古人大多用「知人論世」嘅方法強行實解
咩係「知人論世」呢？
就係主張用作者嘅生平同時代社會嘅方法讀詩
個人生平+時代政治+作品年表
例如話李商隱係香港1997年寫左一首詩
就會用黎推論呢首詩一定係講緊香港回歸
就算睇落去唔似，都會勉強解釋到似
呢種方法唔係唔可以用
但好多時古人只係用死呢種方法
尤其係解釋李商隱嘅情詩
強求實解，而年表並不可信
落於俗套，將詩歌美感扼殺
最顯著嘅例子，莫過於我地今日讀嘅呢首無題詩
無題
相見難時別亦難，東風無力百花殘。
東風：春風，指春天
以情解詩，起首已經感到呢首詩嘅精彩
無題詩最吸引人嘅特色
就係在於以個別具體嘅情況
表達出人類普遍嘅情感經驗
呢一種感情，呢一種經驗
係你我都會感嘆，好似特登為我地而寫咁
「難」是此詩嘅關鍵
世間愛情之所以令人覺得偉大
往往在於「難」，兩情相悅而有無法違逆之阻隔
我地會想像，到底係點樣嘅問題呢？
距離？
戰亂？
倫理？
生死？
難於相見，相見後不知何時再會
難上加難，令人不忍別離
前面係事實描述，後面係詩人嘅高超想像
春天既講現實，又係象徵愛情
「無力」係講緊春天結束，又係話無能為力改變
「百花殘」嘅悲慘淒美，遍地殘花
令詩人聯想到自己愛情嘅悲劇
春蠶到死絲方盡，蠟炬成灰淚始乾。
整首詩最出名嘅句子
正正反映左詩人嘅天才，譬喻嘅高明
譬喻嘅動人，在於係日常生活普遍會見到嘅事物
係好淺白好貼近古代嘅生活
將「春蠶」、「蠟炬」呢種共同生活經驗
昇華到人生愛情之譬喻
令人一讀就能感受當中感情嘅深厚
呢到有趣嘅地方係，「絲」係「思」嘅諧音
用「春蠶」嘅吐絲情況，轉入情人無盡嘅思念
俗語去講
即係話我愛你愛到我死果日
哇，呢一種本來係聽人都想嘔咁講法
詩人卻用譬喻令我地深刻感受到呢一種感情
「蠟炬」除左係日常生活經驗
試想像火光搖曳嘅情況，都象徵左好多嘢
係光明？
係不安？
定係燃燒自我？
「淚」既係蠟炬，亦都係愛情之悲
「絲方盡」、「淚始乾」
同樣都係一種漫長嘅相思之苦
詩人將抽象嘅愛情思念過程
具體咁用譬喻表達出黎
由抽象到具體，先會感動人心
曉鏡但愁雲鬢改，夜吟應覺月光寒。
經過漫長嘅愛情折磨
經過不可阻擋嘅愛情之難
詩人由普遍情感轉入個別嘅生活
照鏡時擔心頭髮花白，年華老去
晚上吟詩時覺得月亮特別淒冷
呢邊我地可以想像一個情景
兩句係一女一男，互相思念彼此
而又遠隔天涯，只能各自悲傷
簡直就係你的名字嘅情節
蓬山此去無多路，青鳥殷勤為探看。
蓬山：蓬萊仙境，情人住嘅地方
青鳥：神話入面嘅信差
你住嘅地方，並唔係好遠
但係正所謂愛情最遙遠嘅距離
並唔係我同你相距好遠
而係我地地明明咁近，偏偏又好似遠隔天涯
既然我地暫時仲未可以改變現實
唯有希望我寫嘅信
能夠好似我親身探你一樣
或者文字可以令我地渡過呢個難關
「青鳥」呢個比喻係好生動嘅
我地又睇睇古人點解呢首詩
張爾田話係李商隱對令狐家族嘅告白
以青鳥自比，表達自己嘅心意
張嘅理由係：「確定是時作，觀起語自悟」
即係佢假設係某年有件大事發生
所以呢首詩就係咁解啦
但根據竟然係話睇到第一句就突然領悟到個年份
真係吹得就吹，事實嘅判斷，又點可以咁呢
呢種古人解讀方法，並唔係得佢係咁架
「知人論世」一誤用左
簡直就係局限左成首無題詩嘅多向詮釋
李商隱故意用無題目，就係唔想咁呀大佬
所以話，古人講嘢有時都傻傻地
大家再用正確嘅態度讀一次啦：
無題
相見難時別亦難，東風無力百花殘。
春蠶到死絲方盡，蠟炬成灰淚始乾。
曉鏡但愁雲鬢改，夜吟應覺月光寒。
蓬山此去無多路，青鳥殷勤為探看。
No comments:
Post a Comment