黃州之後，東坡又返去權力核心京師做事
王安石推行嘅新法已經完結
連王安石本人都失勢好耐
不過政治嘅黨爭，成日都好反覆無常
尤其中國行君主專制，皇帝換一個後生嘅
一切以往嘅規則，好快可以改變
咁有個叫章停嘅人，就令到年輕嘅皇帝再次支持新法
之後好多反對新法嘅大臣，包括東坡
自然都係大不敬啦，好多都掛上罪名流放
東坡貶謫到廣東高山大疫嶺以南
更加唔好講後尾仲再流放去海南島
東坡曾經寫過一首詩，佢對嶺南嘅印象係：
問君謫南賓，野葛食幾尺。
逢人瘴髮黃，入市胡眼碧。
窮山惡水，瘴雨蠻煙
生活條件惡劣，慘過去阿魯阿圖
東坡出發去嶺南果陣，有個好淒涼嘅故事
佢唔願意拖累旁人，要獨自過嶺
命長子蘇邁、次子蘇迨攜眷守家宜興，又遣散家中嘅姬妾
鄱陽湖上都昌縣，燈火樓臺一萬家。
水隔南山人不渡，東風吹老碧桃花。
東坡〈與王庠〉云：
「初欲獨赴貶所，兒女輩涕泣求行，故與幼子過一人來，餘分寓許下、浙中，散就衣食。」
除三子蘇過之外，朝雲係陪侍蘇軾過嶺嘅唯一家眷
換句話咁講，即係成頭家都散哂啦
但係當東坡去左嶺南之後，似乎表現得好豁達
東坡〈十月二日初到惠州〉：
仿佛曾游豈夢中，欣然雞犬識新豐。
吏民驚怪坐何事，父老相攜迎此翁。
蘇武豈知還漠北，管寧自欲老遼東。
嶺南萬戶皆春色，會有幽人客寓公。
佢又寫過封信咁形容：
到惠將半年，風土食物不惡，吏民相待甚厚。……今日游白水佛跡，山上布水三十切。雷輥電散，末易名狀，大略如項羽破章邯時也。 自山中歸來， 燈下裁答，信筆而書，紙盡乃已。三月四日
東坡完全唔似受苦咁，過得好開心！
係咪因為經過黃州之後
呢種困苦，係心理上已經唔係難關呢？
東坡 定風波(王定國歌兒曰柔奴，姓宇文氏，眉目娟麗，善應對，家世住京師。定國南遷歸，余問柔：廣南風土，應是不好？柔對曰：此心安處，便是吾鄉。因為綴詞云。)
常羨人間琢玉郎，天應乞與點酥娘。自作清歌傳皓齒，風起，雪飛炎海變清涼。
萬里歸來年愈少，微笑，笑時猶帶嶺梅香。試問嶺南應不好？卻道：此心安處是吾鄉。
呢首詞，係東坡離開黃州後所作
東坡朋友王定國，因受烏臺詩案連累
係東坡去黃州，佢已經去左嶺南啦
直到呢件事結束，先返黎京師
因為咁，東坡同佢嘅情人吹水，作左呢首詞
既然自己累到王定國咁慘
第一句緊要讚吓人地先：
我成日都好傾慕好似王定國你呢種型男架
上天應該係要比返柔奴呢個靚女陪你
清脆嘅歌聲由潔白嘅牙齒傳出
就好似一陣涼風吹起
再辛苦嘅困難，就算好似炎熱嘅大海
都會因為飛雪一般嘅美女相伴，變得清涼
萬里歸來年愈少，微笑，笑時猶帶嶺梅香。試問嶺南應不好？卻道：此心安處是吾鄉。
東坡見到王定國，好好奇咁
點解你係窮山惡水返黎，睇落仲年輕左嘅？
柔奴微笑，似乎仲有半分嶺南梅花嘅香味
東坡忍唔住問：
果邊嘅環境，唔係好差咩？
柔奴繼續笑住咁講：
只要我能與己心相安
又有邊個地方唔係可供安頓嘅鄉土呢？
我地可以想像，東坡聽到之後係大受感動
甚至話去到嶺南以至海南島，東坡都抱持咁嘅諗法
而呢首詞好似預言咁：
王定國、柔奴
蘇東坡、朝雲
竟然出奇咁相似，既然係咁東坡又點會灰呢！
不論古今中外，女性係文學之象徵
往往都係純潔、救贖，比人好大嘅力量
此心安處，便是吾鄉
東坡晚年雖然都唔叫過得安穩
面對好多困難，但仍然識得自我解脫
呢種，正正係東坡最令人激賞嘅地方
慘過去阿魯阿圖--->笑左
ReplyDelete