談妓女同文人之間特殊關係
正如小貓咪絲打提及：
「唐朝伎女地位不低
更有官伎一職
伎女才學有要求
不少伎女詩作流傳後世」
根據一本有趣嘅書《中國娼妓史》
指出中國最初「伎」，係宗教跳舞唱歌嘅人
最初「伎」係不分男女嘅，而且唔係負面
隨住社會愈黎愈文明啦
就開始由政府管理而有明確制度
而且以女性為主
變成左「妓」啦
大致分作：
1.宮妓(分可出官同不可出官)
2.軍妓(唔需要多講啦)
3.家妓(有錢人玩意)
4.私妓(自己做生意)
李商隱身處嘅晚唐時代
長安有個叫「教坊」
係專門訓練、管理妓女嘅地方
唐代孫棨見證左呢個晚唐妓女文化
寫左本叫《北里志》嘅書
「京中飲妓，籍屬教坊，凡朝士宴聚，須假諸曹署行牒，然後能致於他處。……諸妓皆居平康里，舉子、新及第進士、三司幕府但未通朝籍未直館殿者，咸可就詣。……」
總之妓女服務主要嘅對象係：
1.啱啱考上進士嘅人
2.黎長安考科舉嘅人
3.豪門貴戚有錢嘅人
當時佢地Sell嘅主要唔係肉體
而係Sell佢地嘅talent，佢地嘅才學
無題兩首其二(重幃深下莫愁堂)
重幃深下莫愁堂，臥後清宵細細長。
重幃：室中多層嘅窗簾
莫愁堂：莫愁本是以前有名嘅歌妓，成為妓女代名詞
無題詩充分表現左文學嘅多向詮釋
沒有標準答案，只有更好嘅解讀
呢兩首無題詩千古以來有好多唔同嘅讀法
而結合黎理解，會比單獨去睇，更能理解當中嘅深意
如果上一首講緊抒發對情人嘅思念
呢到更進一步去描述李商隱思念之情有幾深
首先佢係到想像對方嘅日常生活
係層層疊疊嘅簾幕之間透視愛人身影
半夜間醒來，時間係漫長，已經訓唔返
時間本來係就係咁樣流逝
「細細長」係一種寂寞嘅心理
寂寞難耐，令時間亦難耐
神女生涯原是夢，小姑居處本無郎。
「神女」同「小姑」都係特別嘅文化象徵
戰國時有個叫宋玉嘅文人，好鍾意FF神仙同皇帝搞野
寫左《神女賦》、《高唐賦》
「旦為朝雲，暮為行雨。朝朝暮暮，陽台之下。」
巫山雲雨，形容性愛嘅四字詞正係出自呢到
正因為咁
後人成日用仙女、神女黎做妓女嘅代名詞
六朝《神弦曲．青溪小姑曲》其一曰：
「開門白水，側近橋樑。小姑所居，獨處無郎。」
小姑個故仔係未結婚就死左嘅悲劇
代表左得唔到好嘅歸宿
妓女嘅愛情生涯，成日只會係一場「夢」
「夢」係假嘅，係會醒嘅虛幻
因為古代女性最大嘅夢想係有一個完整嘅家
但要從良，又談何容易呢？
結局只會好似「小姑」咁未嫁而卒
呢到盡見李商隱對情人嘅憐惜之情
妓女嘅愛情，始終唔係合於倫理
好難會真係登堂入室，有好多壓力
「神女」同「小姑」，都意味無結婚
從古典愛情而言，得唔到好嘅歸宿
唔可以「男有分，女有歸」
係女性人生一大不完滿嘅象徵
風波不信菱枝弱，月露誰教桂葉香。
月露：月光下嘅露水
我地讀詩一定要從實解中睇到佢嘅虛意
風吹菱枝，露水沾草，本來都係客觀嘅實際情況
但「不信」、「誰教」卻係詩人嘅主觀之情
「風波」講嘅係環境，係妓女悲慘嘅人生
呢一種困境，摧殘緊脆弱如菱枝嘅愛情
詩人用事物間共同相似嘅地方
去形容佢地愛情嘅悲劇
「月露」係雨露之恩嘅男女恩情
邊個好似露水一樣咁愛護桂葉呢？
李商隱呢到正正暗示
如果可以，佢願意
直道相思了無益，未妨惆悵是清狂。
李商隱已經一早明白，佢迷失係呢場愛情遊戲
唔會有完滿結局，唔會白頭到老
本身就係唔合於倫理嘅愛情關係黎
所以佢幾乎係好灰、好絕望咁講：
即使抒發再多呢種相思之情，又有咩用呢？
但下一句又係相反意思
「未妨」，係描述佢矛盾嘅心理狀態
好似佢咁浪漫多情嘅人，即使理性明白係無好結果
但佢嘅感性壓低左理性，根本停唔到去掛住人地
因為「清狂」係一種「不狂似狂」嘅形容
「如今白痴也」，為愛情而痴狂
呢種無結果又不受控嘅思念，造成惆悵悲愁之情
又何嘗唔係我地成日係愛情經驗到嘅事呢
呢一首無題寫得真係好好，道出愛情悲劇嘅惆悵
我地一齊再細細品嚐一次：
重幃深下莫愁堂，臥後清宵細細長。
神女生涯原是夢，小姑居處本無郎。
風波不信菱枝弱，月露誰教桂葉香。
直道相思了無益，未妨惆悵是清狂。
No comments:
Post a Comment