子瞻諸文皆有奇氣。至《赤壁賦》，髣髴屈原宋玉之作，漢唐諸公皆莫及也。
——蘇籀《欒城遺言》
——蘇籀《欒城遺言》
現代文學嘅文評家，好少將議論文當做文學作品
又或者將呢種有功用、有社會性嘅作品，視作雜文學
雜文學緊係相對於純文學，大有純種同雜種之分
呢種偏頗嘅文學批評觀，直至今日都仲未完結
但係古典文學，議論文先係最大宗族
而當時個個人都覺得議論文係重要嘅文學體裁
東坡呢一篇散文賦，敘事議論為主
前赤壁賦嘅動人，一直力證議論之美
甚至有資格問鼎宋代古文嘅第一寶座
東坡 前赤壁賦
壬戌之秋，七月既望，蘇子與客泛舟遊於赤壁之下。清風徐來，水波不興，舉酒屬客，誦明月之詩，歌窈窕之章。少焉，月出於東山之上，徘徊於斗牛之間，白露橫江，水光接天；縱一葦之所如，凌萬頃之茫然。浩浩乎如憑虛御風，而不知其所止；飄飄乎如遺世獨立，羽化而登仙。
明月之詩：《詩經．陳風．月出》；窈窕之章則是〈月出〉嘅第一章
斗牛：南斗星和牽牛星
馮虛御風：駕風凌空飛行
大家可以留意，因為係賦體
東坡係入面刻意運用好多四、六句
以對偶嘅形式，建構張力嘅美
呢邊寫景寫得好出色，大家不妨細閱
「縱一葦之所如，凌萬頃之茫然」
由得葦葉咁嘅船，越過茫茫萬頃嘅江面
呢邊有可以連結後赤壁賦：
反而登舟，放乎中流，聽其所止而休焉。
後赤壁賦嘅仙家幻想，似乎係到發芽
因此會有「飄飄乎如遺世獨立，羽化而登仙」之句
於是飲酒樂甚，扣舷而歌之。歌曰：「桂棹兮蘭槳，撃空明兮泝流光。渺渺兮予懷，望美人兮天一方。」客有吹洞簫者，倚歌而和之，其聲嗚嗚然，如怨如慕，如泣如訴，餘音嫋嫋，不絕如縷。舞幽壑之潛蛟，泣孤舟之嫠婦。
東坡係呢邊唔係好似後赤壁賦咁遠離人群
反而係盡顯同朋友飲酒作樂嘅喜悅
唱完詩經，又唱楚辭：
木製嘅槳，拍擊著月光嘅流動
我嘅情懷迷茫悠遠，美人卻係天嘅一方
以詩經、楚辭為典故，美人大有講君主嘅用意
千古士人，都想受到君主嘅重用
導出呢個咁開心嘅時候有位客人吹簫，吹得好傷心
令潛藏係幽谷嘅蛟龍起舞
令係孤舟嘅寡婦悲泣
蘇子愀然，正襟危坐，而問客曰：「何為其然也？」
客曰：「『月明星稀，烏鵲南飛』此非曹孟德之詩乎？西望夏口，東望武昌，山川相繆，鬱乎蒼蒼，此非孟德之困於周郎者乎？方其破荊州，下江陵，順流而東也，舳艫千里，旌旗蔽空，釃酒臨江，橫槊賦詩，固一世之雄也，而今安在哉？況吾與子，漁樵於江渚之上，侶魚蝦而友麋鹿；駕一葉之扁舟，擧匏樽以相屬。寄蜉蝣於天地，渺滄海之一粟。哀吾生之須臾，羨長江之無窮。挾飛仙以遨遊，抱明月而長終。知不可乎驟得，託遺響於悲風。」
愀然：憂愁淒悵
月明星稀，烏鵲南飛：出自曹操《短歌行》，表明用世之思
舳艫：戰船前後相接
蜉蝣：蟲，春夏之交生於水邊，生命短暫，僅數小時
東坡聽完都好難受，就問：
點解呢位客人咁唔開心呢？
客人就引經據典咁答佢：
曹操曾經係呢到寫過「月明星稀，烏鵲南飛」
係赤堅呢到，正係周瑜困住佢嘅地方
而曹操寫呢首詩果陣，仲係覺得自己唔會輸
但係呢位一世之雄才，而家又係係邊呢？
佢地咁英雄嘅人物都死左，何況我同你呢
係江邊捕魚砍柴，與魚蝦作伴，與麋鹿為友
