就算唔知佢生平
都可以感受到佢有幾受愛情折磨
幾乎首首寫愛情都係悲哀
可以想像，李商隱受情所困
愛情對於佢，係一件好重要嘅事
李商隱係同王茂元個女結婚之前
幾段愛情都係悲劇收場
結婚之後，雖然老婆都好好
但因為李商隱「沈淪下僚」成日走黎走去
佢地都係聚少離多，無點安定落黎
而佢老婆又早死過佢，對佢打擊好大
一個人咁受愛情所折磨
好自然係會尋求超脫被情所困嘅方法
所以李商隱對佛教道教都好有研究
我地係好多詩入面見到佢用佛道典故
來是空言去絕蹤，月斜樓上五更鐘。
第一句就充分講左愛情常見嘅悲哀：失約
能夠將情人失約，不守諾言嘅情況
用短短一句就講哂出黎
「空言」，乃指早有諾言
「絕蹤」，講緊不見蹤影
大家不妨記低呢句，將來實有機會用
第二句講緊詩人係相約之地苦等
好似大家平時係街邊等人咁
「月斜」，望住月光漸漸推移
影子慢慢被月光擠開
「五更鐘」都打響啦，已經就快天光
情人嘅身影，情人嘅諾言
到底去左邊呢？
夢為遠別啼難喚，書被催成墨未濃。
你知唔知道，我又夢見你啦
係夢入面，我地分開得好遠好遠
而我心入面係知道，呢次之後我地唔會再見
我不斷咁喊住叫你個名，但係你
但係你無再轉頭望我一眼
我好急好急咁寫左封情書
墨汁都未磨得好
但我怕慢左呢一秒，就錯失你
就算寫出黎嘅字唔好睇
我都無所謂，我一定要寫呢封信比你
金翡翠：以金絲線綉成翡翠鳥圖案嘅幃幕
麝薰：麝香薰染
微度：輕輕飄入
繡芙蓉：繡上芙蓉圖案嘅斗帳
上面四句係李商隱嘅自白
到左呢兩句，李商隱等唔到回覆
詩人已經開始走火入魔
瘋狂FF呢位失約嘅情人到底做緊咩
比情人放飛機，加埋不見蹤影
李商隱就係到幻想，其實佢係咪陪緊第二個人？
佢唔再搵我，係咪因為有更好嘅歸宿？
佢係咪係床到，同其他人做緊平時同我做嘅事？
呢到嘅「蓬山」係神仙典故
好耐以前，有兩個人叫劉晨、阮肇
佢地有日行山迷路，咁就遇見山中仙子
仙子仲做埋老婆，過得好開心
點知落山先發現原來已經過左幾百年
仲要返上山已經搵唔返仙子啦
詩人係呢邊嘅比喻係好癲嘅
典故入面，劉郎已經好慘，好想搵返仙子
而李商隱竟然話自己希望見返情人
仲要比劉郎難上一萬倍
李商隱就好似墜入左無窮無盡嘅愛情困局
不斷嘅等待，不絕嘅失望
係神仙典故入面，反而見到自己嘅悲哀
種種焦慮，形成佢對愛情瘋狂嘅幻想……
無題四首其一
來是空言去絕蹤，月斜樓上五更鐘。
夢為遠別啼難喚，書被催成墨未濃。
蠟照半籠金翡翠，麝熏微度繡芙蓉。
劉郎已恨蓬山遠，更隔蓬山一萬重。
No comments:
Post a Comment