我喜歡東坡在黃州給朋友寫信的一段話，他說，在市集喝酒，為醉漢推罵，「自喜漸不為人識」。東坡年輕就有盛名，因為有「名」，容易沾沾自喜。「名」當然只是自己執著，到了鄉下荒野市集，拉車賣菜的，誰知道你有「名」？市集裡當然沒有人認識東坡，喝醉了酒，跌跌撞撞，推倒東坡，還罵他兩句。東坡大概最初也生氣，但想一想，沒有人認識他了──「自喜漸不為人識」，多麼高興，漸漸沒有人知道他是誰了。
——蔣勳
莫聽穿林打葉聲。何妨吟嘯且徐行。竹杖芒鞋輕勝馬。誰怕？一蓑煙雨任平生。
料峭春風吹酒醒。微冷。山頭斜照卻相迎。回首向來蕭瑟處。歸去；也無風雨也無晴。
東坡超曠之作不少，我地都已經讀過幾首
例如甘聲八州(寄參寥子)、水調歌頭(黃州快哉亭贈張偓佺)等
都係讀落好明快，兼之富有東坡嘅人生哲學
但係我地讀過嘅詞作，都無呢一首咁出名咁深入人心
呢首詞嘅序寫得明確，係一個好嘅「定向閱讀」
三月七日係沙湖道遇雨，但雨具又唔係手喎
東坡係到恥笑同行嘅人都好狼狽不咁狂奔
喂有咩值得咁做，唉濕哂唉唔撚驚啦！
等一陣真係變返晴天，東坡因此特作此詞
莫聽穿林打葉聲。何妨吟嘯且徐行。竹杖芒鞋輕勝馬。誰怕？一蓑煙雨任平生。
首句「莫聽」，係呼叫嘅語氣
東坡係到講：落雨，又有咩好怕喎！
暴雨之中，雨水點點穿擦竹林，滴滴打響綠葉
突如其來嘅變化，引起眾人嘅驚慌
甚至係無意識咁就拔足奔逃
其實無雨具，跑得再快咪又係濕哂
正因為咁，東坡先勸大家唔好驚慌失措
由此，生出「何妨」
既然點都係濕，不如乘著雨水吟嘯高歌，慢慢感受
東坡呢種超越常人嘅霸氣貫穿全詞嘅情景
「竹杖芒鞋輕勝馬。誰怕？一蓑煙雨任平生。」
竹杖、芒鞋，係馬嘅對比
前者係慢慢散步嘅工具，後者則係趕路用嘅動物
形容東坡嘅悠閒，暗示詞人面對逆境都唔會匆忙慌亂
「誰怕」乃一反問，引出東坡嘅超曠
風雨之逆境，係詞人眼中都係平常事，影響唔到心境嘅平淡
「一蓑煙雨任平生」，披住草蓑，任煙雨沾上
面對逆境，平常處之，其實都無咩好怕
料峭春風吹酒醒。微冷。山頭斜照卻相迎。回首向來蕭瑟處。歸去；也無風雨也無晴。
下半片由逆境轉入順境，再由東坡超曠嘅哲理收筆
春風一吹，詞人酒醒，原來佢之前飲醉左
呢種醉意，亦都令佢催生「吟嘯且徐行」嘅瀟脫
酒醒之後，略有寒意
東坡嘅心境更為澄明，哲眼觀世更加清晰
此時風雨盡去，陽光斜照，可謂一可喜之順境
凡人處世，常因客觀境況，主導喜怒哀樂
就算樂境也好，苦境也罷，都係被外界決定
「悲喜不由己」，東坡不欲如此
故有第三境，「也無風雨也無晴」之寧境
「回首向來蕭瑟處。歸去；也無風雨也無晴。」
詞人於沙湖道中回首前路，落葉殘花，同行狼狽
歷歷在目，凝固風雨蕭瑟之不堪
咁樣嘅逆境已經過去啦，眼前暖陽斜照，好似好美好
詞人舉足相迎，雙目卻回顧後路
無喜無悲，順逆不動
係呢一刻，東坡已經超越外在環境
由相迎到回首，回首至歸去
「歸」之一字，即生命之歸宿
人生最後安頓之處，東坡意指，應係家鄉嘅「根」
歸去係東坡安頓嘅夢想，而係達成呢個夢想之前
人生所經，東坡希望做到「也無風雨也無晴」
簡單黎講，即係平常心
做到不以物喜，不以己悲嘅境界先係最難
東坡當然都唔係成日做到啦，但至少佢係呢一刻嘅人生境遇做到
由人生順逆之景，生出超曠嘅理境
用豁達嘅心，解脫受外界控制嘅心境
呢首詞入面，我地見唔到議論
東坡高明嘅地方，係用具體常見嘅風雨隱喻人生
我地嘅人生何嘗唔係成日都有風雨？
東坡同緊我地講：
何妨吟嘯且徐行，驚咩？
No comments:
Post a Comment