一葉小舟，相互敬酒
「寄蜉蝣於天地，渺滄海之一粟。」
好似蜉蝣置身於廣闊嘅天地
好似滄海入面一顆粟米咁渺小
「哀吾生之須臾，羨長江之無窮。」
一生短暫，長江無窮
好想同仙人攜手遨遊各地
好想同明月一樣永存世間
呢種事緊係做唔到啦
唯有將借悲涼嘅秋風傳遞簫聲餘音係呢到，呢位客人正係好多文人嘅典型
文人之所以傷春悲秋，正係因為生命嘅敏感
詩人往往係非常敏銳咁察知人生命限
即係人受時間、空間咁限制，而最終必有一死
正因為人生充滿局限，先會有咁多悲劇發生
十年生死兩茫茫。不思量，自難忘。
世路無窮，勞生有限，似此區區長鮮歡。
恨此生長向別離中，彫華髮。
東坡自己嘅一生，唔係都成日有咁嘅悲劇咩？
因為生命短暫，愛人逝世
因為小人誹謗，多次受貶
因為時空局限，兄弟長別
如果可以成為神仙，當然可以突破人生命限啦
但呢種希望，大抵只係一種無可奈何嘅希望
亦係咁，千古文人，一如東坡之悲
蘇子曰：「客亦知夫水與月乎？逝者如斯，而未嘗往也；盈虛者如彼，而卒莫消長也，蓋將自其變者而觀之，則天地曾不能以一瞬；自其不變者而觀之，則物與我皆無盡也，而又何羨乎？且夫天地之間，物各有主，苟非吾之所有，雖一毫而莫取。惟江上之清風，與山間之明月，耳得之而為聲，目遇之而成色，取之無禁，用之不竭，是造物者之無盡藏也，而吾與子之所共適。」
如果只係停留於此一境界
東坡就唔會成為人人稱之為超曠豁達嘅大文學家
呢到東坡用水同月做比喻
流水不斷逝去，但從未消失
月亮時圓時缺，但並無增減
如果只係「變」嘅個別咁睇，天地萬物無時無刻都改變緊
反之，由「不變」去睇整體，人係大自然之一
大自然係無窮無盡，生命係不斷延續架
「且夫天地之間，物各有主，苟非吾之所有，雖一毫而莫取」
天地萬物，各有主宰嘅命運
我地何必妄求超越，唔係我嘅，我半點都唔會要
「惟江上之清風，與山間之明月，耳得之而為聲，目遇之而成色，取之無禁，用之不竭」
只有大自然嘅清風、明月，我地可以盡情享受
人忘記個體嘅得失局限，回歸自然嘅大我無私
呢種喜悅，係取之無禁，用之不竭嘅
「是造物者之無盡藏也，而吾與子之所共適」
「變」、「不變」嘅想法，來自莊子嘅哲理
以個體觀之，人必然會生、老、病、死
以整體宇宙觀之，則「天地與我並生，萬物與我為一」
放任自然，忘情山水，小我以至大我嘅回歸
客喜而笑，洗盞更酌。肴核既盡，杯盤狼藉，相與枕藉乎舟中，不知東方之既白。
餚核：葷菜和果品
回首向來蕭瑟處。歸去；也無風雨也無晴。
試問嶺南應不好？卻道：此心安處是吾鄉。
堪笑蘭臺公子，未解莊生天籟，剛道有雌雌。一點浩然氣，千里快哉風。
東坡嘅超曠思想，係詞入面成日出現
但詩詞始終字數有限，同埋係直抒性情
好難仔細、充分咁議論背後思想嘅基礎
七情六慾，感性嘅生命當然唔係一成不變
但理性思想一旦植根，就會緊緊咁扎根於心田
前赤壁賦嘅樂觀，客人歡聚嘅喜悅
後赤壁賦嘅孤寂，道士化鶴嘅驚夢
似乎主題不同，但內在思想一貫兩文
議論以至行動實踐，就算係悲哀嘅時候都有堅持
出世入世，順逆安困
超曠在於一心修為，因有困境，才有超曠
No comments:
Post a Comment