[古典文學入門（五）ep.1]《世說新語》係咩書？劉義慶係咩人？

《世說新語》一書記述得挺生動，能以簡勁的筆墨畫出它的精神面貌，若干人物的性格，時代的色彩和空氣。文筆的簡約玄澹尤能傳神。
——宗白華

上次引子講咗《世說新語》嘅時代背景
但要了解一本書，最緊要知邊個寫呢本書 
作者已死（真係死咗成千年）
但其靈魂係不滅架（對作品嘅影響）！ 

《世說新語》嘅編者係劉義慶
點解要講編者，而唔係作者呢？
因為呢本書極大部份都唔係出自佢筆下 
佢係劉宋開國君主劉裕細佬嘅次子
佢嘅叔父無仔女，劉義慶就過繼給叔父為後
上面嘅重點係想話比大家知：
劉義慶係一個有權有勢有錢嘅人 



父幹未必一定成功 
劉義慶細細個就好鍾意讀書
大個請咗班文人做手下
宋初，東晉清談結束無耐
劉義慶對兩晉士大夫嘅言行相當熟悉
加埋前人著作、文士協助
終於編出了一部集大成嘅「軼事」小說：
《世說新語》，名留青史 

除此之外，佢仲有：
幽明錄三十卷、徐州先賢傳十卷、集林二○○卷
宣驗記十三卷、後漢書五十八卷、文集八卷
其實一個人邊有咁多心力編咁多書 
好有可能，只係佢有做呢件事嘅諗法
主力靠佢手下堆文人做事 



《世說新語》原名《世說》
唐代稱《世說新書》
漢代劉向寫過本叫《世說》，早已亡佚 
去到宋代，大家唔想同劉向本書撞名，改稱《世說新語》
呢本睇落瑣碎雜錯，其實係豐富內容嘅書
魏晉時代尚清談，助談之書興起
咁多本筆記小說入面，呢本係寫得最出色架！ 
成本書一共記一千一百三十則軼聞瑣事
多係東漢至東晉二百三十年間
高士清談玄言、人物評論和機智對應嘅故事 



全書有三十六門 
依照性質可以粗分為四個部分：

(1)描寫魏晉士人嘅道德修養
〈德行〉、〈方正〉、〈雅量〉、〈賢媛〉
(2)描寫魏晉士人嘅才能稟賦
〈言語〉、〈捷悟〉、〈夙慧〉、〈排調〉、〈輕詆〉、〈假譎〉、〈文學〉、〈術解〉、〈巧藝〉、〈識鑒〉、〈賞譽〉、〈品藻〉、〈容止〉
(3)描寫魏晉不同人物嘅情感特性
〈自新〉、〈企羨〉、〈豪爽〉、〈傷逝〉、〈任誕〉、〈簡傲〉、〈儉嗇〉、〈汰移〉、〈忿狷〉、〈尤悔〉、〈紕漏〉、〈惑溺〉、〈仇隙〉
(4)描寫魏晉不同人物嘅官場或日常生活
〈政事〉、〈規箴〉、〈棲逸〉、〈寵禮〉、〈黜免〉、〈讒險〉

以上分類，緊係有例外、重疊嘅地方
《世說新語》描述到竹林七賢，分別有十六門 
當中尤以〈任誕〉、〈簡傲〉有大量記述
《世說新語》中對竹林七賢嘅集中記載
正係比我地由七賢言行了解魏晉名士嘅形象
我地唔單止要講竹林七賢
更係要從竹林七賢了解成個魏晉名士嘅時代！