫，懷才不遇之悲
然而，單以詞作而論
縱觀全詞脈絡
更著力呈現精神與自然之連繫
獨與天地精神往來，而不敖倪於萬物。不譴是非，以與世俗處。
莊子之見獨，在於不依外物
而以獨立健全之身心，化入大自然之萬物
因此稼軒之問，回應係平和達觀
「空谷清音起」
係空曠嘅山谷，有清音應和
「非鬼亦非仙，一曲桃花水」
蘇軾《夜泛西湖五絕》：
湖光非鬼亦非仙，風恬浪靜光滿川
此一清音，唔係鬼亦唔係仙
而係一灣桃花旁邊流轉不休嘅清泉之聲
與其話稼軒心生不滿
倒不如講詞人係獨遊之中感通自然
人在水中，在雲中，在自然之聲中
大有莊子嘅獨與天地精神往來之境界
即使世間無人理解自己嘅心聲
但大自然就係最好嘅知音
流水不止，清音不絕
清溪、藍天、行雲、山谷、桃花水
稼軒之獨，比他人之眾更加豐富
此詞有東坡詞哲理之高度
各位不妨一讀再讀，細細品味
或者有一日，當你去獨遊
都能夠感受稼軒感通大自然境界
No comments:
Post a Comment