[古典文學入門（五）ep.2]竹林七賢之聚！兼談魏晉名士風度

「漢末魏晉六朝是中國政治上最混亂、社會上最痛苦的時代，然而卻是精神史上極自由、極解放，最富有智能、最濃於熱情的一個時代。」
——宗白華

我地成日用名士形容竹林七賢
咁到底咩叫名士？ 
名士又同魏晉時代有咩關係？
過咗魏晉之後仲有冇名士？

「名士」呢兩字，本係泛指高尚、有名望嘅人 
《後漢書》：
漢世之所謂名士者，其風流可知矣。雖弛張趣舍，時有未純，於刻情修容，依倚道藝，以就其聲價，非所能通物方，弘時務也。
牟宗三《才性與玄理》：
「名士」者，清逸之氣也。風流者，如風之飄，如水之流，不主故常，而以自在適性為主。故不著一字，盡得風流。
即係名士呢種人嘅特色係風流
風流唔係話今日果種玩女
而係形容一個人嘅生命氣質
唔會受外在傳統限制
以自己嘅才性、性格為重 

名士呢，到咗後世
著重文化義，即其內在人格對外世應對而成嘅風度、形象
名士歷代典範不脫竹林七賢 
描述竹林七賢嘅言行風格，大多出自《世說新語》
如果要了解竹林七賢嘅名士典範
就一定要講《世說新語》啦！ 



不過千其唔好以為大家都讚名士 
王恭︰
名士不必須奇才，但使常得無事，痛飲酒，熟讀《離騷》，便可稱名士。
袁宏道《與潘景升》：
世人但有殊癖，終身不易，便是名士。如和靖之梅、元章之石，使有一物易其所好，便不成家。縱使易之，亦未必有補於品格也。
名士呢種人真係好MK
成日扮哂嘢，扮哂勁
有咩標奇立異就話係名士 

後人對名士嘅批評好多 
甚至將好多傷風害俗嘅事推落竹林七賢
清代《歷朝史案》：
晉代清談之害，沿及江左，皆七人為之濫觴也。
但係事實係咁真係咁？
竹林七賢又點解會做出咁多奇行怪事？ 



《世說新語．任誕》：
陳留阮籍，譙國嵇康，河內山濤，三人年皆相比，康年少亞之。預此契者：沛國劉伶，陳留阮咸，河內向秀，琅邪王戎。七人常集于竹林之下，肆意酣暢，故世謂「竹林七賢。」

阮籍、嵇康、山濤年紀一樣
加埋劉伶、阮咸、向秀、王戎七個
成日係竹林肆意酣暢，清談不倦 
當時已經有人叫佢地做「竹林七賢」

其實「竹林七賢」唔係學術、政治組織
佢地係一段時間玩埋一齊 
其實呢段時間好短
大約係正始末年到嘉平年間嘅五、六年

點解「竹林七賢」會聚集埋一齊？ 
宗白華在《論〈世說新語〉和晉人的美》：
漢末魏晉六朝是中國政治上最混亂、社會上最痛苦的時代，然而卻是精神史上極自由、極解放，最富有智能、最濃於熱情的一個時代。



魏晉時期，係社會急劇變化嘅大動盪時期
曹魏同司馬氏集團為皇權而明爭暗鬥
嘉平元年，司馬氏暗佈兵力，發動「高平陵之變」 
誅殺曹爽等三族，手段殘暴
《晉書．宣帝紀》：
支黨皆夷三族，男女無少長，姑姊妹女子之適人者，皆殺之。
女人細佬仔都殺哂
真係斬草除根，好鬼惡毒 

因為呢件事殺戮太多，天下名士減半
留係朝中嘅人紛紛逃逸、觀望
初進仕途者，如阮籍、嵇康、山濤等人選擇退隱山林
所以先會出現「竹林之聚」 

「竹林七賢」嘅出現，係正直文士嘅自全之計 
係朝中稍有不慎，隨時有殺身之禍，仲可能誅連三族
後黎，司馬氏漸漸掌權，操縱天下
竹林七賢各散東西，或捨生取義
或折衷求全，或熱衷仕途 

竹林七賢嘅放浪形骸，全因無法實現理想
但現實又唔比佢地真係離開
進退之間，無法直言嘅苦況 
唯有以慎重嘅言詞、怪誕嘅行為
表達自己內心嘅痛苦掙扎

咁樣嘅歷史情境
普遍士人嘅不確定感
魏晉名士嘅價值觀好多都係虛無、蒼涼
隨時都可能失去生命
無一個可供安身立命嘅所在