蘇軾的夢詞，是他如實表達內在情緒的重要途徑。透過各式各樣的夢，可以剖析聯想其當時的時空及背景。蘇軾一生的經歷起伏不定，卻總在仕途最不得意的時期，創作出許多膾炙人口的作品。夢詞更是其中的經典創作，夢詞裡反映生活的遭遇與心態，有愁苦、有逸樂、有期待、有渴望，恰為其真實人生的縮影。
——簡子芽
——簡子芽
有學者統計，係三百四十幾首嘅東坡詞入面
高達六十四首有用「夢」呢個字
最出名嘅，「人間如夢，一樽還酹江月」
但要讀得通，讀得深入，必須先理解東坡詞嘅夢
我地讀過
夜來幽夢忽還鄉，小軒窗，正梳妝。
夢隨風萬里，尋郎去處。又還被、鶯呼起。
係思念懷人嘅夢，充滿愁緒
東坡人生充滿唔同嘅夢
夢中了了醉中醒，只淵明，是前生。
東坡「醉」嘅狀態，成日連結「夢」嘅迷離
唔同嘅夢，唔同嘅人生感概
但相同嘅係，一切都係虛幻不實
東坡詞作入面，夢唔止係情感
亦都表達佢嘅人生觀
世事一場大夢，人生幾度秋涼。
將人生比喻為夢境
夢境係虛幻、無常，顯出人生嘅悲涼
休言萬事轉頭空，未轉頭時皆是夢 。
更進一步，東坡並唔止將「夢」當做單純嘅文學比喻
深受道家、佛家思想影響嘅東坡
由心確信，人生即係夢，夢即係人生
以為死後先係空？
根本未死之前都已經係夢啦！
《莊子·齊物論》：
昔者莊周夢為胡蝶，栩栩然胡蝶也，自喻適志與！不知周也。俄然覺，則蘧蘧然周也。不知周之夢為胡蝶與，胡蝶之夢為周與？周與胡蝶，則必有分矣。
中國文學嘅夢，大抵都離唔開莊周夢蝶
東坡嘅夢，正可上追至此
呢個故事指出人類存在嘅困境
我地係無法確定自己嘅人生係咪咁確實存在
樂觀如東坡，講起夢之一字
往往都係悲嘆，一切都係無法確定
東坡 永遇樂(彭城夜宿燕子樓，夢盼盼，因作此詞。)
明月如霜，好風如水，清景無限。曲港跳魚，圓荷瀉露，寂寞無人見。紞如三鼓，鏗然一葉，黯黯夢雲驚斷。夜茫茫，重尋無處，覺來小園行遍。
天涯倦客，山中歸路，望斷故園心眼。燕子樓空，佳人何在？空鎖樓中燕。古今如夢，何曾夢覺！但有舊歡新怨。異時對，黃樓夜景，為余浩嘆。
東坡四十三歲，係徐州做太守
有一日，佢夜宿燕子樓
夢見唐代名妓關盼盼，有所感興，揮筆成詞
呢首詞題目有唔同版本，好多爭論
例如有人覺得東坡無可能係燕子樓夜宿
不過好似東坡名作〈念奴嬌〉咁
赤壁之地嘅真偽，都唔影響文學作品嘅價值
史實認知嘅錯，無關文學藝術嘅美
古蹟燕子樓於徐州彭城內，曾有一段動人嘅愛情故事
唐代張建封鍾情名妓關盼盼，納為妾，為佢起左燕子樓
張建封逝世，關盼盼獨居多年，無嫁比其他人
白居易知道呢件事，作《感故張僕射諸伎》詩：
黃金不惜買娥眉，撿得生花三四枝。
歌舞教成心力盡，一朝身去不相隨。
白居易竟然話關盼盼唔忠貞
做咩唔跟埋老公一齊死？
關盼盼知道，答以詩曰：
自守空房恨歛眉，形同春後牡丹枝。
舍人不會人深意，訝到泉臺不去隨。
人言可畏，關盼盼絕食而死
我地可以推論，東坡都聽過呢個淒美嘅悲劇
亦都係咁，先有「夢盼盼」嘅起因
明月如霜，好風如水，清景無限。曲港跳魚，圓荷瀉露，寂寞無人見。紞如三鼓，鏗然一葉，黯黯夢雲驚斷。夜茫茫，重尋無處，覺來小園行遍。
紞如：擊鼓聲
夢雲：夢見女子之意
上半片以倒敘手法，描述詞人一連串嘅客觀經驗
由夢醒至尋覓，尋覓中又見美景，卻有寂寞之情
明月如霜之句，可見全詞寫作嘅規律
明月對好風
霜對水
首兩句對偶，尾句凝聚出焦點
清景無限，全在明月清風
深夜寂靜，三更鼓聲
以至一葉搖曳，都能令人從夢中驚醒
夢醒爾後，猶有昏沈，走出小園
只見夜色茫茫，欲尋回夢中女子不得，再三徘徊
深夜無人，東坡眼見明月灑於池塘
「夜茫茫，重尋無處，覺來小園行遍。」
清風掠過林木，正是美景當前
美景當前，心中卻有寂寞之意
魚跳露瀉，至少有東坡見證
但又有邊個見證東坡此時此刻嘅孤單呢？
天涯倦客，山中歸路，望斷故園心眼。燕子樓空，佳人何在？空鎖樓中燕。古今如夢，何曾夢覺！但有舊歡新怨。異時對，黃樓夜景，為余浩嘆。
下半片重於抒情，夢醒尋覓不得嘅情感
東坡自悲身世，仕途幾經波折
詩人多遊宦，四處飄盪
無方法返去家鄉，唯有係做天涯倦客啦
歸路何在？山中之路曲折難行
望斷即不見其終止之處
心眼，佛家之語
此處應指內心嘅渴求
僅能想像而不能達成嘅希冀
「燕子樓空，佳人何在？」
這種情思，更進而成為東坡對歷史嘅悲感
舊時王謝堂前燕，飛入尋常百姓家
東坡有相似嘅感慨，以一設問，自問自答
說出如「逝者如斯夫，不捨晝夜」嘅浩歎
張建封為關盼盼所建之樓，如今卻人去樓空
只有後人憑古蹟見證滄桑
只有燕子仍舊飛至橫樑佇立
「古今如夢，何曾夢覺！但有舊歡新怨。」
東坡有「古今如夢」之感
「何曾夢覺」，正係化用莊子之哲理
千古如是，後世如是，係人無法脫離嘅生存困境
就算曾有覺悟，但人生種種情感瑣事紛紛襲來
舊歡新怨隨即又成一新夢，令人無法自拔
「異時對，黃樓夜景，為余浩嘆。」
異時，意指不同時代
東坡嘅夢即人生，人生即夢
東坡係後世先見到燕子樓嘅虛妄
呢一個時代，東坡又為百姓所建造黃樓
百年身死，後人唔係都有相同嘅感慨咩？
東坡由歷史嘅縱深，對照哲理嘅高度
從古至今，的確都係好似莊周夢蝶咁樣
個人以至歷史，歷史又回到個人
東坡只得浩歎一聲：
再美好嘅人事，最後
最後都係他人從景物見證自己嘅事跡
我地都係活係夢一般嘅人生
但又無法脫離人生嘅夢呀！
No comments:
Post a Comment