乳燕飛華屋。悄無人、桐陰轉午，晚涼新浴。手弄生綃白團扇，扇手一時似玉。漸困倚、孤眠清熟。簾外誰來推繡戶？枉教人、夢斷瑤臺曲；又卻是，風敲竹。
石榴半吐紅巾蹙。待浮花浪蕊都盡，伴君幽獨。穠豔一枝細看取，芳意千重似束。又恐被、西風驚綠。若待得君來向此，花前對酒不忍觸。共粉淚，兩簌簌。
清初沈雄《古今詞話》入面話東坡呢首詞為官妓而作
有個文人胡仔唔信呢種講法：
「東坡此詞，冠絕古今，託意高遠，寧為一妓而發耶？」
到底邊個真，邊個假呢？
其實我地睇古典詩詞，除非年事有明確證據
否則就好似對呢首詞咁，無確據就最好存疑未知
呢首詠物詞，重在虛意，不在實事
我地單從文本詮釋，已經足夠啦
乳燕飛華屋。悄無人、桐陰轉午，晚涼新浴。手弄生綃白團扇，扇手一時似玉。漸困倚、孤眠清熟。簾外誰來推繡戶？枉教人、夢斷瑤臺曲；又卻是，風敲竹。
上半片寫女子孤單之貌
時間推移中顯出女子嘅百無聊賴
女子悄悄看著小燕飛入華麗嘅屋簷，日光映照
梧桐樹嘅影子漸漸推移，直至午時樹影拉長
只有寂寞敏感嘅心，先會靜觀
先會從空間嘅細微變化睇出時間流逝
等到夜晚無嘢做，唯有沖涼先啦
「手弄生綃白團扇，扇手一時似玉。漸困倚、孤眠清熟」
女子把玩生絲做嘅圓扇
隻手細看如玉之白晢，仲白過白扇
坐吓坐吓，漸感慵懶
係清靜嘅氣氛忍唔住就訓著左
「簾外誰來推繡戶？枉教人、夢斷瑤臺曲；又卻是，風敲竹」
從夢中嘅仙樂中驚醒
係咪女子等待中嘅情人推門返黎？
女子懷著驚喜嘅心情睜眼，但係一個人都無
原來只係風竹聲音
女子孤寂嘅盼望，一切都成空啦
石榴半吐紅巾蹙。待浮花浪蕊都盡，伴君幽獨。穠豔一枝細看取，芳意千重似束。又恐被、西風驚綠。若待得君來向此，花前對酒不忍觸。共粉淚，兩簌簌。
下半片轉寫石榴花，又引出女子和花嘅共同點
石榴、紅巾，意象並置
石榴花瓣半開之姿一如紅巾屈折卷縮
浮花浪蕊，都太過輕浮啦
石榴花嘅花期係百花凋零後先會盛放
石榴半吐，有將開未開嘅壓抑
就好似女子嘅閨怨，希望有緣人惜花
「伴君幽獨」
下開花有中人、人中有花嘅境界
「穠豔一枝細看取，芳意千重似束。又恐被、西風驚綠」
女子觀花，花映女子
彼此為伴，同心相鄰
請有心人細看抑制中嘅穠豔
唯有細看，先見到花受束縛嘅千重心意
但係真係會等到有緣人？
時光飛逝，夏日一過
秋風寒氣來時，花早就凋零啦
「若待得君來向此，花前對酒不忍觸。共粉淚，兩簌簌」
如果等到同受此苦嘅女子黎到
持酒對殘花，簡直係連花瓣都唔忍心觸摸
因為女子知道花嘅凋零
亦都反映左女子嘅青春難駐呀！
淚流花飄，女子悲物，亦係自悲
古代青春女子等待心上人嘅無奈
多少都有幾分《牡丹亭》杜麗娘嘅空虛寂寞
呢種普遍女子嘅心靈感受，不必套入實事而專指一人
其實即使係現代，都有唔少人有相似嘅感受
我地不妨好好再讀一次呢首詞
No comments:
Post a Comment