泛泛東風初破五，江柳微黃，萬萬千千縷。佳氣鬱蔥來繡戶，當年江上生奇女。
一琖壽觴誰與舉，三箇明珠，膝上王文度。放盡窮鱗看圉圉，天公為下曼陀雨。
我地之前講王弗同東坡浪漫動人嘅愛情故事
係王弗死後三年，王弗嘅堂妹王閨之就嫁比東坡
有可能，係王弗病重果陣，已經按排呢頭親事
因為王閨之仲係細路女，就好崇拜東坡架啦
王閨之嘅性格好溫順，同王弗會教吓東坡做人唔同
王閨之呢，就只會盡心咁聽老公仔話
既然同為王氏家族，自然對王弗生嘅仔視如己出
生左兩個仔，為東坡提供和諧安穩嘅家庭
小兒不識愁，起坐牽我衣。
我欲嗔小兒，老妻勸兒癡。
兒癡君更甚，不樂愁何為？
還坐愧此言，洗盞當我前。
大勝劉伶婦，區區為酒錢。
東坡曾經寫過一首詩，係佢密州做太守果陣
遇上蝗災四起，百姓饑饉，民不聊生
王閨之為佢提供最大嘅支持同動力
阿仔唔識性，係到煩住老豆
老豆鬧到佢仆街啦，個仔即刻痴住阿媽
王閨之又哄阿仔，又倒茶比東坡
王閨之笑笑口咁講：
阿仔係痴人，點知你仲痴過佢
做人最緊開心呀！
東坡呢刻就好感激王閨之嘅無限支持啦
王閨之陪伴東坡大半生
特別係經過烏臺詩案同黃州時期嘅困苦
見住老公比人捉，雖然嚇都死死吓
但依然堅守家庭，忠貞不二
足足計落有成二十五年，真係夫復何求
王閨之死後，東坡寫過一首悼亡詞
東坡 蝶戀花(同安君生日放魚，取金光明經救魚事)
泛泛東風初破五，江柳微黃，萬萬千千縷。佳氣鬱蔥來繡戶，當年江上生奇女。
繡戶：大戶人家
詞題係講緊東坡係王閨之生辰果陣
買魚放生，行善以求超渡死者
有趣嘅係，我地會見到東坡悼亡嘅態度已經好唔同
相比之前寫比王弗嘅「十年生死相茫茫」
呢首悼亡詞係無咁悲傷，甚至幾睇得開
主要係因為東坡對死後嘅世界，睇法唔同左
特別經過黃州困苦，對佛家嘅思想更有研究
因此即使面對生死大事，都無之前咁灰
東風吹來，天時漸暖
又到王閨之初五嘅生日啦
呢到嘅江邊嘅柳樹有微微嘅黃色
樹幹枝葉隨風而擺，萬萬千千縷
萬萬千千縷，都好似東坡對老婆嘅思念
東坡遙想，當年王閨之出生大戶人家
家鄉眉州青神，江山秀美，岷江穿境而過
「佳氣」、「鬱蔥」、「奇女」
都係歌頌王閨之嘅美德，出身之不凡
正係情人眼中出西施
一琖壽觴誰與舉，三箇明珠，膝上王文度。放盡窮鱗看圉圉，天公為下曼陀雨。
圉圉：擠迫
呢杯賀喜生日嘅壽酒
東坡又可以向邊個舉起呢？
「三箇明珠」，係講緊東坡三個仔
「膝上王文度」，借用晉人王述典故
王述極愛其子王坦之
「雖長大，猶抱置膝上」
呢到東坡講王閏之對三個仔都好好
「放盡窮鱗看圉圉，天公為下曼陀雨」
呢到講緊東坡放生魚嘅數量好多
望落去好似堆魚都迫埋一齊咁
上次東坡為王弗種樹，今次為王閨之放魚
東坡呢邊借用佛教典故
傳說係西方極樂世界
有種極芬芳美麗嘅花叫曼陀羅花
不論晝夜都無間斷咁從天上落下，滿地繽紛
《阿彌陀經》:「晝夜六時，天雨曼陀羅花。」
曼陀羅，梵語音譯，意為悅意花
表層係話，上天可憐堆魚咁迫，落雨增加水量
深層黎講，係指希望上天可以保佑死者安樂
東坡哀而不傷，以佛家作寄託
經過咁多事情，對生死離別都無咁極端
三位情人都比東坡早死
每一首悼亡詞，都有唔同嘅呈現
大家不妨細細品味當中嘅深情
No comments:
Post a Comment