德尼思化粵文港: [古典文學入門（三）ep.35]赤壁三部曲（一）：不可久留之孤高境界一讀東坡後赤壁賦

作家常有詩文同胎的現象：蘇軾的〈念奴嬌〉與〈赤壁賦〉便是一例。……作家對於自己關心的題材，橫看成嶺，側看成峰，而再三模寫以窮盡其狀，一方面固然是求材盡其用，一方面對自己的彈性與耐力，以及層出不窮的創意，也是很苛的考驗。
——余光中

同一題材，點解要寫幾次呢？

呢個係形式同內容之間嘅問題
假如內容係水，形式係杯
咁樣唔同種類嘅杯，就能呈現水嘅唔同形狀
文體、語言係有佢嘅局限

好似詩詞咁，擅長用意象表達情感
而散文呢，比較可以呈現思辨嘅結晶
小說戲劇，可以鋪排細膩動人嘅故事

作為大文學家，東坡又擅寫咁多文體
自然深知一個豐饒嘅題材，唔係用單一嘅文體
唔係寫一次，就能夠充分表達題材嘅複雜

赤壁懷古，三國英雄齊聚嘅赤壁之戰
不論東坡嘅時代，抑或2017年嘅當下，都係好精彩嘅故事
千百年來咁多人用呢個題材創作，不妨視作人類嘅同題書寫
而東坡寫下一首詞，兩篇散文賦
永遠都係三國赤壁文學入面最耀眼嘅作品

係時間而論，東坡係寫念奴嬌(赤壁懷古)先
再寫赤壁賦，最後先係後赤壁賦嘅
亦都係話，東坡寫完詞作，覺得仲有嘢要講

之後再寫其他兩賦，係詞嘅補充，亦都係獨立作品嘅連結
劉少雄：
相較於詞，賦體重鋪陳，發議論，是較理性的文體；而且須具問答的形式，更方便相對論題的開展。東坡另外的赤壁文學，捨詞而取賦體，可見他不想深陷於情緒中，想以更明白理性的態度、更長的篇幅來探索這難解的人生課題。以理導情，融情入景，以臻自然，應是他設定的方針。

我地當然可以由時間順序去睇赤壁三部曲
但亦不妨以詞為中心，倒轉時序黎睇
由前赤壁賦、後赤壁賦嘅思考內容，切入東坡詞作嘅情感抒發
詩詞往往係提煉濃縮嘅精華，需要更多輔助方能深入

東坡後赤壁賦

是歲十月之望，步自雪堂，將歸于臨皋。二客從予過黃泥之坂。霜露既降，木葉盡脫，人影在地，仰見明月，顧而樂之，行歌相答。已而嘆曰：「有客無酒，有酒無肴，月白風清，如此良夜何！」客曰：「今者薄暮，舉網得魚，巨口細鱗，狀如松江之鱸。顧安所得酒乎？」歸而謀諸婦。婦曰：「我有斗酒，藏之久矣，以待子不時之需。」
呢到首先講東坡同兩位朋友準備返去臨皋休息
經過黃泥路，眼前只見霜露依附係無哂樹葉嘅木幹
但呢種深秋初冬景況，無阻佢地嘅歡樂
似乎有幾分「何夜無月？何處無竹柏？但少閑人如吾兩人耳」嘅意味

東坡於是係到講：
有客人果陣又無酒，有酒果陣又無菜餚
難得月明風清，天氣咁好我地做咩好！

客人就答佢：
我今日捉左條魚，應該幾好食
不過唔知呢個時候邊到有酒呢？

返到去佢地就同東坡老婆講
好彩東坡老婆平時都知佢地鍾意飲酒
特登留返一斗酒比佢地飲咋

于是攜酒與魚，復游于赤壁之下。江流有聲，斷岸千尺﹔山高月小，水落石出。曾日月之幾何，而江山不可復識矣。予乃攝衣而上，履巉巖，披蒙茸，踞虎豹，登虯龍，攀棲鶻之危巢，俯馮夷之幽宮。蓋二客不能從焉。劃然長嘯，草木震動，山鳴谷應，風起水涌。予亦悄然而悲，肅然而恐，凜乎其不可留也。反而登舟，放乎中流，聽其所止而休焉。

馮夷：水神名，即河伯
凜乎：凜，淒清。乎，歎詞

呢邊寫景當然寫得好精妙啦

「江流有聲，斷岸千尺；山高月小，水落石出」
江流、斷岸、山、月、水、石
無一不是對比，兩句都係對偶
「曾日月之幾何，而江山不可復識矣」
離上次黎赤壁都唔係好耐，但景色已經變到認唔到啦

好有趣嘅係，東坡係到強調：
「予乃攝衣而上」、「蓋二客不能從焉」
第一段用咁多筆墨寫兩位客人同遊之樂
但去到第二段，已經連影都無啦

點解會咁樣？
「履巉巖，披蒙茸，踞虎豹，登虯龍，攀棲鶻之危巢，俯馮夷之幽宮」
踏上險峻嘅山岩，撥開紛亂嘅野草
如虎豹可怕嘅怪石，如虯龍嘅樹枝
攀上猛禽雀巢嘅懸崖，下望水神嘅深宮
呢一切，其實都隱喻緊東坡嘅人生

驚起卻回頭，有恨無人省。揀盡寒枝不肯棲，寂寞沙洲冷。
有朋友相伴，去到孤獨前行
東坡於黃州嘅人生經驗，唔係正正係咁咩？

「劃然長嘯，草木震動，山鳴谷應，風起水涌。」
古人於情感翻覆之際，往往無法自制咁長嘯
東坡係呢種日子，寫下無數詞作

「予亦悄然而悲，肅然而恐，凜乎其不可留也。」
不可久留，正是：
我欲乘風歸去，又恐瓊樓玉宇，高處不勝寒。
人生一切高遠之精神境界，都係孤芳自賞
正因如此，只得東坡先見到赤壁嘅壯美

「反而登舟，放乎中流，聽其所止而休焉。」
返到船上，劃至江心，任憑漂流停泊
夜闌風靜縠紋平，小舟從此逝，江海寄餘生。
正如呢首詞一樣，東坡都係必須回到人群之中

時夜將半，四顧寂寥。適有孤鶴，橫江東來。翅如車輪，玄裳縞衣，戛然長鳴，掠予舟而西也。須臾客去，予亦就睡。夢一道士，羽衣翩仙，過臨皋之下，揖予而言曰：「赤壁之游樂乎？」問其姓名，俯而不答。「嗚呼！噫嘻！我知之矣。疇昔之夜，飛鳴而過我者，非子也邪？」道士顧笑，予亦驚寤。開戶視之，不見其處。

翩仙：飄然若仙

第三段有神仙幻想之語
東坡係自己船上，周圍都好靜無人
呢個時候竟然有孤鶴飛至，佢嘅翅膀有車轆咁大