呢一幕，真係令唔少Walking dead劇迷心碎
凹頭凸眼嘅死相極為慘烈，仲引起Fans揚言棄劇
Glenn係第一季已經出現，親切嘅形象深入人心
但係，我地可以問一個問題：
點解Glenn咁受歡迎，佢係劇入面嘅意義係咩？
Walking dead S7終結
Glenn嘅老婆Maggie最後自白，為第一集死嘅Glenn定位：
To suffer, to stand, to grieve, to give, to love, to live. To fight for each other. Glenn made the decision, Rick. I was just following his lead.
一切嘅善良，都係起源自Glenn第一季無私咁救Rick
或者因為咁，雖然身處弱肉強食嘅世界
都叫保有人性，算係故事入面會幫吓人嘅團隊
但呢一樣嘢，正正係被Negan一棍打破
Rick團隊舊有嘅諗法，完全係呢一刻轟然崩潰
Negan嘅壓倒性力量，係到宣告：
你地呢種諗法真係太天真，我果套先係可行架！
亦都可以話，Rick團隊經歷咁多起伏建構出黎嘅嘢
係呢一刻全盤幻滅，唔止Rick佢地覺得絕望
連我地做觀眾嘅，都係難以接受
相同嘅情況，亦都發生係中國思想史發展
點解咁多年以黎嘅儒者，甚至近代學者都唔鍾意法家
因為佢地都以儒家為主流，自然厭惡曾經革走佢地命嘅法家
法家思想係秦國滅亡之後嘅發展，容後再講
我地係呢邊先講法家成為主流之前嘅中國思想世界
《孟子·滕文公下》：
「楊朱、墨翟之言盈天下。天下之言，不歸楊則歸墨。」
孔子嘅儒家思想，係先秦諸子百家嘅開拓
孔子之後，各家各派嘅思想不斷出現
諸子百家爭鳴，道家、墨家、農家、名家、陰陽家等等
而當時儒家最大嘅對手，正如孟子講：
道家、墨家嘅思想充斥天下，唔係道家，就係墨家
亦都因為咁，我地會見到孟子以至荀子
對道家、墨家呢兩派思想嘅批評最多
荀子嘅《非十二子》篇，反駁六家思想
道家、農家、墨家、法家、名家、儒家(孟子)
荀子係先秦最後嘅儒家代表，係李斯、韓非嘅老師
而係佢站係戰國末年去睇，罵得最多仍然係墨家
喂大佬，同我爭飯食
緊係主力唱衰最有聲勢果個啦
《韓非子·五蠧》：
「儒以文亂法，俠以武犯禁，而人主兼禮之，此所以亂也。」
儒家講仁愛人情，搞亂法制
墨家侠客嘅作風簡直侵犯禁忌
君主好有禮貌對呢兩種人，電腦大爆炸呀！
秦始皇依據韓非法家思想，統一天下
法家思想嘅當頭棒喝，將儒墨兩家條命革走
果種震撼，有如Negan嘅出場
思想嘅革命，即係徹底咁推翻舊有嘅主流
實際嘅權力，法家係反對以往嘅分封世襲制度
必須建立中央集權嘅制度，唔可以再因循守舊
正如Negan要嘅係做皇帝，其他人只係佢手下
咩亞歷山大，神之國全部都係進貢嘅附屬國
唔存在Rick想建立嘅公平交易，互相幫助
只要我做到最勁果個，不斷壓制你地，先係王道
勞思光：
韓非思想雖受儒、道、墨之影響，然本身有一否定論之價值觀念為其骨幹，故所取於諸家者，皆為技術末節，用以補成其學說；其基本精神乃一大否定，而諸家之說適為此否定論所利用，此則為中國古代哲學史中之一大悲劇，亦文化之一大劫運也……此一文化劫運，具體之表現為秦政權之成立。
我地未必要同意勞思光一大悲劇嘅批評
正如我地站係Negan睇，打爆Glenn就係正常
勞思光以儒家思想為本位，自然覺得呢個一大劫運啦
但至少勞思光講否定、利用係正確嘅
正正表示韓非思想嘅革命，係先秦諸子入面最成功
韓非子到底係點樣出現呢種思想？
點解作為儒學大家荀子嘅學生，會係咁罵儒家？
韓非重要嘅思想到底係點？
當中又有咩同Walking dead有相似嘅地方？
呢一切，就等我地步入正文講解啦！
No comments:
Post a Comment