[古典文學入門（六）EP.25]何來Happy Ending？人生是永遠的動態歷程 ——李清照講後記

夫人幼有淑質。故趙建康明誠之配李氏，以文辭名家，欲以其學傳夫人。時夫人始十餘歲，謝不可，曰：「才藻非女子事也。」
——陸游《夫人孫氏墓志銘》

巴打問：李清照最後係點死架？
乍看之下，一時間我唔太想回答，因為唔會令人開心
然後我開始諗，係我講過嘅咁多文人之中
到底有邊個係真正有所謂嘅Happy Ending呢？

竹林七賢大多都冇好嘅下場
如嵇康、如阮籍、如劉伶，不容於世，生於非命
辛棄疾至死不得志，懷住一股悲憤病逝
李商隱為情所困，因愛痴狂
即使係蘇東坡嘅豁達，仍然記住夜雨對床
就算係陶淵明嘅隱逸，都係看不破生死大難



李清照，一位活於古代，唔「安份守己」嘅女性
相公冷落，慘成寡婦，再嫁離異，政治壓迫，受人非議
似乎注定比起上面咁多位男性更加悲慘
李清照嘅才華，嘅抱負，嘅勇氣，難能可貴
可惜嘅係，係中國古代完全不受重視

晚年之時，李清照已經係大隱隱於市
專心做自己嘅事，唔太問世事，反正都無能為力
不過有唔少因為李清照嘅文名、才華拜訪佢
其中有一對夫婦嘅女兒，好似好聰明咁
李清照唔想畢生之學失傳，想將真傳傾囊相授

夫人幼有淑質。故趙建康明誠之配李氏，以文辭名家，欲以其學傳夫人。時夫人始十餘歲，謝不可，曰：「才藻非女子事也。」

呢位女仔大過咗，結婚再過世之後
南朝文人陸游仲為佢寫墓誌銘，記低咗呢件事
佢即使只係得十幾歲，但生於男尊女卑嘅古代：
「呢位婆婆，女子無才便是德囉，唔該啦，我唔想學呢種嘢囉！」
呢種就係李清照一直以來受到文化壓抑嘅象徵
之後冇幾年，李清照逝世

文學並唔一定「導人向善」，亦難以改變世界
一位又一位嘅文學家，即使成就再高
原來都無所謂嘅Happy Ending，咁樣我地閱讀嘅意義喺邊呢？
如果我地願意接受虛假、靜態、片面嘅人生
就好似童話故事入面，會有個凝結於一刻嘅完滿結局



好嘅文學會誠實而殘酷咁告訴你：
人生本來就無永遠嘅Happy Ending，每刻都變化
我地面對生命唔同嘅階段，都必定有唔同嘅難題要面對
唯有坦誠直視呢種事實，我地先可能透過理解進而取得智慧
種種文學家之典範，都係自己不斷變化嘅生命之中
面對難題，作出回答，正同我地嘅人生一樣

亦係如此，我地先會容許、看見生命有更多嘅可能
李清照唔止係古代嘅「情人典範」，唔止係傷春悲秋嘅兒女私情
陶淵明、蘇東坡除咗豁達，也有許多無法解決困境
辛棄疾、李商隱亦有超脫，竹林七賢自具風流之美
因為看見，因為了解，呢份生命經驗將會陪伴你
於變幻才是永恆，充滿變數嘅一生
讓自己從單一解放，更加坦誠與寬容，更具智慧

2018年，轉移重心，去搞Medium
有各式各樣嘅文章，天文學、文學、評論咁
都可以因應興趣入去我地嘅Medium睇：
https://medium.com/%E5%BE%B7%E5%B0%BC%E6%80%9D%E5%8C%96
最好Like埋我地個Page啦，支持吓講者：
https://www.facebook.com/%E5%BE%B7%E5%B0%BC%E6%80%9D%E5%8C%96-1410350102358414/