商、韓言法，則人君之地位超出法上，其本身之守法與否不復成問題，而惟務責親貴之守法君主專制之理論至此遂臻成熟，而先秦「法治」思想去近代法治思想亦愈遼遠矣。
——蕭公權
——蕭公權
五蠹篇呈現韓非子法治理論嘅思想基礎
1.改革嘅歷史觀
2.自利嘅人性觀
3.實效嘅價值觀
上篇已經詳講第一點
今次就會主力講第二、三點
建基於以上三種觀念
表達出韓非子主張法治治國之必要
但呢到必須清晰咁區別
韓非嘅法治思想
並非現代民主制度嘅法治精神
最核心係分別在於，現代理想嘅法治精神
係具有司法獨立、監察社會嘅功能
而韓非子嘅法治思想，全為君主專制而設
現代法治，反對特權，人人平等
韓非法治，為君謀權，皇帝至上
兩者貌合神離，重法而其目標相差極遠
不過我地當然唔可以話韓非廢啦
係當時嘅社會狀況，韓非已經走得好前
強調法令、制度，令人民不致混淆不清
對比仁義禮智，兼愛非攻等
更具實踐嘅可能，亦都係社會必然嘅轉變
韓非子 五蠹篇
今有不才之子，父母怒之弗為改，鄉人譙之弗為動，師長教之弗為變。夫以父母之愛，鄉人之行，師長之智，三美加焉，而終不動其脛毛，不改；州部之吏，操官兵、推公法而求索姦人，然後恐懼，變其節，易其行矣。故父母之愛不足以教子，必待州部之嚴刑者，民固驕於愛、聽於威矣。
譙：責備
脛毛：腿毛
韓非子呢邊用一個例子講人性
例子並唔係隨意用，係針對儒、墨兩家嘅
儒、墨兩家成日都講愛
儒家更加成日用父母之愛為例
證明內在德性嘅存有
韓非子就以一個不肖子為例
父母怒，鄉人罵，老師教
「而終不動其脛毛，不改」
但係改變唔到不肖子嘅惡行
「州部之吏，操官兵、推公法而求索姦人」
反而由政府推行法令，壞人惡行全部有罪
「然後恐懼，變其節，易其行矣」
咁樣，呢種人先會真正驚
因為驚法令，先會改變行為
韓非對人性大體咁睇：
人性唔係話無內在德性
但好明顯人係比較受到利害關係影響
而法嘅獎罰，正係建基於此
「民固驕於愛、聽於威矣」
父母之於兒子都係咁
更何況君主治理人民呢？
外在嘅力量比起內在更加有效
故此，韓非主張法治
今所治之政，民閒之事，夫婦所明知者，不用而慕上知之論，則其於治反矣。故微妙之言，非民務也。……今貞信之士不盈於十，而境內之官以百數，必任貞信之士，則人不足官，人不足官則治者寡而亂者眾矣。故明主之道，一法而不求智，固術而不慕信，故法不敗，而群官無姦詐矣。
韓非更進一步講：
治理國家嘅政策，應該要係簡單直接嘅
「故微妙之言，非民務也」
如果講埋咩高深莫測嘅道理
並唔係人民關心，於治國適得其反
如果去搵誠實、講信用嘅賢臣出仕
呢種人當今之世不過十人
但國家需要嘅官員超過一百位
一定要用呢種賢人嘅話
「人不足官則治者寡而亂者眾矣」
根本唔夠人用呀
結果咪就係得個亂字囉！
「故明主之道，一法而不求智，固術而不慕信，故法不敗，而群官無姦詐矣」
呢邊涉及韓非子嘅君主觀
韓非認為人主唔需要太勁太醒
求智呢件事並唔係必要，專一法治即可
掌握用人權術，唔需要求賢臣
只要法治不敗，手下自然唔敢奸詐啦
故明主之國，無書簡之文，以法為教；無先王之語，以吏為師；無私劍之捍，以斬首為勇。是境內之民，其言談者必軌於法，動作者歸之於功，為勇者盡之於軍。是故無事則國富，有事則兵強，此之謂王資。既畜王資而承敵國之舋，超五帝，侔三王者，必此法也。
舋：無道危亂
要靠道德教化改變人性，不如公法
要靠忠貞賢人治理國家，不如一法
韓非子係呢個亂世，需要即時嘅效用
治亂世，用重典，世界係好現實嘅
迫到人生絕境，又點到你再空談理想呢？
「故明主之國，無書簡之文，以法為教」
明主唔需要靠咩高深莫測嘅書籍
只要以法令教化人民就得
「無先王之語，以吏為師；無私劍之捍，以斬首為勇」
唔需要法先王，以推行法令嘅官吏做人民嘅老師
唔需要私劍兇悍，以推行法令嘅刑官為勇士
「是境內之民，其言談者必軌於法，動作者歸之於功，為勇者盡之於軍」
推倒舊嘅思想標準，建立以法為本嘅價值觀
人民遵循法令，以爲國立功為首要行動，要勇猛都嘅都入哂軍隊
「是故無事則國富，有事則兵強，此之謂王資」
法治，透過賞罰二柄
最終都係為左富國強兵，係現實嘅關懷
「既畜王資而承敵國之舋，超五帝，侔三王者，必此法也」
雖然話係現實關懷，並唔代係短視
至少韓非係呢到話，只要跟住呢種法治為本嘅諗法
要超越過去三王五帝嘅功德，正係依靠呢種法治
韓非深信，未來一定係可以超越過去嘅歷史先王
No comments:
Post a Comment