係遠古先民對世界嘅幻想
係一種口耳相傳嘅集體創作
代表左人類最原始最具活力嘅想像
正正因為咁樣
神話一百個人睇可以有一百個解讀
我地曾經講過陶淵明點睇神話
陶睇得出夸父追日動人嘅地方
今次就到我地黎睇吓
李商隱係點樣睇嫦娥呢位神話人物
而唔係「嫦娥」，唔通李商隱寫錯字？
原來一開始佢個名唔係咁嘅
《淮南子.覽冥篇》：
「姮娥，羿妻。羿請不死之藥於西王母，未及服之，姮娥盜食之得仙，奔入月中為月精也。」
最初係叫「姮娥」，但後黎同漢文帝劉恆撞名
咁皇帝大哂架啦，唯有改名做「常娥」
之後慢慢就演變做兩個字似樣嘅「嫦娥」啦
張衡《靈憲》記載：
嫦娥，羿妻也，竊西王母不死藥服之，奔月。將往，枚占於有黃。有黃占之曰：「吉，翩翩歸妹，獨將西行，逢天晦芒，毋驚毋恐，後且大昌」。嫦娥遂托身於月。是為蟾蜍。
呢個版本嘅嫦娥故仔流傳好廣
嫦娥係后羿嘅老婆，后羿就係射左九個太陽落黎嘅英雄
咁后羿做左英雄，就問西王母要左不死藥
嫦娥一聽就心諗正呀喂
個心十五十六，決定問神棍有黃占卜吓未來運程
神棍緊係話：你骨格精奇，必定係人中之鳳，去啦
點知呢，嫦娥食左藥就變左做蟾蜍升天
常娥
雲母屏風燭影深，長河漸落曉星沈。
雲母：嵌左雲母石嘅屏風
長河：天上嘅星河
其實到左李商隱呢一代嘅詩人
先開始將嫦娥變做美女
而且對嫦娥多左一分憐惜之情
直到明代小說講「必得嫦娥，天下女子不足道也」
形成左我地今時今日對嫦娥嘅形象
亦都係咁，當李商隱睇完嫦娥嘅故仔
佢就開始係到FF，仙女住係月宮
仙女訓唔著，好孤獨好寂寞咁望住屏風上
搖曳不止嘅燭光所投射嘅影子
轉頭望向銀河，望到銀河都漸漸消失
所有星星都一粒一粒咁沈沒
「深」、「落」、「沈」
都係連繫係一個「漸」字
空間嘅轉變，正正係代表左日月星移嘅時間流逝
有人估呢首詩係李商隱寫比某個女道士
又有人話呢首詩係講緊詩人自己
更有人吹呢首詩係同時局有關係
其實種種講法，都無事實根據
強求實解，勉強套入某一件事只會失去詩意
用廣義嘅情去解讀，往往更加恰當，更有解讀空間
李啇隱對嫦娥神話嘅價值判斷
並唔係罵佢點解咁衰偷嘢
「應悔」兩字，而家你應該後悔啦
其實係詩人對嫦娥一種同情憐惜
因為李啇隱感知到嫦娥「碧海青天夜夜心」嘅孤寂
呢種心之孤寂係最得人驚嘅
試想像吓
即使你去到世界最高最超脫嘅位置
但全世界得返你一個，無人同你分享一切
時間不斷流逝，銀河隕歿
你曾經識嘅人關心嘅事全部離你而去
而你依然長生不老
活著，變成毛骨悚然
活著，只不過係行屍走肉
又點唔會後悔呢？
最後再讀一次：
常娥
雲母屏風燭影深，長河漸落曉星沈。
嫦娥應悔偷靈藥，碧海青天夜夜心。
No comments:
Post a Comment