東坡 浣溪沙(游蘄水清泉寺，寺臨蘭溪，溪水西流)
山下蘭芽短浸溪。松間沙路淨無泥。蕭蕭暮雨子規啼。
誰道人生無再少？門前流水尚能西，休將白髮唱黃鷄。
《東坡志林》卷一記載：
「黃州東南三十里為沙湖，亦曰螺師店，予買田其間，因往相田，得疾。聞麻橋人龐安常善醫而聾，遂往求療。安常雖聾，而穎悟絕人，以紙畫字，書不數字，輒深了人意。余戲之曰：『余以手為口，君以眼為耳，皆一時異人也。』疾愈，與之同游清泉寺。寺在蘄郭門外二里許，有王逸少洗筆泉，水極甘，下臨蘭溪，溪水西流。余作歌雲。」
東坡因病而至蘄水求一名醫診治
呢位醫生雖然係聾，但好鬼勁
東坡就講笑：
我用手寫嘢當口，你用眼取代耳，一樣咁勁！
醫好之後，東坡就同佢同遊清泉寺
見到人間美景，故作此詞
山下蘭芽短浸溪。松間沙路淨無泥。蕭蕭暮雨子規啼。
子規：杜鵑
上半片描繪出清泉寺三景
東坡眼見蘭花之芽浸於溪水，點出「寺臨蘭溪」之題
腳踏松間小路，塵土濕潤
絕無塵土飛揚，比人潔淨嘅感覺
耳聽傍晚雨至，蕭蕭暮景，惹起杜鵑啼叫
古人話杜鵑啼血，叫聲哀怨
東坡時年四十八，病後遊玩
出去玩又再遇上無法預測嘅大雨
杜鵑陣陣悲鳴，引起東坡嘅心境變化
誰道人生無再少？門前流水尚能西，休將白髮唱黃鷄。
下半片直抒理趣，全在流水西流嘅反常
如果係其他詞人，老年病癒，暮雨中聽住杜鵑啼血
九成九都會借流水抒發自己對時光飛逝嘅悲情
但東坡唔係咁，佢睇到流水嘅獨特之處
水多向東流，而眼前嘅水偏流向西邊
東坡突然感悟：
人生本來係充滿不同嘅際遇
每一條流水嘅分支，都自有一片風景
邊個話人生就係咁結束呢？
青春本不在年齡，而係心境
東坡呢到反用白居易之詩：
「誰道使君不解歌，聽唱黃鷄與白日」
何必感嘆青春不再，流水尚能西流
人生本來充滿唔同可能
只要願意去尋覓，就係青春
清泉寺係名勝，人多慕名而來
人多則俗，令文學家難以寫出好詩
但東坡從生活經驗入手，見出流水西流嘅反常獨特
呢種小詞，平淡自然
唔新奇都唔深奧，但靜心欣賞
如一杯好茶，好值得細味入面嘅精神
No comments:
Post a Comment